بلاي ليست..الهضبة 1994 وذكرياته مع أفريقيا

ودنك هي حلقة الوصل بينك وبين العالم.. يعني لازم تهتم بيها وتقدرها أكتر من كدة على فكرة وهي مطالبها سهلة وبسيطة.. يعني مش هتطلب منك تخرجها ولا تأكلها ف مطعم غالي كل اللي هي محتاجاه إنها تتسلطن وتسمع حاجات تنعشها وتفرفشها من فترة للتانية.. وبما إن مهمتنا هي إسعاد ودان كوكب الأرض.. ف قررنا نفضي نفسنا كل يوم حبة عشان بس ننقيلك الحاجات اللي تفرفشها وتنعشها..

وكل المزيكا الجميلة دي هتلاقوها بكل الأذواق والمقاسات ف أكتر من بلاي ليست ف قسم المزيكا عندنا.. وأكيد هتلاقي اللي يناسب ودنك ومزاجك

النهاردة هناخد ودانكم ف مشوار صغير لعالم الهضبة عمرو دياب.. هنرجع معاه بالزمن للبدايات وتحديدا لسنة 1994 اللي قدم فيهم عمرو دياب ألبومين "ذكريات" و"ويلوموني"

ولو عايزين تجيبوا المشوار من أوله يبقى ميفوتكوش:

بلاي ليست..الهضبة 1988 لما كان بيشرب الس?ن ف إزازة

بلاي ليست.. الهضبة 1990

بلاي ليست.. الهضبة 1992 لما كان بياكل آيس كريم ف جليم

في سنة 1994 قرر عمرو دياب انه يقدم ألبوم ذكريات واللي فيه مجموعة من أغانيه القديمة أو الأغاني اللي قدمها في الحفلات والإيفنتات اللي شارك فيها.. وعشان زمان مكنش فيه يوتيوب ولا ساوند كلاود تنزل عليه الأغاني بعد ما تتذاع.. ف كان المنتجين بيعملوا للمطرب ألبوم مجمع بكل الأغاني دي.. بس متسجلة في إستديو وبجودة عالية..

ف سنة 1991 شارك عمرو دياب في افتتاح دورة الألعاب الأفريقية اللي كانت متنظمة في مصر.. وغنى أغنية أفريقيا اللي مشهورة بجملة" بالحب إتجمعنا".. الأغنية دي تقريبا إشتغلت في كل حفلات مدارس مصر.. وياما رقص عليها فرق الكشافة والمرشدات.. يعني نقدر نتعبرها علامة مميزة من علامات طفولة جيل التسعينات.. وأكيد منقدرش ننسى رائعة حميد الشاعري "أنا مهما كبرت صغير" اللي كانت معاها في نفس الألبوم.. كفاية كلام لحد هنا ونسيبكم تستمتعوا بالأغاني.. صباح الفل