الستات أشطر من الرجاله في كل حاجة.. حتى اسألوا الكلاب

كلام ممكن يضايق اي ولد يقراه اي نعم..بس مش عيب خالص على فكرة إني أتحيز لأبناء جنسي .. خصوصا لمّا يبقوا جامدين كده في كل حاجة .. و دي حاجة واقعية لازم تتقبلوها من غير نفسنة .. وهنا بيحضرني مقولة رانيا يوسف في فيلم واحد صحيح لما قالت " إحنا اللي سايقين طول الوقت .. بس مدّينكم دريكسيون كده لعبة .. و مفهّمنكم إنه بجد"..

.

متهيألي كفاية قصف جبهة لحد كده .. و نتكلم جد شوية .. 

كلنا بنحب الحيوانات بدرجات مختلفة و خصوصا الكلاب .. كائنات كيوت كده ومفيش أوفى ولا أحن منها .. وفي نفس الوقت شرسة ومحدش يقدر يدُوسلها على طرف .. فلو انتي بنت و بتحبي الكلاب هتتبسطي أوي من الموضوع ده .. اللي بيتكلم إن البنات و الستات هم أكتر الفئات اللي بتقدر تفهم لغة الكلاب و بتقدر تفسر بدقة هما عايزين ايه .. مش بقولكم إن الستات مخلتش حاجة معملتهاش ..

واللي يثبتلكم إن الكلام ده حقيقي .. دراسة عملتها جامعة يوتفوس لوراند في المجر .. الدراسة دي شارك فيها 40 متطوع ما بين رجاله وستات .. كانت مهمة كل متطوع إنه يفهم الكلب عايز ايه من خلال الأصوات المختلفة اللي بتصدر عنهم .. 

ممكن تقول إن الكلاب كائنات ذكية بالفطرة و بتعرف تتواصل كويس مع البشر ف ده هيسهل الموضوع شوية .. أو إنه أكيد المتطوعين ليهم خبرة في تربية الكلاب ف هيفهموا بسرعة .. لكن على العكس .. مش كل المتطوعين كان ليهم خبرة مع الكلاب ولا حتى ربّوهم .. وده اللي خلى نتايج الدراسة فعلا مذهلة..

في بقى تقرير اتنشر عن الدراسة في مجلة التليجرام قال إن المتطوعين سمعوا أصوات مختلفة للكلاب تدل على 3 حاجات.. الحاجة الاولى صوت بيعبر إن الكلب عايز يبعد أي غريب عن أكله .. والحاجة التانية ان الكلب بيحاول يحمي نفسه من أي غريب بيهدد منطقته .. أما الحاجة التالتة ان الكلب عايز يلعب ويهزر .. وإتطلب من كل متطوع إنه يخمن كل حاجة من دول وايه هي المشاعر إللى بيحاول الكلب ينقلها من خلال الأصوات المختلفة دي .. 

الغريب والمدهش .. إن كل المشاركين قدروا يخمنوا صح .. وفهموا بنسبة كبيرة الكلب عايز يقول ايه .. وحوالي 63% حددوا الحاجة اللي الكلب عاوزها بدقة .. 

و من بين الناس اللي حددوا اسم الوضع صح .. تفوق الستات على الرجاله بنسبة 65 %  في مقابل 45% من الرجاله .. وده كلام الدراسة مش كلامي .. ده غير كمان إنه من 40:60 % منهم معندوهمش كلاب ولا حتى عندهم خبرة في تربيتها ..

 بجانب موضوع تفوق الستات على الرجاله :) .. أثبتت الدراسة حاجة تانية .. إن المتطوعين قدروا  كلهم يفهموا رغبة الكلب في اللعب أكتر من إنهم  يفرّقوا بين رغبة الكلب في حماية نفسه  أو رغبته في حماية أكله .. وده طبيعي ومنطقي لإننا واخدين على طرق الكلب في التعبير عن رغبته في اللعب .. لكن لما يكون كلب مش بتاعنا بيبقى صعب نحدد أوي الفرق ما بين رغبته في بعدك عنه أو بعدك عن أكله ..

و بعيدا عن اللعب .. كلنا تقريبا عارفين كويس لغة الكلاب اللي بنسمعها في الشارع كل يوم .. خصوصا لو الكلب عايز يقولك  "إمشي ياض من هنا" .. لكن اللي ممكن متعرفوش هو إن الكلاب بتبقى لطيفة مع الناس اللي بتتعامل مع أصحابها بلطف .. ورخمه مع الناس اللي بترخم على أصحابها .. يعني لو عندك حد مزهقك مترغيش معاه كتير .. إبعتله بس الكلب بتاعك و هو هيقوم بالواجب .. ده غير إن الكلاب بيقدروا يقيموا الناس بغض النظر عن مصلحتهم .. يعني لو بيحبك هيحبك لنفسك مش عشان بتأكله أو لأ .. وده على عكس القطط اللي بتجري بس ورا مصلجتها وتتمسح في اي حد عشان أكلها ..وبتاكل وتنكر..

علاقة الكلاب بالإنسان علاقة جميلة أوي .. وكل ما تتعمق فيها بتكتشف معلومات جديدة وغريبة .. أما لو بتقرف من الحيوانات وملكش في الكلام ده .. ف حقك علينا ومتزعلش نفسك  وإسمع فانكي ميوزيك 

احب أهدي الموضوع ده لكلبي العزيز "بولي .. وعايزة أقوله وحشتني ..