كتب - أحمد الفخراني:

طب صلي ع اللي يشفع فيك، هتقرا الموضوع ده وتشتم الهيافة، وهكتب الموضوع وإحنا عارفين أن أحلى ما في الدنيا تفاصيل زي دي.

البوسة.. حلوة.. أحلى ما في الدنيا.. سهلة ومنعشة.. زي المية والهوا والسكر في الشاي.. دايبة ماتعرفش تمسكها بس شايف طعمها.. ممكن أول بوسة تحدد مصير علاقة، العلاقة ممكن تطول، وتبقى حددت مصير حياة.. ممكن تبقى هدية بين اتنين مش هيتقابلوا تاني.. حتى لو العلاقة ماكملتش.. البوسة الحاجة الوحيدة اللي ما حدش يقدر ياخدها منك لو الدنيا اتهدت واتبنت من الأول تاني.. البونبانية حصلت واللي يعرف يشيل ذكراها من بقك يبقى يقابلك.

البوسة.. سحر.. فن ولعب وهندسة.. وعلم كمان..
آه فيه علم للبوسة..ناس بتقعد تذاكر وتعمل أبحاث عشان تشوف أحلى بوسة عاملة إزاي.. بيقولك البوسة مش بس بوسة.. دي مرات ممكن تكون هدية مقفولة تقعد تكتشف فيها عمرك، أصل انت ممكن تنسى تفاصيل العلاقة الحميمية بس ماتنساش طعم أول بوسة في العلاقة.. عالم النفس جون بوهانون من جامعة بتلر أكد إن 90% من الناس بيتفكروا وبيستعيدوا البوسة الأولى ليهم مع حد أكتر من أول لقاء جنسي بينهم.

أمان؟.. أمان.. مساء الفل
***

بوس تكسب فلوس و5 سنين بونس:

أبحاث بلاد بره، ممكن مايكونش ليها علاقة ببلاد جوه، بس بيقولك إن في بلاد بره والدول المتقدمة اللي بيقدموا فيها مع الكباب طحينة إن 59% من الرجالة و66% من الستات بينهوا العلاقة عشان الطرف التاني ما بيعرفش يبوس.. متهيألي في بلاد جوه بيواجهوا نفس المآساة بس مجتمعاتنا ما بيقولوش ع النت.

لما تبوس مراتك قبل الشغل هتعيش 5 سنين أكتر، هتعمل فلوس أكتر 20%.. الكلام ده من كتاب فن التقبيل.. أو وفق عنوانه الفرعي: إيه اللي الشفايف ممكن تحكهولنا، دي دراسات اتعملت في ألمانيا أخدوا فيها بتاع عشر سنين مراقبة بويسة.. ده علم يا هانم مش كازوزة.

ليه لازم نبوس:

أصلا أصلا البوسة سر، بتنقل معلومات وإشارات وهتلحق كوارث، في أول بوسة العقل الباطن بيعرف حاجات كتير عن شريكه من اللمس والهمس، حاسة الشم، صوت البوسة، طريقتها، كل الحركات دي بتعرف الشريك إذا كان ده الشخص المناسب ولا لأ، وإن كان عايز يبوسه تاني ولا آدي وش الضيف.

يعني مثلا، العقل الباطن بتاع الستات بيعرف من الريحة إن جهاز الراجل المناعي ده تمام وبرنس.

الراجل البوسة بالنسبة له خطوة للجنس، الست بتركز على صحته ونضافة سنانه، وبتنطش موضوع السنان ده لما تكون بتعزه أوي، وبتعرف منها العلاقة دي هتطول ولا الحكاية طياري، الست تعز البوسة الحلوة، الراجل عنده خطط تانية.. الرجالة مش رومانسيين أوي بس مابنقولش ع النت.

البوسة.. اختبار مجاني.. والاستجابة ليها كمان ممكن يبقى ضوء أخضر.. أو تعرفك إن كانت مش مهتمة.

بوس صح..تعيش مستور:

دي نصايح للستات.. مبنية على أبحاث وربنا بتقولكوا الرجالة بيحبوا إيه:
*افتحي بقك أكتر، الرجالة بيحبوا حركة اللسان.
*خليكي مبادرة أكتر.
*خلي البوسة أنشط.
الخلاصة: كفاية ترجعي ورا وتنكسفي.
دي بقى نصايح للرجالة مبنية على شكاوي الستات:
*ماتوصلش لسانك لزورها.. أغلب شكاوي الستات من الرجالة إنها عايزة تتباس مش عايزة تحس إن كائن فضائي بيبلعها.
*سيبها تتنفس.. راقب بودانك إن كنت سامحلها تاخد نفس ولا لأ.. الست هتنبسط أكتر بالبوسة لو حست إنها مش هتموت مخنوقة.
*جاري إيقاعها..
*53% من الستات بيحبوا البوس من راجل دقنه محلوقة، واللي بينوع في طريقته.

بس الأهم للطرفين:
اعرف شريكك عايز إيه، اللي بيحبه وإيه اللي مش بيستطلفه وإنت هتبقى بوستك أحسن وأحسن مع الوقت.
كان نفسي أقول إن اللي كاتبه نتيجة خبرات شخصية بس المقال الأصلي من هنا.

 اقرأ أيضا: