إعرف حظك اليوم وتوقعات الأبراج معانا كل يوم وياريت متاخدش الكلام على صدرك..ف الأول والأخر انتا اللي بتعمل حظك اليوم وكل يوم بتصرفاتك ف الحياة ومينفعش حد يقولك هتبقى مبسوط النهاردة أو لأ إلا انتا..إنتا بس اللي تقدر تحدد دة اليوم وكل يوم..متنساش دة..صباحك فل وسعادة..

  : كلام جد

شيئ خطر انك تبقى مبسوط ف وسط ناس مش مبسوطة.

عشان تعرف حظك بشكل كامل .. صفي نيتك ودوس على اسم برجك بإيدك اليمين.

إعرف حظك اليوم برج الحمل الجمعة 27/10/2017 مع عبدالله أحمد..

الحمل: من 21 مارس إلى 19 ابريل

برج الحمل عاطفياً

( الكراش والإكس والبوي فريند والجيرل فريند والجوز والزوجة والقرايب ):

يوم مناسب عشان تحتفل فيه بمشاعرك مع الشخص اللي بتحبه..طبعا لو مفيش حد مش هتقعد كدة حاطط ايدك على خدك بتشتكي انه مفيش حد بيحبك..احتفل بنفسك وبحبك لنفسك عادي خالص ومن حقك..

برج الحمل عملياً

( الشغل والمذاكرة والتخطيط لبكرة ):

زقططة وفرفشة وإنبساط وإحتفال مكثف ياريت النهاردة وفكك من اي حاجة ومن اي حد..

برج الحمل صحياً

( نفسيا وجسمانيا وكل مايخص طاسة المزاج ):

المزيكا والنوم النهاردة هيتصدروا المشهد..حاول متضيعش اليوم كله ف النوم ياريت وروق كدة واعمل حفلة لنفسك وعشان نفسك وبينك وبين نفسك..

إعرف توافق برج الحمل مع باقي الأبراج النهاردة:

متوافق مع الابراج الفرفوشية

إعرف حظك اليوم برج الثور الجمعة 27/10/2017 مع عبدالله أحمد..

الثور : من 20 ابريل إلى 20 مايو

برج الثور عاطفياً

( الكراش والإكس والبوي فريند والجيرل فريند والجوز والزوجة والقرايب ):

حاول متفسدش فرصك ف الحياة على قد ماتقدر النهاردة ومتتعصبش ياريت ومتبقاش قفيل وخلي صدرك كدة واسع ومتقبل للحياة وللكلام..ثم ايه ممكن يحصل يعني تفتكر..دة مجرد كلام بتسمعه ومتعلقش عليه وخلاص..

برج الثور عملياً

( الشغل والمذاكرة والتخطيط لبكرة ): 

طول مانتا متحكم ف اعصابك النهاردة كل ماهتحقق كل اللي نفسك فيه..خد بالك بس عشان في حد انتا فاكره صاحبك وهو قريب منك وجايز بيحبك وانتا متعرفش..ماه وطبعا هتعرف ازاي لما انتا مشغول بالخناق مع العالم ومع نفسك طول الوقت..

برج الثور صحياً 

( نفسيا وجسمانيا وكل مايخص طاسة المزاج ):

حاول تشرب سوبيا النهاردة مع حد لطيف..وتعالى على نفسك وإعزمه معلش..

إعرف توافق برج الثور مع باقي الأبراج النهاردة:

متوافق مع الابراج النارية والسوبيائية

إعرف حظك اليوم برج الجوزاء الجمعة 27/10/2017 مع عبدالله أحمد..

الجوزاء: من 21 مايو إلى 20 يونيو

برج الجوزاء عاطفياً 

( الكراش والإكس والبوي فريند والجيرل فريند والجوز والزوجة والقرايب ):

انتا ف مرحلة بتتقبل فيها ان العالم شبهك جدا ومتناقض زيك بالظبط برضة..حاول تسترخي وتهدا وتتقبل الحقيقة دي بصدر رحب النهاردة ياريت..

برج الجوزاء عملياً 

( الشغل والمذاكرة والتخطيط لبكرة ):

النص الطيب محتاج يكلم النص المجرم النهاردة حبة..حاول تشوفهم عاوزين ايه وتسمعلهم النهاردة حبة لأنه واضح انه كل فترة هتحتاج تعمل كدة من هنا ورايح عشان تستريح نفسيا وتتقبل حقيقة انك متناقض زينا كلنا وان دي مش حاجة عيب ولا عجيبة ولا مؤذية ولا حاجة..من حق اي حد يعمل اللي يريحه..اي حد..

برج الجوزاء صحياً 

( نفسيا وجسمانيا وكل مايخص طاسة المزاج ):

محتاج تاكل رمان على قد ماتقدر النهاردة..اغتنم فرصة انه رخيص وملقح ف كل حتة النهاردة واعمل حفلة ودلع نفسك..خلي بالك ان البتاع الابيض الي بيبقى جواه دة بيتاكل وطعمه مزز ومفيد جدا على فكرة..وإعمله عصير برضة وماسكات لبشرتك عادي خالص..دة حقك..

تعرف على توافق برج الجوزاء مع باقي الأبراج النهاردة:

متوافق مع الابراج الترابية والنارية

إعرف حظك اليوم برج السرطان الجمعة 27/10/2017 مع عبدالله أحمد..

السرطان: من 21 يونيو إلى 22 يوليو

برج السرطان عاطفياً 

( الكراش والإكس والبوي فريند والجيرل فريند والجوز والزوجة والقرايب ):

في هفهفة عاطفة ف الاجواء طايرة حواليك النهاردة..خد بالك بقى ومتنزلش من البيت الا وانتا شيك ومتسرح يمكن تتحب ولا حاجة محدش عارف..

برج السرطان عملياً 

( الشغل والمذاكرة والتخطيط لبكرة ):

فكك من احساس الشفقة ع النفس دة عشان معادش بياكل مع اي حد..الكل حاسس انه ضحية ومظلوم..مش انتا بس..

برج السرطان صحياً 

(نفسيا وجسمانيا وكل مايخص طاسة المزاج ):

صحتك محتاجة اهتمام ومحتاجة تراعي الجو حبة وخصوصا بالليل..كمان النفسية طاستها مش معدولة ولا مظبوطة وواضح انك مش بتاكل على مزاجك بشكل كبير..حاول تهتم اكتر من كدة..بلاش اهمال انتا مهم لناس كتير ولنفسك المفروض..ولا ايه؟..

تعرف على توافق برج السرطان مع باقي الأبراج النهاردة:

متوافق مع الابراج الغازية والبرمائية

إعرف حظك اليوم برج الأسد الجمعة 27/10/2017 مع عبدالله أحمد..

الأسد: من 23 يوليو إلى 22 اغسطس

برج الأسد عاطفياً 

( الكراش والإكس والبوي فريند والجيرل فريند والجوز والزوجة والقرايب ):

مساحات من الجفاف العاطفي مابينك وبين الشخص اللي بتحبه او انك مجرد حاسس بالقشف النفسي دة عشان مبتاكلش كويس ومبتدلعش نفسك كفاية..حاول متستكبرش على الحياة عشان هي فعلا ملهاش كبير..خليك بسيط وشارك الناس البسيطة انبساطها ببساطة وبس..دة ميقلش لا منك ولا من قيمتك..بالعكس..هيخليك فرفوش وقريب ودة اكيد هيديك فرصة تبقى محبوب بشكل اكبر..دة طبعا لو ليك مزاج تتحب اساسا..لو ملكش مزاج ف انتا حر..انتا حر..

برج الأسد عملياً 

( الشغل والمذاكرة والتخطيط لبكرة ):

متتعصبش النهاردة على اي حاجة مهما كانت مستاهلة او مش مستاهلة..الاصرار والمقاوحة ف الغلط هتوديك ف سكة نفسية كلها مزحلقة ومش هتعرف توقف النتايج اللي ممكن تحصل وتفاجئك بدون اي داعي..ف على ايه يا برنس..بلاش عصبية وخلاص..

برج الأسد صحياً 

( نفسيا وجسمانيا وكل مايخص طاسة المزاج ):

صحتك كويسة وفل الفل..محتاج بس تخلي بالك من صدرك ومن جيوبك الانفية..مش عشان الجو فيه تراب وبس..انما عشان في ميكروبات برد معششة ف ناس كتير حواليك ولسة بيبوسوا ويحضنوا ويسلموا عادي جدا..

تعرف على توافق برج الأسد مع باقي الأبراج النهاردة:

متوافق مع الابراج المائية والترابية والحلزونية

إعرف حظك اليوم برج العذراء الجمعة 27/10/2017 مع عبدالله أحمد..

العذراء: من 23 اغسطس إلى 22 سبتمبر

برج العذراء عاطفياً 

( الكراش والإكس والبوي فريند والجيرل فريند والجوز والزوجة والقرايب ):

طقسك النهاردة فرفوش ومائل للحرارة والحرارة دي هتحسها ف شكل حمى خفيفة جدا النهاردة عشان طاقتك زايدة وانتا مبتعملش بيها اي حاجة وموفرها تقريبا لحاجة غامضة..الحل بسيط جدا..إتحرك وبادر وابتدي..متستناش كل حاجة تجيلك لحد عندك..خد حقك من الحياة ببساطة..

برج العذراء عملياً 

( الشغل والمذاكرة والتخطيط لبكرة ):

افكار سيكوباتية كتيرة بتلعب ف دماغك النهاردة..متمشيش وراها وتجنب الخناق تماما وياريت تفضي طاقتك الزيادة ف مكانها الصحيح..إلعب جيمز مثلا ولا انزل اجري ولا اعمل اي حاجة..

برج العذراء صحياً 

( نفسيا وجسمانيا وكل مايخص طاسة المزاج ):

السمك النهاردة هيلعب لعبته ف نفسيتك لو اتجهت ناحيته..هيبقى سبب انبساط خصوصا لو اكلت سمكة فرحانة بنفسها زي التونة كدة او ماشابه..بلاش السمك اللي تحسه مبوز علاطول دة..انتا مش ناقص لا بوز ولا نكد..

تعرف على توافق برج العذراء مع باقي الأبراج النهاردة:

متوافق مع الابراج الحلزونية والهوائية زي إمبارح..

إعرف حظك اليوم برج الميزان الجمعة 27/10/2017 مع عبدالله أحمد..

الميزان : من 23 سبتمبر إلى 22 اكتوبر

برج الميزان عاطفياً 

( الكراش والإكس والبوي فريند والجيرل فريند والجوز والزوجة والقرايب ):

واضح انك هتعمل حاجة النهاردة كل الناس ممكن تحسبها على انها مصيبة بس انتا هتبقى باصصلها على انها حاجة عادية جدا ومن حقك..وبصراحة شديدة وبعيدا عن اي هزار او مبالغة..من حقك تعمل اللي انتا شايفه صح وبس ف الحياة..طالما انتا اللي هتتحمل النتايج لوحدك ف الاخر يبقى براحتك..ثم انتا مناخيرك جميلة النهاردة ومن حقك تعمل اي حاجة نفسك فيها..براحتك..

برج الميزان عملياً 

( الشغل والمذاكرة والتخطيط لبكرة ):

جواك غضب كتير مكتوم من الناس والحياة..حاول النهاردة تتجنب اي حد من الناس اللي بيحلالها لما تشوف تفتح ف الشكوى والحزن..الناس دي مبتحبكش..مبتحبش تشوفك مبسوط..ابعد عنهم..

برج الميزان صحياً 

( نفسيا وجسمانيا وكل مايخص طاسة المزاج ):

متحيرش نفسك..انتا من حقك تنبسط ومن حقك تروق على حالك وتظبط طاسة مزاجك بالطريقة اللي تريحك وميكونش فيها خساير على المستوى الصحي او النفسي وبس..الوقت مش مهم..الحياة والانبساط اهم..الوقت مش مهم..إفتكر دة كويس ومتحسسش نفسك بالذنب بدون داعي..

تعرف على توافق برج الميزان مع باقي الأبراج النهاردة:

متوافق مع الابراج النارية والهوائية

إعرف حظك اليوم برج العقرب الجمعة 27/10/2017 مع عبدالله أحمد..

العقرب: من 23اكتوبر إلى 21 نوفمبر

برج العقرب عاطفياً 

( الكراش والإكس والبوي فريند والجيرل فريند والجوز والزوجة والقرايب ):

محتاج تتدلع وتتهنن وتسمع كلام حلو صافي وجميل..مش شرط كلام حب قد ماهو يكون كلام من القلب بنية صافية مفيهاش اي شوائب من الحياة او المصالح..مش أكتر..مجرد كلام حلو برئ..

برج العقرب عملياً 

( الشغل والمذاكرة والتخطيط لبكرة ):

اليوم مناسب جدا للتخطيط العملي المتجاوز للزمن..تقدر تتخيل وتحلم وتقرر النهاردة ف اتجاهات كتير جدا..حاول بس متنساش تنبسط النهاردة وتتحرك حبة..بلاش قعدة ف مكان واحد كتير..

برج العقرب صحياً 

( نفسيا وجسمانيا وكل مايخص طاسة المزاج ):

الغدا النهاردة لازم يكون على مزاجك..متقبلش بأي حاجة وخلاص..مهم تاكل على مزاجك النهاردة..خاول بس متفرطش ف الشطة والفلفل الاخضر ف الاكل..حسك الناري دة مش كويس اليومين دول..ثم انتا محتاج النار دي ف ايه بالظبط..انتا مش تنين سيادتك ولا بتطير ولا بتبخ نار..

تعرف على توافق برج العقرب مع باقي الأبراج النهاردة:

متوافق مع الابراج الترابية والمائية

إعرف حظك اليوم برج القوس الجمعة 27/10/2017 مع عبدالله أحمد..

القوس: من 22 نوفمبر إلى 21 ديسمبر

برج القوس عاطفياً 

( الكراش والإكس والبوي فريند والجيرل فريند والجوز والزوجة والقرايب ):

مؤثر النهاردة ماشاء الله على ناس كتير وصوتك مسموع ولبق وشيك..خد بالك عشان لو فرحت بالموضوع دة بزيادة هتلاقي نتايج عكسية عن المتوقع..خليك ف الهادي وف العادي كدة ومتبادرش بأي تصرف النهاردة..أسترخي كدة واتفرج وبس..وهتلاقي كل حاجة ماشية ف مصلحتك متقلقش..اتقل بس وسيب كل حاجة تاخد مجراها ووقتها..

برج القوس عملياً 

( الشغل والمذاكرة والتخطيط لبكرة ):

خيالك اكتيف النهاردة وشغال بزيادة..خد بالك من الموضوع دة ومتسرحش معاه زيادة عن اللزوم عشان ممكن يحدف ف مناطق سودة كتير جدا تحسسك ان العالم ضدك بدون اي داعي..

برج القوس صحياً 

( نفسيا وجسمانيا وكل مايخص طاسة المزاج ):

الصواني والمحاشي والفراخ والبط بيناديك يامعلم..حاول متغرقش ف الاكل اوي النهاردة وابعد عن البصل والتوم احتياطي يمكن تتباس ولا حاجة..

تعرف على توافق برج القوس مع باقي الأبراج النهاردة:

متوافق مع الابراج البرمائية واللولبية

إعرف حظك اليوم برج الجدي الجمعة 27/10/2017 مع عبدالله أحمد..

الجدى: من 22 ديسمبر إلى 19 يناير

برج الجدي عاطفياً 

( الكراش والإكس والبوي فريند والجيرل فريند والجوز والزوجة والقرايب ):

خليك رايق كدة وواثق من نفسك وهتلاقي كل حاجة حلوة بتحصلك..اما طول مانتا عامل قلق ومش راكز كدة وثابت ولا على حامي ولا على بارد ف كل اللي هيحصل ان الحياة هتتجنب تتعامل معاك بثقة..الحب عاوز ثقة..مش وش خشب..في فرق كبير بين الحاجتين اعتقد انتا عارفه كويس..

برج الجدي عملياً 

( الشغل والمذاكرة والتخطيط لبكرة ):

محتاج تخرج حبة من حالة التجمد اللي منملة احاسيسك النهاردة..كمان انتا لازم تتحرك حبة النهاردة..ومهم تنقي هتتحرك فيه وليه ومع مين..اليوم اجازة ومن حقك تعمل فيه اي حاجة تعجبك..ابعد بس عن التنضيف وغسيل المواعين وشغل البيت دة خالص الا لو ضروري وساعتها كل انشطته تتعمل على انغام واغاني حسن الاسمر..المود النهاردة لازم يبقى مزقطط..دافع عن حقك وانبسط..

برج الجدي صحياً 

( نفسيا وجسمانيا وكل مايخص طاسة المزاج ):

لو ملقيتش حاجة تعملها فعلا ف دايما تقدر تركن ع القهوة مع اصحابك بالليل حبة..حاولوا بس متتخانقوش على اي حاجة تافهة وحاول متغشش ف الطاولة..عيب..

تعرف على توافق برج الجدي مع باقي الأبراج النهاردة:

متوافق مع الابراج النارية والفنكوشية

إعرف حظك اليوم برج الدلو الجمعة 27/10/2017 مع عبدالله أحمد..

الدلو: من 20 يناير إلى 18 فبراير

برج الدلو عاطفياً 

( الكراش والإكس والبوي فريند والجيرل فريند والجوز والزوجة والقرايب ):

فترة النشاط كلها دايما عندك بتبقى بالليل.. نظم وقتك بحيث تبقى حاضر الليلة مش نص نايم وبتتقلب ف السرير بتحاول تنام وتهرب من كل حاجة مضايقاك..كمان ركز وخد بالك.. كل الدوشة اللي حواليك مسيرها تاخد وقتها وتخلص وتلاقي كل حاجة بتظلط وبتاخد وضعها الطبيعي وقيمتها الحقيقية ف حياتك..ادي نفسك وقت كافي بس..

برج الدلو عملياً 

( الشغل والمذاكرة والتخطيط لبكرة ):

متشغلش بالك بالتخطيط لكل تفصيلة ف دماغك الاول قبل ماتعملها..مش لازم تهندس ف خطط عشان تنجح..ابدا..انتا محتاج بس تسيب نفسك وتنطلق مش اكتر..محتاج تبتدي وكل حاجة هتمشي زي الحلاوة بمجرد ما تتخطى مرحلة البداية..مش أكتر..حاول متخوفش نفسك..حاول تتفهم انك معدتش صغير وان الهروب معادش حل لأي مشكلة بتقابلك..اوقات لازم تواجه بواخة العالم دة ولو بإبتسامة..ولو بإبتسامة..

برج الدلو صحياً 

( نفسيا وجسمانيا وكل مايخص طاسة المزاج ):

واضح انك جاد ف الاهتمام بصحتك او انك بتمثل الدور دة ببراعة..ف الحالتين خلينا نفترض النية الكويسة وانك فعلا عاوز تبقى افضل وكويس وتحل كل مشاكلك الصحية المعلقة منها والمؤقتة..اختار تاكل اكل نضيف واختار تاكل كميات معقولة واختار تنبسط..مجرد اختار بس..دة حقك على فكرة ف الحياة..

تعرف على توافق برج الدلو مع باقي الأبراج النهاردة:

متوافق مع الابراج الحنجورية والبرمائية

إعرف حظك اليوم برج الحوت الجمعة 27/10/2017 مع عبدالله أحمد..

الحوت: من 19 فبراير إلى 20 مارس

برج الحوت عاطفياً 

( الكراش والإكس والبوي فريند والجيرل فريند والجوز والزوجة والقرايب ):

عاطفيا انتا النهاردة ف فترة الميزان الحساس..بمعنى انك محتاج تاخد بالك من كل كلمة وكل حرف وكل بصة وانتا بتتعامل مع الطرف الاخر اللي يبدو عليك انك بتحبه بجد وصابر على رخامته بقالك كتير..معلش..خليك انتا الكويس النهاردة واتعامل معاه بحرص وحاول تفهمه بنفس المقدار اللي بتحبه بيه..لو عاملك وحش متخاصموش..اصبر عليه حبة بس لحد مانشوف هو قافش ليه وبعد كدة هنتصرف متقلقش..

برج الحوت عملياً 

( الشغل والمذاكرة والتخطيط لبكرة ):

محتاج تنام حبة ف نص اليوم وتقوم بتضحك على الولا حاجة..النهاردة يوم حظك فيه ماشي وبيلعب وبيتنطط خصوصا وان طاقتك ماشاء الله كويسة والبطارية واضح انها مشحونة..تقدر تخرج وتتفسح وتتمشى ف اي حتة تعجبك حتى لو كانت صحرا..المهم متخرجش مع اي حد نكد النهاردة ياريت..ركز ف اللي بيحبوك بشكل صافي واللي يهمهم فعلا من جواهم انك تبقى مبسوط..مش بتمثل انك مبسوط عشان تريحهم وبس..

برج الحوت صحياً 

( نفسيا وجسمانيا وكل مايخص طاسة المزاج ):

اليوم اجازة ودة معناه انك تقدر تاكل براحتك وتنام براحتك وتتفرج عى افلام وتسمع مزيكا برضة براحة راحتك..ياريت متركنش كل الحاجات الحلوة دي وتقعد تعد ف احزانك..بلاش..كمان خد بالك عشان احتمال حد حلو يقولك حاجة حلوة النهاردة..إستعد..

تعرف على توافق برج الحوت مع باقي الأبراج النهاردة:

متوافق مع الابراج الهوائية والفنكوشية..