تعرف إيه عن تمثال عمو اللي بياكل العيال الصغيرة؟

محدش يقدر ينكر إن أساليب الأمهات ف تخويف ولادهم عشان يسمعوا الكلام ويدخلوا يناموا أو يخلصوا أكلهم  بيتطور طول الوقت  فزمان مثلا كانت الأم بتخوف أولادها بأبو رجل مسلوخة ولا أمنا الغولة .. بس الجيل الحالي مبقاش ياكل معاه الكلام دة.. فراحت لأمهات غيرت أسلوبها و زودت ليفل التخويف لحد ما وصل لمستوى الزومبي أو دراكولا.. أما بالنسبة للأطفال اللي مبقاش نافع معاهم أي وسيلة من دول أحب أقولهم حبايبي الحلوين لو مسمعتوش كلام مامي وبابي إحنا هنجيبلكم تمثال عمو اللي بياكل العيال الصغيرة

تخيل كدة  إنك بتتمشى ف شوارع مدينة برن عاصمة سويسرا.. وفجأة تلاقي طفل بيصرخ جنب ودنك وبيقول لماماته هو ليه عمو دة بياكل بيبي ؟ ف تبص تلاقي تمثال بالع نص طفل في بقه.. ف يجيلك رعب و ذهول من منظره وأكيد أول سؤال هتسأله لنفسك ليه يعملوا تمثال بالشكل دة.. لا وكمان معتزين بيه جدا لدرجة إنهم حطينه ف ميدان عام ف قلب العاصمة بتاعتهم 

طبعا من الواضح جدا إن التمثال دة إتسبب ف رعب كبير لكل أطفال برن لفترة طويلة.. ودة اللي خلانا نحب ندور  ورا قصة التمثال العجيب دة.. لإنه لازم يكون فيه سبب منطقي ورا أكتر تمثال مرعب ف سويسرا

تمثال آكل الأطفال أو "The Kindlifresser" اتبنى سنة 1546 يعني من حوالي 500 سنة.. وهو من أقدم التماثيل الموجودة ف المدينة عشان كدة صعب يفرطوا فيه حتى لو بيخوف الأطفال.. دي آثار إنتوا بتهرجوا ولا أيه 

بالرغم إن أغلب المؤرخين عارفين السنة اللي اتبنى فيها التمثال إلا إن سبب تصميمه مش محدد و فيه 3 قصص مشهورة كلها تكهنات عن الموضوع دة.. 

القصة الأولى.. 

في الأساطير اليونانية كان فيه ملك اسمه كرونوس كان ابن السما والأرض -يتربى ف عزهم- وف يوم من الأيام حذره أبوه وأمه اللي هما السما والأرض يعني إن أطفاله هيتآمروا عليه لما يكبروا وياخدوا عرشه.. طبعا كرونوس خاف جدا وقال لأ كله إلا العرش والصباع اللي يوجعني معالجوش أقطعه.. راح هووب واكل أطفاله الخمسة واحد واحد.. وحسب القصة دي تمثال آكل الأطفال أو "The Kindlifresser" هو رمز للملك  كرونوس وأطفاله الخمسة

القصة التانية..

الدوق بيركتولد مؤسس برن كان عنده أخ أكبر منه.. الأخ الكبير دة تقريبا كان شخصيته ضعيفة فكانوا أخواته الأصغر منه يتريقوا عليه ويهزأوه طول الوقت.. وكان مبيقدرش يدافع عن نفسه ولا ياخد حقه منهم.. ومن الواضح كدة إن أخواته زودوها معاه حبتين لدرجة أنه قرر الإنتقام  من كل الأطفال الصغيرين وراح واكل أكتر من طفل ف المدينة..  لكن ف الحقيقة إنه مفيش أي سجلات أو كلام موثوق عن الحكاية دي.. عشان كدة بيعتبروها بتميل أكتر للحكايات الشعبية  المنتشرة عن التمثال لكن ملهاش دليل قوي نقدر نمشي وراه

القصة التالتة..

هي أكتر قصة مؤلمة وأقرب للحقيقة.. وبتقول إن نحت تمثال مخيف بياكل الأطفال بالطريقة دي الهدف منه هو تحذير للمجتمع اليهود ف مدينة برن.. وكأنها رسالة ليهم إن أي خروج أو تجاوزات هيكون دة مصير أطفالكم.. وبتعتمد وجهة النظر دي على لبس التمثال وخصوصا الطاقية بتاعته اللي بتشبه لبس اليهود ف الفترة دى .. لكن في وجهة نظر تانية بتقول لأ بالعكس التمثال معمول عشان يخوفوا الأطفال من التعامل مع اليهود عشان تفضل الصورة راسخة ف دماغهم إن اليهود هياكلوهم ويموتوهم.. وطبعا كل دي أراء وتكهنات لكن محدش عندة الحقيقة الكاملة عن أغرب تمثال ف سويسرا 

الخلاصة ..

ديما التدوير ورا أي معلومة مجهد وبيحتمل إحتمالات كتير وف النهاية إحنا بنصدق الأقرب لقناعاتنا ودة بيخلينا نقول الحمدلله على الإنترنت اللي سهل علينا الوصول لأي معلومة والتأكد منها .. أوريفوار