المرة اللي فاتت اتكلمنا عن الوظايف الأمان اللي تقدر تشتغلها من غير ما تبقى مقلق او خايف الروبوت أو أي برنامج كومبيوتر يسرقها منك في العشرين سنة اللي جاية.. المرة دي بقى هنتكلم عن الوظايف اللي لازم تهرب منها في أسرع وقت ممكن لأنها مش أمان خالص وبقى أكيد ان الروبوت هيقلبها منك مستقبلاً..

تخيل روبوت شغال خدمة العملاء..

هي كدة كدة شغلانة الناس بتزهق منها بسرعة سواء اللي بيشتغلها أو الزبون بتاعها.. بس دلوقتي بقى فيها عيب جديد وهي إنها بقت أخطر وظيفة في العالم وملهاش أمان ونسبة الخطورة فيها 99%.. السبب طبعا إنه طبيعي يستولى عليها برنامج كمبيوتر او روبوت لأن مفيش روبوت هيزهق أو يتعصب على الزبون ولا يمكن يرتكب خطأ فيها او ف خطوات القيام بيها.. كمان الناحية التانية من الوظيفة دي وهي المبيعات على التليفون .. الروبوت مفيهوش كسوف ولا بجاحة ولا استنطاع.. بالتالي متوقع انه هيأدي المهمة من غير زهق من الروتين بتاع خطواتها .. لا بيتعب ولا هيفرق معاه التارجت المطلوب تحقيقه ف الشغلانة دي مهما كان..

طب تخيل روبوت شغال موظف البنك..

خصوصا بقى لو كان متخصص في القروض.. ودي وظيفة خطورتها 98%، وطبعا معروف ليه.. إذا كان معظمنا بيكره الحساب وبيبقى عايز يخلص مشوار البنك بسرعة يبقى ليه ميبقاش فيه روبوت يظبط الدنيا لخمسين عميل في وقت واحد ف المستقبل.. دة غير طبعا ان معندوش أي مشاعر فهيبقى سهل عليه يرفض طلبات القروض بسهولة لو الضمانات مش عجباه ومفيش داعي للخناق..بسيطة يعني بالنسباله..

طب ماهو برضة الروبوت ينفع كاشير..

تخيل الطابور الطويل الرذل بتاع الزباين في أي سوبر ماركت أو مطعم.. وكل دة عشان ف الاخر تقف قدام ألة تدفع فيها دم قلبك تمن لمشترواتك.. مش أحسن برضه إن الألة يقف عليها ألة بدل مايبقى بني آدم من لحم ودم وتقعد تفاصل معاه.. خصوصا كمان الروبوت مش هياخد منك بقشيش.. مش محتاجه أصلا.. ودي وظيفة خطورتها على البشر 97%..

والوبوت برضة ينفع يشتغل محامي..

أي حد نفسه يبقى عنده محامي شاطر حافظ القانون كله ويعرف يطلع ثغراته.. دة طبعا معناه انه محتاج محامي بذاكرة حديد عشان يفتكر كل صغيرة وكبيرة ويعرف يفيدك.. وعشان محدش مننا هيقدر يحفظ القانون كله 100%.. يبقى خلينا في الأمان وسيب الكومبيوتر يحل الموقف.. أصل مش كل المحامين مبدعين زي "سول جودمان".. عشان كدة نسبة خطورة الشغلانة دي 94%.

وينفع يشتغل برضة سواق التاكسي.. إيه يمنع تفتكر..

احنا فعلا بدأنا نشوف علامات اختفاء الشغلانة دي من أول الأوبر لحد العربيات الألية اللي بتسوق وتركن نفسها بنفسها.. وطبعا دي كل اللي محتجاه وصلة انترنت وخريطة جوجل وعيش يا معلم.. الميزة طبعا إن محدش هيبقى قلقان إن الكومبيوتر ممكن يكسر إشارة مرور ولا يعمل حادثة ولا حتى هيطلب بقشيش أو يلعب في العداد.. يعني هيبقى أمان جدا.. ومش بعيد يطير بعد كدة كمان..

طب بلاش دة كله..تخيل روبوت شغال طباخ..

برامج الطبخ بتجيب مشاهدات كتير في التلفزيون لكن في أرض الواقع قريب اوي هتلاقي عدد الطباخين أقل الروبوت أكتر.. طبعا معروف السبب.. لو عندك مطعم الكومبيوتر هتحمل عليه الوصفة وهو يخدم ألف زبون في نفس الوقت ومفيش أوردر يتأخر.. كمان أحنا على أول الطريق في الحكاية دي.. كفاية انك تشوف الفرن الألي وهو بيعجن ويقطع ويطلع في الأخر 20 رغيف في الدقيقة وكلهم شبه بعض ومفيش واحد يفرق عن اخوه.

?