التوقيت الجمعة، 29 مارس 2024
التوقيت 05:05 م , بتوقيت القاهرة

ديكور بيتك على مزاجك.. ولا على مزاج الناس؟!

موضوع نقاشنا اليوم حول المقولة الشهيرة "كُل اللي يعجبك والبس اللي على مزاج الناس".


وحول مدى صحة تلك المقولة حاول تسأل نفسك شوية أسئلة عشان تقدر توصل للإجابة.


- فمثلاً ممكن تسأل نفسك، هو أنا لو عيشت في بيت مش على مزاجي هبقى مبسوط؟


- لما الناس تكون مبسوطة من ديكور بيتك ده بالضرورة هيخليك مبسوط وراضي عن بيتك؟


- لما أسمع كلام أهلي اللي هما يعرفوا أحسن مني، كده هكون مستريح في بيتي اللي هو مملكتي الجديده؟


- طيب هل أنا أصلاً عارف أنا عايز أعمل إيه في ديكور بيتي؟


- هل عندي الخبرة الكافية اللي تسمح لي أني أقرر إيه أفضل من إيه؟


أسئلة كتيرة لازم تسألها لنفسك عشان تقدر تحدد مين هيحدد شكل وطبيعة المكان اللي حياتك وعمرك هيمروا بداخله.


كتير من الناس بتواجههم مشكلة تحكم الأهل، هتلاقي الكبار مصممين على الصالون الفرنساوي المدهب والجوبلان والتحف الكلاسيكية القيمة، بس وارد جدًا أن صاحب البيت بيكره الكلاسيكية، بيستريح أكتر في الأثاث المودرن وعناصره العملية والمريحة!


تخيل كده أنك بتحب الجينز والأحذية الرياضية ومضطر أنك تستبدلهم بالبدلة والكرافات!


حاجة بايخة وتدعو للضيق صح؟


طيب فيه ناس بيكون مشكلتها هي أنها بتكون محتارة ومش قادرة تحدد هي عايزة إيه بالضبط، مش قادرين يتوصلوا لإيه أفضل بالنسبة لهم، ولعدم الحيرة في اتخاذ القرار، حاول دايماً كل لما عينك تقابل عنصر ديكوري مريح بالنسبة لك ولعينك ولنفسيتك تحفظ فى عقلك الباطن أن ده هو زوقك والأسلوب المثالي لديكور البيت.


كل ما تزور بيت صديق أو قريب لك، خلى عينك تدور على المناسب ليك فى الديكور، فى الألوان والخامات والمنسوجات والطراز،  دور على اللى يليق مع نفسك وروحك وحياتك، أبحث عن العناصراللى تخدمك لتعيش حياتك بصوره أفضل وأسهل.


أوعى تكون بتكره الآثاث الكلاسيكى بتفاصيله الدسمة وعشان ضغط الأهل والمحيطين توافق يكون بيتك بالطراز أنت بتكرهه، أنت اللي هتعيش فى المكان ده وأنت اللي نفسيتك هتتأثر إيجابيًا أو سلبيًا بالعناصر الموجودة في المكان ده، أنت صاحب القرار وأنت صاحب البيت وأنت صاحب حياتك.


امشي ورا قرار عقلك أنت عشان ما تندمش لما تلاقي نفسك غريب فى بيت ميشبهكش.