طبق طائر بيحوم فوق الصحرا في ولاية كاليفورنيا.. بالصور

الأربعاء، 15 نوفمبر 2017 12:56 م

طبق طائر بيحوم فوق الصحرا في ولاية كاليفورنيا

كلنا أكيد سمعنا عن موضوع إن كل شوية طبق طائر يظهر في أماكن مختلفة من العالم.. وناس كتير شافت الظاهرة دي وصورتها كمان.. لكن بقالنا فترة مسمعناش عن حالة جديدة حصلت.. من كام يوم بقى اكتشفنا حالة جديدة بس قديمة في نفس ذات الوقت لطبق طائر بيحوم في الجو في ولاية كاليفورنيا بـ الولايات المتحدة الأمريكية.. هفهمك..

طبق طائر

جرنان "ديلي إكسبريس" البريطاني عرض صور بتبين طبق طائر بيحوم فوق الصحرا في ولاية كاليفورنيا بالولايات المتحدة الأمريكية.. اللي لقط الصور دي واحد اسمه كيث برادشو.. وصورها في سنة 2007.. هتقول وهو الموضوع متعرفش من ساعتها إزاي وليه فضل مستخبي 10 سنين؟.. هقولك.. الراجل منشرهاش ولا وراها لحد خالص من ساعتها لإنه قال يمكن مش طبق طائر والناس كانت ممكن تتريق عليه.. لكنه شاف من قريب طبق تاني في نفس المكان بس ملحقش يصوره.. فقرر إنه يدي الصور لأي جرنان عشان ينشرها ويوريها للناس ..

الطبق الطائر وهو قريب من الأرض وجنب الهليكوبتر

برادشو قال إنه لما صور الطبق كان جنبه بشوية طيارة هليكوبتر.. فهو سمع الطيارة فرفع دماغه فوق يبص عليها.. وفجأة لقى الطبق الطائر ظهر جنب قاعدة للبحرية الأمريكية.. وكان لونه نصه فضي ونصه أزرق وبيلمع من ضوء الشمس.. وفضل يبص عليه ويصوره لمدة 10 دقايق كامله.. بس كاميرته مكنش كويسة لأن برضه في 2007 مكنتش جودة التصوير زي النهارده طبعا.. أنت بقى لو شوفت طبق طاير وانت ماشي الشارع أو من بلكونة بيتكم.. إجري هات كاميرا نضيفة وصوره وخد سيلفي معاه كمان يابرنس ..

طبق طائر وهو بيبعد