بالصور..ناس ملهاش ف السواقة أساسا.. الجزء التاني

من قديم الآزل والانسان بيحلم ب السواقة.. وبيحلم يبقى تحت رجليه دواسة بنزين ودواسة فرامل.. وعشان كدة لما كبر وبقاله حضارة وعلم قديم وبعدين إتطور حبة وبقاله كمان علم حديث على القديم بتاعه فكر ازاي يطير وحاول يعمل طيارات وواضح انه فشل فقرر يعمل ساعتها عربيات عشان نفسه ف السواقة اوي..

بس واضح برضة انه مدرسش طبيعته كويس قبل مايفكر ف الاختراع دة ويحطه موضع التنفيذ.. واضح انه كان لازم يتآنى ف القرار دة حبة ويدرس كدة تاريخه كويس وياخد باله هو قد ايه مالوش لا ف السواقة ولا ف الركنة ولا ف صناعة المتحركات بشكل عام..

بس اللي حصل بقى انه اخترع الاختراع الجميل دة قال ايه عشان يروح ف كل حتة بسرعة.. والسرعة دي تحديدا ف السواقة هي سبب كل المشاكل..

معظم الصور اللي هتشوفها ف الموضوع دة مثلا سببها سرعة زايدة او إهمال فظيع ف إدراك ابعاد العربية أو مجرد كسل شنيع بيتمثل ف واحد ولا واحدة قبل مايركنوا مكلفوش خاطرهم يفكوا الحزام - دة لو لابسينه جوة العربية اصلا - وينزلوا يبصوا ويتطقسوا على مكان الركنة ويشوفوا ينفع الاول يركنوا فيه ولا مينفعش.. لو كانوا عملوا كدة كنا اترحمنا من غشومية باينة ف الصور اللي ف الموضوع دة واللي بتفتن على ان الانسان واضح انه مالوش ف السواقة بس بيصر يطلع رخصة ويمتلك عربية وخلاص..

جايز لما تقرا الكلام دة تفتكرني مفتري على الانسان او مجرد بهزر بس بص كدة ف الصور الاول بس كدة وبعدين شوف بنفسك معايا حق ولا لأ..

اللي داخل بعربيته ف بيت واللي داخل ف يخت واللي ركنه فوق سقف بيت متفهمش وصله ازاي وليه.. واللي مش عارف يركن ف باركينج فاضي اساسا وحاجات تشل وتشيب..

ماعلينا.. للأسف من حق الانسان يشتري بفلوسه اي حاجة تعجبه حتى لو مش هيعرف يستعملها وهيعمل بيها كوارث عادي خالص.. دة نظام الكوكب لحد دلوقتي والانسان معرفش يخترع نظام احدث منه ينظم بيه السواقة للأسف لسة..

نأمل ف المستقبل الاجيال اللي جاية علمها يكون احدث من علمنا الحديث ويقدروا يخترعوا جهاز ما لما تحطه على مناخير اي بني آدم يزمر ويقولك "الانسان دة مالوش ف السواقة" ويعلمه ف مناخيره علامة بتنور فسفوري ف حالة واحدة بس..

لو قل عقله وعاند بعدين وركب عربية ومسك الدركسيون ف ايده ودور وطلع.. ساعتها كل اللي ماشيين ف الطريق هيشوفه وهو سايق وفرحان ومناخيره منورة ماشاء الله ف وسط العربيات بلون فسفوري والكل هيعرف ساعتها انه شخص مالوش ف السواقة وعلى الاقل هيتجنبوه ومحدش هيقرب منه على الطريق..

طبعا دة لو افترضنا انه ف المستقبل هيبقى لسة في عربيات بدركسيون اساسا..

ياللا..ملناش دعوة بحد ونتمنى السلامة للجميع.

لو عجبك الموضوع دة وحابب تشوف زيه أو أحسن منه خش هنا قط بلدي