لو إنتا مقتنع بالمثل اللي بيقول إن "الجنة من غير الناس ما تنداس" يبقى وفرت علينا شرح كتير وهتخلينا ندخل ف الموضوع على طول.. أما لو إنتا شخص مبسوط ف الفقاعة بتاعتك من غير ناس ووجع دماغ يبقى مفيش مانع برضة تاخد فكرة لأن اللي متحتاجوش النهاردة بوشه بكرة تحتاجه بقفاه..

 ودول 13 حاجة لو عملتها أكيد الناس هتطفش منك.. وياريت الناس بتاعت " اللي عايز يعرفني زي مانا واللي مش عايز هو حر " يمتنعون بليز.. 

السايلانت silent..

شخصية محيرة وتجيب الشلل وأحسن تعامل معاها الحقيقة إنك متتعاملش معاها.. أو على الأقل بلاش التعامل الإلكتروني لأنهم تقريبا بيستخدموا تليفونهم كزُهرية.. ف هتلاقيه أغلب الوقت مقفول وف أحسن الحالات هيكنسلوا عليك ويوم ما يرد على رسالتك اللي بتبلغه فيها إنه في لوري داسك على الدائري هيرد بـ cool أو like ولو إنتا تفرق معاه أوي هيبعتلك إيموجي بيعيط.. حاجة تنقط الحقيقة.. ف لو مرارتك سليمة وتتحمل خلاص جو آهيد وربنا يوفقك 

اللي شايف نفسه..

النوع دة من الناس مش شايف غير نفسه وإنجازته.. ف مش فارق معاه إنتا عامل إيه.. مبسوط ولا حزين ولا إيه.. كل اللي يهمهم إنهم يبلغوك بنجاحتهم وشطارتهم الفظيعة ف كل حاجة - من الآخر بيحبوا يعلموا عليك - هتلاقي أغلب الشات بتاعك معاهم عبارة عن لينكات لشغلهم وإنجازاتهم زي صور للكلاب والقطط والعربيات والفلل والياقوت والمرجان وكنز علي بابا بتاعهم..

 طبعا مفيش أي إعتراض على الناس الناجحين بس برضة لا إنتوا نادي القرن ولا أصحابكم مشجعين درجة تالتة.. عشان يكون دورهم الوحيد ف حياتكم إنهم يقولوا برافو 

المتقوقع على نفسه..

شخصية غامضة وصامتة وبتتوتر جدا من العلاقات الإجتماعية وبتتجنبها طول الوقت.. بتتضايق لما بتقابل حد صدفة ف الشارع وغالباً عاملة للعيلة وصحاب المدرسة والجامعة بلوك على الفيس بوك لأنها مبتحبش تكون مكشوفة وواضحة أوي قدام الناس.. الشخصية دي ممكن تكون كانت إجتماعية جدا زمان ومعندهاش مشكلة مع حد بس في إحتمال كبير إنه يكون حصلها مواقف أو ظروف صعبة أفقدتها ثقتها ف الناس.. لأنه مش منطقي يكون ف حد طبيعي بالدرجة دي من التوتر والخوف 

الحساس بزيادة العيوطة..

شخصية تقدر تعتبرها من الأعضاء المؤسسين لنظرية المؤامرة.. أغلب الوقت بتفهم الناس غلط ودة لأنها ببساطة عمرها ما فكرت بدماغهم.. ف بتزعل من الجد زي الهزار والتعامل معاها لازم يبقى بحساب وتاخد بالك من كل كلمة بتقولها عشان متلاقيهاش بتعيط فجأة قدامك.. عشان كدة أغلب اللي حواليها بيعاملوها كطفلة وبيحاولوا يراضوها لأن زعلها وحش ودة طبعا مش مريح لا ليهم ولا ليها .. ف هتلاقي علاقتها الإجتماعية بعافية شوية لأن الناس بتحب الشخصية المتفهمة الكبيرة ومعندهومش طاقة يدادوا ف حد طول الوقت

اللي مالوش ف المناسبات والزيارات..

هما الناس اللي بالنسبالهم المناسبات والأعياد وأي تجمع فيه ناس كابوس مرعب.. وهو معذور الحقيقة لإن أغلب المناسبات دي فيها كمية كبيرة من الأفورة والمجاملات المصطنعة.. وبتضطر الواحد إنه يلبس ماسك مش حقيقي عشان يجاري الجو ودة بيهدم أي فكرة عن الترابط الأسري و العيلة وصلة الرحم وبتتحول الحكاية كلها لمنظرة فاضية.. لكن للأسف الناس بتحكم على الشخص اللي مبيحضرش المناسبات دي إنه إنطوائي ومبيعرفش حد .. ف لو هيفرق معاك أوي الناس اللي بتحضر المناسبات دي إحضرها وخلاص إنشالله تنام ف النص.. انتا حر

البطة البلدي..

شخصية باينة من اسمها انها تقيلة جدااا.. طول الوقت بتفكس مواعيد وخروجات ومش بس كدة دي حتى تقيلة ف شغلها ومستقبلها.. هدفها ف الحياة هو الراحة المطلقة وأي حاجة هتبذل فيها مجهود بتكسل تعملها ودة أكيد بيضيع منها فرص بالعبيط.. ف لو إنتا صاحب الشخصية دي هتلاقيه دايما عايزك تقوم بدور الدوبلير ف حياته.. تخلصله كل المشاوير وتعمل مكانه كل الحاجات حتى هدية خطيبته ف الفلانتين هيخليك تنزل إنتا تنقيها.. ومتهيألي محدش عنده طاقة ولا فلوس للبنزين اللي محتاجه الصداقة دي 

اللي عايش جوة دماغه..

شخصية قررت إنها تبني كومباوند ف دماغها وتكهرب الأبواب وتعيش فيه.. دي بقى مش بتستنى إن الناس تطفش لوحدها لااا هي اللي بتطفشهم.. ف مثلا لو دخلت الشغل لقت زميلها قاعد ساكت مبيكلمهاش مبتسألوش مالك أو ليه مبتتكلمش معايا.. لأ هي بتألف قصة وبتتوقع نهايتها وبتتصرف بناءاً عليها.. فتلاقيها فجأة عملتله بلوك من غير ما يفهم ليه.. وشوية تلاقيها قررت تقرب منه وتبقى لطيفة.. الشخصية دي مبتحسش معاها بالأمان وطول الوقت مستني منها تصرف غريب.. ودة يطير أجدعها علاقة إجتماعية 

اللي بيحسبها أوي..

شخصية عندها فريق إتش آر ف دماغها بيجتمع 3 مرات ف اليوم 7 أيام ف الأسبوع عشان يحددلها مين يدخل في حياتها ومين لأ.. ومين ممكن يرهقها ماديا أو عاطفيا ومين هيبقى مريح.. غالبا مشاعرها ف إجازة وعقلها بس اللي شغال يعني قبل ما تروح عيد ميلاد وتجيب هدية لواحدة صاحبتها بتشوف الأول مدى إمكانية إستمرارها ف العلاقة دي لحد ما تفوت سنة ويجي عيد ميلادها وتتردلها الهدية وتبقى كارثة لو كملت ونسيوا عيد ميلادها.. قبل ما تخرج مع صحابها بتحسب كل جنيه.. وأسود يوم ف حياتها لما واحدة تقولها إدفعيلي وأبقى أحاسبك.. دي ممكن متنامش طول الليل بسبب الجملة دي

ملك المليودراما.. 

شخصية الندب آول ذا تايم  ودي بقت منتشرة جدا للأسف.. تحس إنها عندها المخزون العالمي من الطاقة السلبية وبتصدره لدول العالم الأول أصل التالت مش ناقص الصراحة.. واليوم اللي بيحصلها فيه مشكلة بيقى يوم حظها لأنها بتلاقي نفسها وتميزها ف النكد.. وبتاخد الموضوع على قلبها جدا وبتبدأ تنشر بوستات من نوعية  "قضاء الله خير" أو "الحمد لله على قد كدة" ف الناس طبعا تبدأ تسأل تروح هي نازلة ببوست توضيحي وبوست تفصيلي ولايف من مكان الحادث.. وخد عندك أسبوع قدام على الوضع دة.. النوعية دي عندهم موهبة لو إستغلوها ف تغطية الأخبار هيقدموا فايدة أكبر للبشرية 

الزعلان طول الوقت.. 

شخصية علاقتك معاها بتقوم على مجموعة من الجمل المحفوظة والمكررة ف كل المناسبات زي إنتا مبتسألش إنتا مقصر.. أنا بطلت أعاتبك أنا رميت طوبتك  من زمان بغض النظر عن يعني إيه رميت طوبتك أصلا.. المهم إنه زعلان  وإنتا ندل طول الوقت.. خرجت من غيري يا ندل نجحت من غيري يا ندل أخدت دش من غيري يا ندل.. طول الوقت بيحاول يحسسك بالذنب وإنك خاين ومش مقدر الصداقة.. وأكيد إنتا مش حمل تتعاير كل شوية لمجرد إنك بتعيش حياتك عادي مش  بصفتك التوأم الملتصق بتاعه.. 

الحلاق.. 

أو الكوافيرة أو سواق التاكسي كل دي صفات للشخص اللي مابيبطلش رغي.. يعني مثلا لو غلطت مرة وإتصلت تقوله كل سنة وإنتا طيب ف أي مناسبة هيبقى يوم مش فايت.. هتنهي معاه رصيدك خلصان ومستلف وصداع نصفي وإحتمال تحرق البيت بسبب الأكل اللي نسيته على البوتجاز وإنتا قاعد بتسمعه وهو بيرغي

ظابط المباحث.. 

شخصية قررت إنها تفضي نفسها بس عشان تراقبك أو يمكن هى أصلا فاضية محدش عارف.. لما تشوفها هتلاقيها ديما تسألك هو إنتا لما نزلت البوست الفلاني كنت تقصد إيه.. ولما قابلتك ف وسط البلد مين دي اللي كانت معاك ..والتيشيرت اللي إنتا كنت لابسها جايبها منين وبكام.. بتاخد كام ف الشهر.. من الساعة 7 لحد 7:15 يوم الأربع اللي فات كنت بتكلم مين ف التليفون.. الناس دي وإنتا قاعد معاها هتحس إنك بدأت تعرق وريقك نشف وبتطلب إنك مش هتتكلم غير ف جود المحامي بتاعك

الخلاصة .. 

التعامل مع الناس شر لابد منه ودي حقيقة مينفعش تزعل منها.. ف لازم نبقى زي الزبادي ف رمضان أو البطيخ ف الصيف.. منعشين وخفاف على القلب والمعدة عشان الناس تحبنا .. أوريفوار