سما المصري يغمى عليها .. تامر أمين يجيله جلطة في المخ .. مها أحمد يجيلها سكته قلبية .. وهيثم شاكر جسمه يتكسر وهو بينط من العربية .. و س ، و ص ،  و ع ، وغيرهم كمان .

كل دا علشان نعمل مقلب مخيف ، ممكن تروح نتيجته أرواح كتيرة لضيوف البرنامج حتى لو كانوا عارفين و قابضين !!

مش معترضة تعمل مقلب، لكن إنك تشعلق عربية في السما بأربع خطافات، علشان تحاول إنقاذ الضيف، برفع العربية من على حافة الجبل في لبنان قبل ماتقع، فتهدد حياته أكتر بشكل مباشر، وكأنك "مغسل وضامن جنة"، ونسيتوا واقعة المطعم المعلق الشهير إلى وقع برواده أثناء رحلة الصعود في الجو و على مرأى ومسمع من الجميع، وكان حديث العالم وصفحات السوشيال ميديا. 

خفة الدم حلوة والكاميرا الخفية أحلى وأحلى، لكن لو رجعنا لورا شوية هنفتكر أيام فؤاد المهندس، وإبراهيم نصر، وحسن الإمام، أول من عملوا برامج الكاميرا الخفية في مصر بعد ما الغرب عرفها قبلنا، وكانت وقتها بتصنع البهجة والضحكة على وجه المشاهد ومصنفة تحت نوعية برامج المرح والترفيه. 

رفقًا بالمشاهدين وضيوف الحلقات، الفلوس مش كل حاجة لأن ساعة القدر لو جت لا الونش و الحبل هينفعوا صناع العمل، ولا هيعرفوا ينقذوا الضيف لو وقع من فوق الجبل !