كتبت- ناهد سمير:

دليلا على شعبيته، وتأثر الجمهور بعبارته الكوميدية، التي كان يقولها خلال دوره بمسلسل "الكبير"، خلال شهر رمضان الماضي، قام أحد مستخدمي "فيس بوك"، يُدعى عمر نصر، بجمع أشهر عبارات الدكتور ربيع، الذي قدمه الفنان "بيومي فؤاد".

جمع محب الدكتور ربيع حتى الآن 18 عبارة له خلال المسلسل، وهي كالآتي:

1- المرض ده يا كبير أصيب بيه 8 على مستوي العالم مات منهم 10؛ 8 ماتوا من المرض، و2 ماتوا من الزعل عليهم.

2- كوباية ميه بسرعة.. يا سلام الميه تحفة ممكن كوبايه تانية.

3- سبحان الله الشاي ده رائع!

4- أنا شُفت في البيت ده يا كبير عجايب كتير قوي، ده أنا حتى ممكن أعمل كتاب اسمه "عجايب الخلق والتفسير في بيت الكبير".

5- بتشتكي من إيه؟ مش بشتكي من حاجة! طيب هكتب لك دوا متمشيش عليه لمدة أسبوع، وتجيلي وهاديك دوا تاني متمشيش عليه برضه، هاهاهاها اطلعوا بره يا بهايم يا ولاد الكلب.

6- أنت دخلت الجيش؟! لا الجيش أصلا زحمة وناس كتير قوي هناك.

7- أنت عارف ده بيسموه إيه في أمريكا.. بيسموه عزت بردو أمال هيسموه إيه بس هما بيقولوها إيزات.

8- الحمد لله الرصاصة جت في دماغه.. أشرف ميضربش بالنار في دماغه لمدة أسبوع.

9- تعرفي أنا كان ممكن أروح باريس، بس التنسيق هو اللي جابني هنا الصعيد.

10- خد تعالي اقف هنا.. واللي ينطق فيهم اكتب اسمه في ورقة عشان مكشفش عليه.

11- أنا بروّش وبتكلم بجد.

12- الرباط الصليبي دا بيجي للي بيفهموا دا رباط عادة.

13- وإنتوا عليكم إيه؟! عليكم السلام.

14- يا كبير أمك حاااااامل هاهاهاها.

15- الإمساك في المشاعر ممكن يؤدي لحدوث شرخ في العلاقة.

16- أنت نسيت لما عملت لك العملية وكان ليّ عندك نص جنيه.

17- أنت أصبت بمرض محدش اتصاب بيه في الشرق الأوسط كله!!

18- عندنا في النجع قصدي في الطب بيقولوا.......

الأمر الذي أثار إعجاب الكثيرين، وانهالت التعليقات الساخرة، والمحبة للفنان "بيومي فؤاد"، إضافة إلى أن البوست الذي كتبه عمر، تم تداوله عبر "فيس بوك" فيما يزيد عن 4 آلاف مرة، ما يؤكد شعبية الدكتور ربيع بين متابعي مسلسلات رمضان الماضي.

ليس هذا فحسب بل قام بعض مستخدمو "فيس بوك" أيضا بتدشين صفحة تحت عنوان "محبي الفنان بيومي فؤاد"، وصل عدد المشتركين بها إلى ما يزيد عن 2000 عضو، ويعمل القائمون عليها على جمع كافة أخباره، والتصميمات المختلفة لعباراته خاصة في مسلسل "الكبير أوي"، الأمر الذي لاقى إعجاب الكثيرين.