إعرف حظك اليوم وتوقعات الأبراج معانا كل يوم وياريت متاخدش الكلام على صدرك..ف الأول والأخر انتا اللي بتعمل حظك اليوم وكل يوم بتصرفاتك ف الحياة ومينفعش حد يقولك هتبقى مبسوط النهاردة أو لأ إلا انتا..إنتا بس اللي تقدر تحدد دة اليوم وكل يوم..متنساش دة..صباحك فل وسعادة..

  : كلام جد

وراء كل رجل عظيم إمرأة بتقلبه ف فلوس بطريقة عظيمة.

عشان تعرف حظك بشكل كامل .. صفي نيتك ودوس على اسم برجك بإيدك اليمين.

إعرف حظك اليوم برج الحمل بالتفصيل الخميس 14/12/2017 مع عبدالله أحمد..

الحمل: من 21 مارس إلى 19 ابريل

برج الحمل عاطفياً

( الكراش والإكس والبوي فريند والجيرل فريند والجوز والزوجة والقرايب ):

يوم جميل ومنعش ومناسب جدا عشان تكمل ركنة قلبك وطناشك على نداءته المتكررة ف سبيل الراحة من الحب..براحتك..حياتك وقلبك وانتا حر فيهم..

برج الحمل عملياً

( الشغل والمذاكرة والتخطيط لبكرة ):

هتاخد شوية قرارات راديكالية النهاردة كويسة وماشي حالها وممكن تفرق ف حياتك ومستقبلك..قشطة عليك..

برج الحمل صحياً

( نفسيا وجسمانيا وكل مايخص طاسة المزاج ):

صحتك تمام وف حالة تآلق مرحلي ماشاء الله..حاول تستخدم قوتك وطاقتك دي ف الخير ومتهددش اي حد مش عاوز يذاكر او مش عارف يذاكر..

إعرف توافق برج الحمل مع باقي الأبراج النهاردة:

متوافق مع الابراج البسبوسية والمرمرية والكتكوتية..

إعرف حظك اليوم برج الثور بالتفصيل الخميس 14/12/2017 مع عبدالله أحمد..

الثور : من 20 ابريل إلى 20 مايو

برج الثور عاطفياً

( الكراش والإكس والبوي فريند والجيرل فريند والجوز والزوجة والقرايب ):

طول مانتا متحكم ف اعصابك النهاردة بشكل قوي كل ما تحقق كل اللي نفسك فيه اوي اوي..

برج الثور عملياً

( الشغل والمذاكرة والتخطيط لبكرة ): 

انسى جراحك العاطفية حبة وحاول تركز ف انك تنجح ويبقى معاك فلوس كتير تحبك وتحبها..

برج الثور صحياً 

( نفسيا وجسمانيا وكل مايخص طاسة المزاج ):

صحتك كويسة بس لسة في ميل للشحتفة الليلية حبة..حاول تشغل وقت الليل ف الفرفشة والراحة مش ف التفكير ف اللي مبيفكرش فيك..

إعرف توافق برج الثور مع باقي الأبراج النهاردة:

متوافق مع الابراج البسكوتية والحربائية والهوائية..

إعرف حظك اليوم برج الجوزاء بالتفصيل الخميس 14/12/2017 مع عبدالله أحمد..

الجوزاء: من 21 مايو إلى 20 يونيو

برج الجوزاء عاطفياً 

( الكراش والإكس والبوي فريند والجيرل فريند والجوز والزوجة والقرايب ):

واضح ان في عندك باور جامد اوي النهاردة.. خير ان شاء الله..حاول توظف الباور دة ف الحاجات اللي تنفع واللي منها امل وتفكك من الحاجات اللي ممنهاش رجا..

برج الجوزاء عملياً 

( الشغل والمذاكرة والتخطيط لبكرة ):

قدامك اختيارات عاقلة كتير النهاردة هتسيبها وتروح للاختيارات المجنونة عشان شكلها حلو مش اكتر..

برج الجوزاء صحياً 

( نفسيا وجسمانيا وكل مايخص طاسة المزاج ):

صحتك كيرفها طالع وكويسة ودي حاجة تخوفك خصوصا وانك ف الاغلب بتستخدم الصحة دي ف الحاجات البطالة وترجع تندم..

تعرف على توافق برج الجوزاء مع باقي الأبراج النهاردة:

متوافق مع الابراج الحنتوسية والكتكوتية والترابية والمستحية..

إعرف حظك اليوم برج السرطان بالتفصيل الخميس 14/12/2017 مع عبدالله أحمد..

السرطان: من 21 يونيو إلى 22 يوليو

برج السرطان عاطفياً 

( الكراش والإكس والبوي فريند والجيرل فريند والجوز والزوجة والقرايب ):

هتلاقي اسباب كتير للإنبساط النهاردة ف اركان وارجاء حياتك..دور كويس انتا بس ومتزهقش ابدا من البحث لحد ما تلاقيها..

برج السرطان عملياً 

( الشغل والمذاكرة والتخطيط لبكرة ):

صحتك تمام بس ممكن تبقى احسن لو ركزت ف الحاجات اللي تنفعك وطنشت على الحاجات اللي بتضرك وانتا عارف انها بتضرك..

برج السرطان صحياً 

(نفسيا وجسمانيا وكل مايخص طاسة المزاج ):

اليوم مناسب لسندوتش التونة العظيم اللي فيه بصل وطماطم وبطاطس وتونة ولحسة توم وبهارات..

تعرف على توافق برج السرطان مع باقي الأبراج النهاردة:

متوافق مع الابراج الحلبسية والنارية والمائية والبرمائية..

إعرف حظك اليوم برج الأسد بالتفصيل الخميس 14/12/2017 مع عبدالله أحمد..

الأسد: من 23 يوليو إلى 22 اغسطس

برج الأسد عاطفياً 

( الكراش والإكس والبوي فريند والجيرل فريند والجوز والزوجة والقرايب ):

اليوم مناسب عشان تكمل مشروع قديم كنت متحمسله وراكنه ع الرف ف حياتك لحد ماتفضاله وتفوقله..جايز يكون مشروع عاطفي او مشروع عملي..شوف كدة واتصرف صح..

برج الأسد عملياً 

( الشغل والمذاكرة والتخطيط لبكرة ):

محتاج تسمع تشجيع وكلام حلو عن نفسك وعن حياتك وعن مستقبلك..ودة حقك على فكرة مش حاجة تافهة ابدا..كلمة منعشة او حلوة كويسة ممكن تفرق ف الحياة كلها..

برج الأسد صحياً 

( نفسيا وجسمانيا وكل مايخص طاسة المزاج ):

محتاج تشجيع ودلع كتير..كمان محتاج تتحرك بشكل اكبر من كدة ومتغلش ف روحك كتير بالليل..بلاش..

تعرف على توافق برج الأسد مع باقي الأبراج النهاردة:

متوافق مع الابراج البطوطية والباراكودية والنارية..

إعرف حظك اليوم برج العذراء بالتفصيل الخميس 14/12/2017 مع عبدالله أحمد..

العذراء: من 23 اغسطس إلى 22 سبتمبر

برج العذراء عاطفياً 

( الكراش والإكس والبوي فريند والجيرل فريند والجوز والزوجة والقرايب ):

محدش يقدر يقرب لبرستيجك متقلقش..ف متحاولش تأكد على المساحة اللي بينك وبين الناس طول الوقت بشكل فورمال ورسمي منشي بنشا عشان متخسرهمش..ثم مسيرك هتحتاجهم قريب..خد بالك..

برج العذراء عملياً 

( الشغل والمذاكرة والتخطيط لبكرة ):

حاول تهتم برموشك النهاردة عشان تقاوم العكوسات بشكل كويس وتعكسها ف وش اللي بيحدفوها عليك وف اتجاهك طول الوقت عشان غيرانين منك ومن جمالك وهدوءك..

برج العذراء صحياً 

( نفسيا وجسمانيا وكل مايخص طاسة المزاج ):

صحتك كويسة وتمام طول مانتا بعيد عن الهم والحزن والناس ذات الهم والحزن والشكاوي الدرامية المعدنية والبلاستيكية على حدا سواء..

تعرف على توافق برج العذراء مع باقي الأبراج النهاردة:

متوافق مع الابراج البرطمانية والبرمائية والنارية..

إعرف حظك اليوم برج الميزان بالتفصيل الخميس 14/12/2017 مع عبدالله أحمد..

الميزان : من 23 سبتمبر إلى 22 اكتوبر

برج الميزان عاطفياً 

( الكراش والإكس والبوي فريند والجيرل فريند والجوز والزوجة والقرايب ):

متخافش تبين مشاعرك الحقيقية ابدا وثق ان دي حاجة ممكن تميزك عن باقي البشر لو عملتها صح وكويس وحافظت على نقائها..ف نفس الوقت راعي مشاعر الناس حبة وانتا بتبعد او بتقطم او بتقول مش هاكمل ومش مستريح..راعي الناس عشان الناس برضة تراعيك وتراعي مشاعرك..

برج الميزان عملياً 

( الشغل والمذاكرة والتخطيط لبكرة ):

متخافش من حد ومتخافش تقول رأيك بصراحة النهاردة..دي كلها ناس تايهة ف الحياة زيك بالظبط ومعظمهم بيدعي اليقين والعلم والخبرة عشان ميبانش انه مش عارف حاجة عن اي حاجة..

برج الميزان صحياً 

( نفسيا وجسمانيا وكل مايخص طاسة المزاج ):

ثق ف احساسك وحدسك النهاردة وامشي وراهم ومتخافش..الخوف مرض مش حلو ومش لايق عليك..

تعرف على توافق برج الميزان مع باقي الأبراج النهاردة:

متوافق مع الابراج الدرامية والمستحية والكهربائية..

إعرف حظك اليوم برج العقرب بالتفصيل الخميس 14/12/2017 مع عبدالله أحمد..

العقرب: من 23اكتوبر إلى 21 نوفمبر

برج العقرب عاطفياً 

( الكراش والإكس والبوي فريند والجيرل فريند والجوز والزوجة والقرايب ):

حاول تراعي مشاعرك النهاردة ومتجبرهاش على اي حاجة هي مش عاوزة تعملها عشان متزعلش منك وتخاصمك وتعملك قلق يطلع ف صورة اوجاع غامضة ف جسمك..

برج العقرب عملياً 

( الشغل والمذاكرة والتخطيط لبكرة ):

حظك العملي ماشي حاله وكويس بس ممكن يبقى احسن لو ركزت ف اللي وراك وخلصته بضمير وامانة مش بكيد ف الناس اللي حواليك..انجح عشان نفسك وبس..مش عشان اي حد تاني..

برج العقرب صحياً 

( نفسيا وجسمانيا وكل مايخص طاسة المزاج ):

اوجاع جسمك جاية ف الاساس من اوجاع انتا مطنش عليها ف مشاعرك..خد بالك من الموضوع دة كويس وحاول تروق على مشاعرك حبة عشان خاطر صحتك..

تعرف على توافق برج العقرب مع باقي الأبراج النهاردة:

متوافق مع الابراج الغجرية والبربرية والنارية..

إعرف حظك اليوم برج القوس بالتفصيل الخميس 14/12/2017 مع عبدالله أحمد..

القوس: من 22 نوفمبر إلى 21 ديسمبر

برج القوس عاطفياً 

( الكراش والإكس والبوي فريند والجيرل فريند والجوز والزوجة والقرايب ):

ابعد عن السياسة الخارجية ف حياتك وقرب وانشغل بسياستك الداخلية وبس النهاردة احسن وافيد وابرك من اي حاجة..

برج القوس عملياً 

( الشغل والمذاكرة والتخطيط لبكرة ):

اليوم مناسب لإنك تقعد النهاردة متعملش اي حاجة من اي نوع ودي حاجة كويسة بالنسبالك مش وحشة لأنك محتاج تريح حبة حلوين.. ومحتاج تدرك ان الايام جاية كتير وياما هتعمل حاجات كتير جدا متقلقش..

برج القوس صحياً 

( نفسيا وجسمانيا وكل مايخص طاسة المزاج ):

محتاج راحة واستجمام عشان خلاياك تريح وميكروباتك تاخد اجازة برضة..دة حقها عليك..

تعرف على توافق برج القوس مع باقي الأبراج النهاردة:

متوافق مع الابراج الفركتوزية والبربوشية والهوائية..

إعرف حظك اليوم برج الجدي بالتفصيل الخميس 14/12/2017 مع عبدالله أحمد..

الجدى: من 22 ديسمبر إلى 19 يناير

برج الجدي عاطفياً 

( الكراش والإكس والبوي فريند والجيرل فريند والجوز والزوجة والقرايب ):

اليوم مناسب لحبة لعب ودلع بس مش اكتر واللعب دة ممكن يكون ف اشكال كتير منها الحب او المذاكرة او الشغل..لأنك تقدر تحب اي حاجة من دول وانتا بتعملها بإستثناء المذاكرة اللي انتا مش مضطر اوي تحبها قد مانتا محتاج تبان بتحبها لحد ما تخلصها بس وتعدي وتنجح وبعد كدة تقدر تقعد معاها وتقولها انتي تستاهلي واحد احسن مني..

برج الجدي عملياً 

( الشغل والمذاكرة والتخطيط لبكرة ):

من حقك تلعب ومن حقك تحب ومن حقك تتدلع ومتعملش اي حاجة النهاردة..بس خد بالك انه اللعب والحب والدلع ليهم تمن ف الحياة دي..مفيش حاجة ببلاش للأسف..مفيش

برج الجدي صحياً 

( نفسيا وجسمانيا وكل مايخص طاسة المزاج ):

مرهق ومستهلك ودماغك مشتتة عشان مش عارف تنظم وقتك ووقت نومك وبتهمل ف الاكل اوقات بشكل جسيم.. حاول تنظم وقتك احسن من كدة حب لحد الفترة دي ماتعدي على خير..

تعرف على توافق برج الجدي مع باقي الأبراج النهاردة:

متوافق مع الابراج المرمرية والحنكوشية والمائية..

إعرف حظك اليوم برج الدلو بالتفصيل الخميس 14/12/2017 مع عبدالله أحمد..

الدلو: من 20 يناير إلى 18 فبراير

برج الدلو عاطفياً 

( الكراش والإكس والبوي فريند والجيرل فريند والجوز والزوجة والقرايب ):

فترة نشاطك العاطفي والعملي والنفسي كلها بالليل النهاردة عشان كدة مهم تنام بالنهار وتصحى بالليل تغتنم الفرصة من أولها صح الصح..

برج الدلو عملياً 

( الشغل والمذاكرة والتخطيط لبكرة ):

متألق بس مش مبسوط..جايز عشان انتا عارف انك تقدر تعمل احسن من كدة بمراحل ف الحياة بس مفيش فرصة والضغوط بتكتر مش بتقل والغباء عمال ينتشر حواليك..معلش..شوية صبر وحماس وكل حاجة هتظبط مع الوقت..نتمنى يعني دة يحصل..

برج الدلو صحياً 

( نفسيا وجسمانيا وكل مايخص طاسة المزاج ):

واضح انك محسود او معمولك عمل او انك ببساطة بتمر بفترة الميكروبات فيها بتحبك زيادة عن اللزوم..

تعرف على توافق برج الدلو مع باقي الأبراج النهاردة:

متوافق مع الابراج الدخانية والمستحية والفرفورية والسمسمية..

إعرف حظك اليوم برج الحوت بالتفصيل الخميس 14/12/2017 مع عبدالله أحمد..

الحوت: من 19 فبراير إلى 20 مارس

برج الحوت عاطفياً 

( الكراش والإكس والبوي فريند والجيرل فريند والجوز والزوجة والقرايب ):

دلع الطفل اللي جواك النهاردة من غير ماتنسى او تتناسى انك كبرت وانه غالبا معظم تصرفات الاطفال مش هتليق عليك خصوصا وانك فرحان معظم الوقت انك كبرت وتقدر تاخد قرارات تخصك او تسيطر بيها على مصائر ناس تانية..ف كل الاحوال حاول تنبسط من غير ماتبان متكلف او يتكشف انك بتمثل انك مبسوط عشان تكيد اللي حواليك مش أكتر..

برج الحوت عملياً 

( الشغل والمذاكرة والتخطيط لبكرة ):

طول مافي تناقض مابين كلامك ومابين افعالك هتفضل تعبان ومش مستريح لأنك مشغول دايما بصورتك المثالية عن نفسك واللي هي مش حقيقية بالمرة لأنه مفيش حد مثالي بس واضح انك بتحب حالة النصب دي او بتعرف تستفاد منها كويس..

برج الحوت صحياً 

( نفسيا وجسمانيا وكل مايخص طاسة المزاج ):

صحتك كويسة ومفيش اي داعي للقلق طالما بتاكل كويس وبتنام كويس ومبتفكرش بالليل قبل ماتنام وتقعد تعيط على اللي راح..

تعرف على توافق برج الحوت مع باقي الأبراج النهاردة:

متوافق مع الابراج البسبوسية واللولبية والتركوازية..