كتبت- ناهد سمير: 

أغنية يسمعها كثيرون في الشارع خاصة بالمناطق الشعبية، دون أن يعرفوا أن من يغنيها شاب صغير، لايزال يدرس في الصف الثالث الإعدادي، إلا أن كلماتها أثرت فيه بشكل كبير، وكأنها تعبيرا منه عن بيئته، وما يدور فيها من أحداث وقضايا اجتماعية، ليطلق عليه وهو في سنه الصغير "ابن تجربته"، التي تعلم منها الكثير.

"مش طالببين من الدنيا غير إن الحق يبان له طريق، واخدينها ليه بسكك تانية، دي بحورها فانية ما تبل طريق".. هذه الكلمات التي غناها محمود العمدة في مهرجان "الدنيا شمال"، الأكثر شهرة خلال الفترة الأخيرة، بين مستمعي موسيقى وأغاني المهرجانات، وأحد أفراد "تيم مطبعة"، وكان لـ"دوت مصر" هذا الحوار معه..

شاهد حوارنا المصور مع "تيم مطبعة"

- بتغني من إمتي؟
قبل ما المهرجانات تظهر، من وأنا عندي 8 سنين، كنت بغني "طرب" لليثي مثلا، وبعد سنة بقيت بغني المهرجانات.

- أول أغنية غنيتها كانت إيه؟
كان اسمها "من بعد صيتك بان أصلك".

- فكرة غُنا المهرجانات جت إزاي؟
جت من الشعبي نفسه، بس المهرجان بيتكلم عن الواقع اللي إحنا عايشين فيه.

- في مهرجان "الدنيا شمال"، كنت حاسس الكلام وإنت بتغنيه؟
طبعا.

- إيه أكتر أغنية أثرت فيك من أغاني المهرجانات؟
أغنيتي أنا مهرجان "الدنيا شمال".

مهرجان "الدنيا شمال"

- كلمات الأغنية بتقول إيه؟
"الدنيا سرك ومسرحية، وناس كتير عينيها عليا، واللي قلبه بدون حنية، واللي ملهي بايع القضية، واللي ماشي سرحان سكران، واللي حياته كلها دخان، واللي يدور ع الأمان، واللي ناسه إنه إنسان ما الدنيا فيها أشكال وألوان".

- الأغنية كانت من كلمات وتوزيع مين؟
كلمات: كريم ماريو وإسلام حجازي، توزيع: مصطفى ماندو.

- بتدرس؟
أنا في 3 إعدادي.

- حد بيضايقك في المدرسة أو في الشارع بسبب المهرجانات؟
لما بابقي مع أصحابي في المدرسة مثلا أو الشارع، بيبقي في ناس جاية عايزة تتعرف عليا، منهم اللي بذوق، ومنهم اللي بيتعرف بأسلوب مش كويس، مش كويس إزاي؟ ساعات أبقى ماشي وحاجات تتحدف عليا مش مية ولا أي حاجة تانية، لا بيبقي إزاز والله، إزاز بيعدي من جنب ودني.

- وبتتصرف إزاي؟
مبكلمش حد بامشي أنا وأصحابي وخلاص.

- ناوي تكمل في مشوارك؟
آه ناوي أكمل زي ما أنا في المهرجانات.