التوقيت الثلاثاء، 19 مارس 2024
التوقيت 06:33 ص , بتوقيت القاهرة

ستيفن بادوك.. المليونير المجنون اللي قتل 58 واحد وإنتحر في "فيجاس"

ستيفن بادوك.. المليونير المجنون اللي قتل 58 واحد وانتحر في "فيجاس"
ستيفن بادوك.. المليونير المجنون اللي قتل 58 واحد وانتحر في "فيجاس"

ستيفن بادوك.. المليونير المجنون اللي قتل 58 واحد وانتحر في "فيجاس"


ممكن تقول عليه "ماد ماكس" العصر الحديث.. السفاح المجنون اللي عمل أكبر مذبحة دموية في الوقت الحاضر.. وقتل 58 بني آدم في حفلة بولاية لاس فيجاس الأمريكية.. عن طريق بندقية قنص من بلكونة أودته كأنه بيلعب ميدل..


ستيفن بادوك المليونير المجنون اللي قتل 58 واحد


اسمه ستيفن بادوك.. راجل أعمال ومليونير تقيل.. كان شغال محاسب زمان وبعدين طلع معاش بدري واشتغل في العقارات.. وكان معروف عنه إنه بيحب لعب القمار جدا.. اتجوز زمان وقعد 6 سنين وبعدين طلق.. عنده أخ واحد اسمه إيريك.. ولما ستيفن عمل المصيبة الأخيرة بتاعته دي كان عمره 64 سنة..


هو وحبيبته


كان عايش في بيت في منطقة اسمها ميسكيت.. بينها وبين لاس فيجاس 130 كيلو متر.. وكان عنده بيت تاني في مدينة اسمها رينو بولاية نيفادا الأمريكية.. كان مرتبط بواحدة فلبينية اسمها ماريلو دانلي عندها 62 سنة.. وكانت صديقته لحد وقت الحادثة.. وبينجامين أبو بادوك كان حرامي بنوك.. وكان محطوط على قايمة المطلوبين في "الإف بي آي".. لأ وكمان كان عنده مشاكل نفسية ونزعات انتحارية زي ما الدكاترة قالوا..


صاحبته الفلبينية


من الحاجات الطريفة عن ستيفن إنه في سنة 2012 رفع قضية على فندق "كوزموبوليتان" في لاس فيجاس.. ليه؟ عشان وقع في الحمام على الأرض بسبب تسرب مياه.. لكن طبعا القضية اترفضت..


أخوه إيريك بادوك


قبل 3 أيام من المذبحة المهببة اللي عملها.. ستيفن بادوك نقل إقامته في فندق اسمه "مندلاي باي".. كعادته إنه ينقل كل شوية فندق شكل.. وكانت أودته في الدور الـ32 .. وشرطة لاس فيجاس قالت إن العمال في الفندق دخلوا أودة بادوك قبل العملية بساعات ومخدوش بالهم من أي حاجة غريبة.. رغم إنه ساعة تنفيذ الهجوم كان معاه 23 سلاح آلي متنوع..


أوضته اللي نفذ منها الهجوم والأسلحة باينة


الراجل ده حير الناس بسبب المذبحة اللي عملها وقتله لـ58 واحد في حفل موسيقى عادي في فيجاس المدينة اللي مش بتنام.. محدش عارف عملها ليه والدافع بتاعه ونفذها إزاي اصلا.. والأمن استبعد إنه كان داعشي.. ومكتب التحقيقات الفيدرالي قال إنه عمل العملية دي لوحده من غير مساعدة حد.. غير إنه مالوش سجل إجرامي.. وصديقته كمان في التحقيقات قالت إنه راجل عاطفي ورقيق وطيب وكده وبتاع.. عشان كده لحد دلوقتي السبب مجهول..


الأوضة اتقفلت طبعا عشان التحقيقات والسلاح الرئيسي باين


الغريب إن ستيفن بادوك قبل الحادثة بشهر تقريبا بعت جهاز يساعد أمه العجوزة اللي عندها 90 سنة علي المشي.. اللي قالت إنها اتصدمت في ابنها بعد عملته السودة..


لو عجبك الموضوع ده وعاوز تقرا مواضيع زيه أو أحسن خش هنا


قط بلدي


سي إم بانك.. "معدي الناس" بشهرته.. ومدي الـ"WWE" على قفاه