إعرف حظك اليوم وتوقعات الأبراج معانا كل يوم وياريت متاخدش الكلام على صدرك..ف الأول والأخر انتا اللي بتعمل حظك اليوم وكل يوم بتصرفاتك ف الحياة ومينفعش حد يقولك هتبقى مبسوط النهاردة أو لأ إلا انتا..إنتا بس اللي تقدر تحدد دة اليوم وكل يوم..متنساش دة..صباحك فل وسعادة..

  : كلام جد

مفيش كائن على كوكب الأرض بيتضايق انه مناخيره كبيرة إلا الإنسان.

عشان تعرف حظك بشكل كامل .. صفي نيتك ودوس على اسم برجك بإيدك اليمين.

إعرف حظك اليوم برج الحمل الثلاثاء 24/10/2017 مع عبدالله أحمد..

الحمل: من 21 مارس إلى 19 ابريل

برج الحمل عاطفياً

( الكراش والإكس والبوي فريند والجيرل فريند والجوز والزوجة والقرايب ):

حاول تاكل تشيز كيك بصوص الفراولة النهاردة..ولو معرفتش متعملش مشكلة وهاتلك كيلو جوافة قرقض فيه وخلاص..مش لازم تشيز ولا كيك ولا صوص فراولة.

برج الحمل عملياً

( الشغل والمذاكرة والتخطيط لبكرة ):

قدامك النهاردة يوم حلو وحاله ماشي وسالك..حاول متركزش مع تكشيرة الناس حواليك عشان فيهم اللي مقرر ميبقاش مبسوط من امبارح بالليل وصاحي النهاردة ينفذ الخطة..

برج الحمل صحياً

( نفسيا وجسمانيا وكل مايخص طاسة المزاج ):

صحتك كويسة بس إهتم بضهرك وحاول تعمل مساج النهاردة وتركز ف الاكل المفيد وخصوصا شيكولاتة الاخرين اللي مخبيينها ف التلاجة..

إعرف توافق برج الحمل مع باقي الأبراج النهاردة:

متوافق مع الابراج المعدنية والنارية..

إعرف حظك اليوم برج الثور الثلاثاء 24/10/2017 مع عبدالله أحمد..

الثور : من 20 ابريل إلى 20 مايو

برج الثور عاطفياً

( الكراش والإكس والبوي فريند والجيرل فريند والجوز والزوجة والقرايب ):

اللي يديك قفاه إنساه..وكافح الملل ف حياتك.. مش كافح الناس اللي بتساعدك على مكافحة الملل ف حياتك يا فالح يافِتكّ.

برج الثور عملياً

( الشغل والمذاكرة والتخطيط لبكرة ): 

قدامك نجاح كبير لازم تبقى قد مسئوليته وقد التعب اللازم لصنع مثل هذا النجاح..حاول بس تركز وتصفي دماغك من اي افكار او وساوس سيئة وانتا تبقى زي الفل..كمان متشغلش بالك بموضوع الفلوس..الفلوس دي اختراع الانسان اخترعه تقريبا عشان ..ينكد بيه على نفسه..العالم كان حاله ماشي كويس وزي الفل لما كان ماشي بالجمع والإلتقاط..متفهمش مين اللي قرر كدة مع نفسه يخترع إختراع الفلوس المفشكل دة..ياللا ماعلينا..ركز ف النجاح والفلاح وبس..

برج الثور صحياً 

( نفسيا وجسمانيا وكل مايخص طاسة المزاج ):

صحتك كويسة ونشيط وقابل للحب..محتاج اكتر من كدة ايه عشان تنبسط يعني..غذائيا انتا محتاج تركز ف الاكل اللي ريحته حلوة وتشدك مش اي علبة كشري مجهولة المصدر وخلاص..مهم تاكل كويس اكل نضيف..مش اكل شارع..

إعرف توافق برج الثور مع باقي الأبراج النهاردة:

متوافق مع الابراج الكتكوتية والمائية والنارية

إعرف حظك اليوم برج الجوزاء الثلاثاء 24/10/2017 مع عبدالله أحمد..

الجوزاء: من 21 مايو إلى 20 يونيو

برج الجوزاء عاطفياً 

( الكراش والإكس والبوي فريند والجيرل فريند والجوز والزوجة والقرايب ):

طول مانتا واثق انك كويس كل ماهتبقى كويس وساعتها مش هتحتاج تطمينات او تأكيدات من أي حد أيا كان يقولك ف مضمونها انك كويس.

برج الجوزاء عملياً 

( الشغل والمذاكرة والتخطيط لبكرة ):

حاول تحافظ على الحاجات اللي عندك ومتبصش للي ف ايد او ف حياة غيرك..جايز التوقيت مش مناسب..جايز المكان مش مناسب..جايز العالم كله مش مناسب..ف متشغلش بالك وتزعلها على حاجات او ناس متستاهلش..إبعد ف هدوء وبس..إبعد..

برج الجوزاء صحياً 

( نفسيا وجسمانيا وكل مايخص طاسة المزاج ):

المزاج محتاج إطلالة حلوة كدة على اي مساحة خضرا ف جنينة او ماشابه..غذائيا الوقت مناسب للمكرونة بالبشاميل وللسبانخ وللقلقاس..ولو مبتحبش الحاجات دي او ملكش مزاج تاكلها يبقى مفيش قدامك غير السميط والبيض..براحتك بقى

تعرف على توافق برج الجوزاء مع باقي الأبراج النهاردة:

متوافق مع الابراج الفنكوشية والنارية

إعرف حظك اليوم برج السرطان الثلاثاء 24/10/2017 مع عبدالله أحمد..

السرطان: من 21 يونيو إلى 22 يوليو

برج السرطان عاطفياً 

( الكراش والإكس والبوي فريند والجيرل فريند والجوز والزوجة والقرايب ):

انتظام ونجاح ف تصرفاتك ف الزمكان ونواتج منطقية وفرحة ممكن ترش روقان على كل حبشتكان..إستمتع.

برج السرطان عملياً 

( الشغل والمذاكرة والتخطيط لبكرة ):

خفة دمك هتنقذك من الإكتئاب النهاردة..إضحك وبراحتك على اي حاجة وكل حاجة..إضحك وبراحتك وبصوت عالي

برج السرطان صحياً 

(نفسيا وجسمانيا وكل مايخص طاسة المزاج ):

مزاجك هيظبط مع البيتزا النهاردة..كمان اي حاجة فيها قرفة برضة ممكن تعلي الطاسة وتظبطها جدا..

تعرف على توافق برج السرطان مع باقي الأبراج النهاردة:

متوافق مع الابراج الهوائية والبرمائية

إعرف حظك اليوم برج الأسد الثلاثاء 24/10/2017 مع عبدالله أحمد..

الأسد: من 23 يوليو إلى 22 اغسطس

برج الأسد عاطفياً 

( الكراش والإكس والبوي فريند والجيرل فريند والجوز والزوجة والقرايب ):

متتعصبش ومتتخانقش مع حد النهاردة.. خصوصا مع نفسك ضد نفسك.

برج الأسد عملياً 

( الشغل والمذاكرة والتخطيط لبكرة ):

انتا مش غريب الاطوار ولا حاجة واللي يقول عليك غريب الأطوار يبقى هو اللي غريب ف أطواره مش انتا ابدا..انتا اناني حبة بس مش أكتر..بتحتاج تسمع كلام حلو عن نفسك حتى لو فيه مبالغات كتير جدا ودة ممكن يعملك مشاكل النهاردة لو مبطلتوش يامعلم..ف خد بالك وحاول تتواضع حبة وتضحك كتير..يمكن تبطل مفعول العكوسات اللي طايرة ف الهوا حواليك دي ولا حاجة..جرب كدة..

برج الأسد صحياً 

( نفسيا وجسمانيا وكل مايخص طاسة المزاج ):

محتاج تهتم بالمناعة بشكل رئيسي..وبصدرك بشكل فرعي ثانوي وببشرتك بشكل فرعي ثانوي منبثق عن الفرعي الثانوي الاولاني..غذائيا انتا ممكن تاكل اي حاجة تعجبك..المهم تاكل ومتنساش..احساس الجوع دة احساس مش لطيف ومالوش اي لازمة..فكك من اوهام الدايت..مزاجك اهم والله..مزاجك اهم بمراحل..

تعرف على توافق برج الأسد مع باقي الأبراج النهاردة:

متوافق مع الابراج النباتية والنارية والهوائية

إعرف حظك اليوم برج العذراء الثلاثاء 24/10/2017 مع عبدالله أحمد..

العذراء: من 23 اغسطس إلى 22 سبتمبر

برج العذراء عاطفياً 

( الكراش والإكس والبوي فريند والجيرل فريند والجوز والزوجة والقرايب ):

حاول تتقل ف هدومك النفسية النهاردة خصوصا لو هتخرج بالليل عشان احتمال تكون في ف حياتك الليلة عواصف نفسية عابرة وممكن جدا تعمل سحاب يمطر احزان تملى الزمكان..ف خد بالك وابعد عن النكد والنكديين خالص النهاردة..

برج العذراء عملياً 

( الشغل والمذاكرة والتخطيط لبكرة ):

الصمت والسكوت الكتير المبالغ فيه النهاردة هتبقى انعكاساته عليك مش كويسة..مهم ترد ومهم تتكلم وتعبر عن نفسك وبراحتك..ساكت ليه اصلا؟..

برج العذراء صحياً 

( نفسيا وجسمانيا وكل مايخص طاسة المزاج ):

غذائيا انتا ممكن تروق على مزاجك بأي فاكهة لونها حلو او طبق بيض بالبسطرمة ف بداية اليوم كدة تقف تعمله لنفسك بنفسك..صحيا انتا كويس بس محتاج شوية حركة وشوية اهتمام ببشرتك..بس كدة..

تعرف على توافق برج العذراء مع باقي الأبراج النهاردة:

متوافق مع الابراج المستحية والنارية..والهوائية نص نص برضة بس مش أوي..

إعرف حظك اليوم برج الميزان الثلاثاء 24/10/2017 مع عبدالله أحمد..

الميزان : من 23 سبتمبر إلى 22 اكتوبر

برج الميزان عاطفياً 

( الكراش والإكس والبوي فريند والجيرل فريند والجوز والزوجة والقرايب ):

متقعدش ف مكان مبتحبوش النهاردة او مع ناس اتعودت تنتقد كل حاجة وكل حد.. كمان ياريت تقلل حبة من إحساسك انك ضحية لأنك مش ضحية لحد إلا لإختياراتك ف الحياة ولتقلبات مزاجك وبس..حاول تتحكم ف التقلب والشقلبة المستمرة دي بدل ماتتهم العالم انه مضطهدك يابرنس..كمان انتا محدش يعرف يضطهدك اصلا ف بلاش فطش..

برج الميزان عملياً 

( الشغل والمذاكرة والتخطيط لبكرة ):

محتاج تصحى بنشاط عالي وتطرد من دماغك اي افكار سودة وتنزل وانتا مفرفش كدة وجميل ومتشيك وتواجه الحياة بابتسامة عريضة وثقة حتى ولو تمثيل وكدة وكدة..مهم متبانش لا خايف ولا مهزوز النهاردة..مهم محدش ياخد باله اساسا انك شاكك ف روحك النهاردة..إوعى

برج الميزان صحياً 

( نفسيا وجسمانيا وكل مايخص طاسة المزاج ):

انتا مصدر بهجة لناس كتير جدا حواليك وفيهم اللي بيحبك وبيتأثر بيك وفيهم اللي معجب بحبك للحياة وفيهم اللي بيضحك على ملاحظاتك الطريفة والثاقبة وفيهم اللي بيحبك عشان انتا غلبان ف الحياة زيه ومخك مرازيك..ف كل الاحوال انتا محتاج تقدر حب الناس ليك وتعتبره مسئولية تدفعك لإنك تبقى ناجح ومبسوط..مش متداري وخايف وشايل طاجن الهم طول الوقت وعمال تلفلف بيه ف كل حتة..غذائيا انتا محتاج كاجو ولب سوري كتير ف شنطتك النهاردة..إستمتع

تعرف على توافق برج الميزان مع باقي الأبراج النهاردة:

متوافق مع الابراج الترابية والنارية

إعرف حظك اليوم برج العقرب الثلاثاء 24/10/2017 مع عبدالله أحمد..

العقرب: من 23اكتوبر إلى 21 نوفمبر

برج العقرب عاطفياً 

( الكراش والإكس والبوي فريند والجيرل فريند والجوز والزوجة والقرايب ):

متسمعش لحد..انتا عاقل مش مجنون..انتا جميل وزي الفل.. سيبك منهم دول مبيفهموش حاجة.

برج العقرب عملياً 

( الشغل والمذاكرة والتخطيط لبكرة ):

ركز النهاردة ف انك تبين للناس مميزاتك مش عيوبك..حاول تعمل دعاية حلوة ومنظمة وبسيطة للحاجات اللي بتحبها وبثق ان في غيرك ممكن يحبها معاك..وطبعا مينفعش النهاردة لا تتخانق ولا تخش ف اي نزاع او لاسمح الهل تبقى عدواني او شباط ونطاط ف كل مصلحة معدية حتى لو مستحية..مهم تبقى رايق النهاردة عشان تعكس ثقة ونجاح يمكن ترتاح..

برج العقرب صحياً 

( نفسيا وجسمانيا وكل مايخص طاسة المزاج ):

النهاردة يوم فري من الدايت وهجص الدايت..تاكل براحتك وتاكل اللي يعجبك انشاالله يكون لحمة راس او كوارع..مزاجك اهم من جنابك حضرتك واهم من كرشك..ثم المهم صحة خدودك وبس..فكك من اي اوهام تانية وابعد عنها وانبسط..تستاهل والله

تعرف على توافق برج العقرب مع باقي الأبراج النهاردة:

متوافق مع الابراج الهوائية والمطاطية

إعرف حظك اليوم برج القوس الثلاثاء 24/10/2017 مع عبدالله أحمد..

القوس: من 22 نوفمبر إلى 21 ديسمبر

برج القوس عاطفياً 

( الكراش والإكس والبوي فريند والجيرل فريند والجوز والزوجة والقرايب ):

محتاج تتمشى بالليل ف شارع طويل لوحدك تفكر وتقرر ف الحاجة اللي شاغلة بالك اليومين دول..خلي بالك بس من الكلاب.

برج القوس عملياً 

( الشغل والمذاكرة والتخطيط لبكرة ):

كمل زي مانتا يابرنس..على وضعك..على وضعك ومفيش حاجة ممكن تخرجك من وضعك دة إلا بمزاجك وبإختيارك انتا وبس..ف ياريت متسيبش اي حاجة او اي حد يخرجك من حالة الوضعنة دي تحت اي بند..بإختصار متسيبش حد يبوظ طاسة مزاجك النهاردة..بلاش..

برج القوس صحياً 

( نفسيا وجسمانيا وكل مايخص طاسة المزاج ):

عشان تخش ف المود هتحتاج تنقي مزيكتك من بدري وتظبط فلاشتك او تليفونك وتحشيه أغاني حلوة يفضل تكون مهرجانات او ماشابه..بحيث تبقى ضامن ان معاك عازل ضد رزالة الحياة..غذائيا ياريت تاخد بالك ان اليوم مناسب عشان تبقى صديق للمكرونة والبطاطس..بالهنا على قلبك..

تعرف على توافق برج القوس مع باقي الأبراج النهاردة:

متوافق مع الابراج الحنجورية والهوائية والنارية زي إمبارح

إعرف حظك اليوم برج الجدي الثلاثاء 24/10/2017 مع عبدالله أحمد..

الجدى: من 22 ديسمبر إلى 19 يناير

برج الجدي عاطفياً 

( الكراش والإكس والبوي فريند والجيرل فريند والجوز والزوجة والقرايب ):

وقت العصاري هو احلى وقت ف اليوم النهاردة.. حاول تستفيد من اللي هيحصل فيه لمصلحتك بشكل ذكي وخد بالك من سنانك ومتعضعضش ف اي حاجة ناشفة زي الجوافة الخضرا مثلا او ماشابه..

برج الجدي عملياً 

( الشغل والمذاكرة والتخطيط لبكرة ):

في حد عامل زي الحداية ف حياتك مستني يشوف كتاكيتك بتلعب ف الشمس عشان ينزل يخطفها منك..حاول متسيبش كتاكيتك ف الشمس خالص بقى النهاردة لو انتا ناوي تبقى مسالم..اما لو بتفكر تبقى عدواني ف مفيش حاجة قدامك غير انك تصطاد الحداية بكمين محكم من كماينك الجميلة..

برج الجدي صحياً 

( نفسيا وجسمانيا وكل مايخص طاسة المزاج ):

الجو مناسب للعدس والبصل ومناسب برضة للطواجن والصواني..لو نفسك رايحة ناحية الحاجات دي يبقى قشطة..حاول بس متفرطش ف الكميات وخليك عاقل ورايق كدة عشان متلاقيش نفسك كلت وركنت ونمت على روحك وانتا قاعد

تعرف على توافق برج الجدي مع باقي الأبراج النهاردة:

متوافق مع الابراج المائية والبرمائية واللولبية

إعرف حظك اليوم برج الدلو الثلاثاء 24/10/2017 مع عبدالله أحمد..

الدلو: من 20 يناير إلى 18 فبراير

برج الدلو عاطفياً 

( الكراش والإكس والبوي فريند والجيرل فريند والجوز والزوجة والقرايب ):

خد بالك عشان الخير مسرح شعره وجاي كتير ماشاء الله.. كمان خد بالك عشان في عدو ليك وله هيبة هيخيب خيبة بالويبة النهاردة..حاول متشمتش فيه.

برج الدلو عملياً 

( الشغل والمذاكرة والتخطيط لبكرة ):

دائما ف الإمكان الغرق ف بحر الحنان ومبطن ف النية العوم ف أنهار الحنية ولكن من يستطيع..من يستطيع..دة اللي هنعرفه كويس وبشكل واضح الايام اللي جاية خصوصا وانها تحمل الكثير والكثير من المفاجآت والإندهاشات المتتالية والمتكررة في عدة إتجاهات منبثقة من إتجاه واحد..بإختصار انتا هتتحب يابرنس قريب..حاول تتصرف صح..حاول تتصرف صح..

برج الدلو صحياً 

( نفسيا وجسمانيا وكل مايخص طاسة المزاج ):

خد بالك من ضهرك ومتهملش ف الموضوع دة من فضلك..كمان ياريت تهتم اهتمام خاص بصحتك الغذائية خصوصا وانها مرتبطة بمزاجك وطاسة مزاجك ارتباط قد يكون وثيق وقد يكون لصيق..وفكك من الإشاعات والغباء على حداً سواء

تعرف على توافق برج الدلو مع باقي الأبراج النهاردة:

متوافق مع الابراج النارية والبللورية

إعرف حظك اليوم برج الحوت الثلاثاء 24/10/2017 مع عبدالله أحمد..

الحوت: من 19 فبراير إلى 20 مارس

برج الحوت عاطفياً 

( الكراش والإكس والبوي فريند والجيرل فريند والجوز والزوجة والقرايب ):

خد بالك عشان في قوى عاطفية ظلامية شريرة بتستهدفك النهاردة.. حاول تستخبى ولا تهرب ولا تعمل اي حاجة..ومتاكلش طبيخ عشان مبيحبوش الطبيخ ولا اللي بياكله.

برج الحوت عملياً 

( الشغل والمذاكرة والتخطيط لبكرة ):

مفيش زمان بيرجع زي ماكان..حاول تخرج من حالة التعلق المرضي بالذكريات والنوستالجيا وبص لقدام وركز ف النهاردة وبكرة وبس..زمان راح وإنقضى وخلص خلاص..بتقلب ف طبيخه البايت ليه سيادتك؟..كمان خد بالك من مزاجك النهاردة ومسيبش حد يعكره او يفسده عليك..مزيكتك ف ودانك وكتابك ف ايدك وخيالك ف دماغك وبس..غير كدة متشغلش نفسك بكلام اي حد..

برج الحوت صحياً 

( نفسيا وجسمانيا وكل مايخص طاسة المزاج ):

من حقك تفرح ومن حقك تدور على فرحتك دي بطريقتك حتى لو خالفت طريقة الناس..جايز يكون انبساطك مستخبي ف حاجات بسيطة وسهلة وموجودة حواليك بالفعل..دور عليها بحسك الخاص مش بمنطق الناس ودافع عن اختلافك لأنه هو الحاجة اللي بتميزك عن البشر..انتا مش نسخة من حد ولا هتكون..غذائيا انتا محتاج تركز ف الأكل الخفيف مش الاكل المسبك النهاردة..كمان راعي ان صحتك مرتبطة إرتباط وثيق الصلة بكيرف حظك اليوم..بالتالي مهم تحافظ عليها وتهتم بيها جدا لو يهمك حظك يبقى حلو ف الحياة..

تعرف على توافق برج الحوت مع باقي الأبراج النهاردة:

متوافق مع الابراج المائية والهوائية والخشبية