بالصور.. حيوانات حامل وف حالة حمل

من قديم الآزل والانسان بيتجوز عشان بيحب وعشان اللي بتحبه بتقوله لازم نتجوز عشان نحط حد للإشاعات اللي بتتقال عننا ف الغابة.. بالتالي بيتجوزها وبيحلف انه مش هيبص لأي واحدة تانية طول حياته..

بينتج بقى عن الجواز دة ف معظم الحالات حمل.. الحمل دة بينتهي برضة ف معظم الحالات زي ماكلنا عارفين بخلفة إنسان جديد.. الانسان الجديد دة بيبقى الناتج النهائي للتزاوج اللي حصل دة چينيا لأنه بيبقى ميكس چينات ورثها من امه وأبوه.. وف الأغلب بياخد من أمه أكتر ما بياخد من أبوه محدش عارف ليه.. ماعلينا..

حالة الحمل عند الانسان مهياش حالة الحمل الوحيدة ف الكوكب.. ابدا.. تقريبا كل الكائنات اللي عايشة على ضهر كوكب الأرض بتميل لأنها تتجوز عشان تتكاثر وتزود عددها او على الأقل تحافظ على سلالتها ونوعها وتضمن انهم مستمرين ف البقاء وسط باقي كائنات الكوكب..

الثدييات تقريبا بس هي اللي بتمر بحالة حمل شبه حالة الحمل اللي عند انثى الانسان.. نادرا بس لما حد بيركز مع الحيوانات وهي حامل.. جايز عشان بتبقى عدوانية وجايز عشان بتبقى متضايقة ومش طايقة نفسها.. زي انثى الانسان بالظبط..

دي بقى شوية صور بتوضح حالة الحمل عند بعضا من الكائنات اللي عايشة معانا على الكوكب ويعتبروا زملائنا ف الحياة.. إستمتعوا. 

انثى حمار وحشي مخطط حامل.. زي ماحنا شايفين ف الصورة واضح انها مش طايقة نفسها وبتفكر هتربي عيالها المستقبليين إزاي بعد ما أبوهم ف الأغلب خلع من الغابة وهرب.

غوريللا حامل برضة وزعلانة والزعل واضح على ملامحها بشكل مفيهوش فصال بصراحة.. تحس انها لا ليها نفس تاكل ولا تتكلم ولا تتحرك ولا تعمل اي حاجة ومصدومة ياعيني عشان فجأة إكتشفت انها هتبقى ام.

فرس بحر حامل ف عياله وواضح انه مخضوض وزعلان.. حقه بصراحة لأنه مش انثى ابدا.. دة دكر.. مهم تعرف ان فرس البحر أو حصان البحر (الاسم العلمي:Hippocampus) (بالإنجليزية: Seahorse) هو جنس من الأسماك بيتبع فصيلة زمارات البحر من رتبة زماريات البحر ( هي مكتوبة ف ويكيبيديا كدة والله) وبيوجد أكثر من 32 نوعاً معروفاً من افراس البحر دي والتي تتواجد غالباً في المياه الاستوائية والمتوسطة الضحلة.. بتحب افراس البحر تعيش في المناطق المحمية من البحار.. زي أرياف حشائش البحر والدكر عنده على بطنه كيس بتقوم الانثى بتخصيبه وتسيبه حامل وتمشي.. حقه يزعل والله.

غزالة حامل.. واضح من الصورة ان دي تقريبا اول غزالة حد يصورها ومتحسسكش ف الصورة انها جبانة وعاوزة تجري عشان مكسوفة وخايفة زي باقي الغزلان مابتعمل معانا.. دي بقى مختلفة خالص.. تحس ف نظراتها تحدي وثبات وبلطجة.. حقها بصراحة.. حامل وتعبانة ومش طايقة روحها ف التلج اللي هي واقفة فيه دة.

واضح من الصورة ان البقرة دي حامل وواضح برضة انها حامل ف أكتر من توأم.. برضة تحسها زعلانة وكسلانة وملهاش نفس تعمل اي حاجة وغالبا عدوانية او بتفكر ف الهروب من المزرعة بدليل السلسلة اللي مربوطة بيها ف دماغها.

دي تقريبا اول صورة لكائن منشكح عشان حامل.. واضح ان الغوريلا دي كان نفسها تخلف بقالها كتير ومكانتش بتوفق ف الموضوع وأخيرا حصل حمل.. ألف مبروك ياغوريللا.

كلبة بائسة خالص عشان حامل.. واضح ان الحمل مش مخليها عارفة تتحرك خالص ياعيني.. كمان لاحظ الغُلب البيور اللي بيشع من عينيها.

سنجابة حامل وواضح من الصورة انها مندهشة او مش مبسوطة من اللي حصل وبتفكر ازاي هتعمل دايت بعد ماتخلف عشان ترجع تاني رشيقة وجوزها ميطلقهاش عشان تخنت.. مسكينة.. متعرفش ان دة مبيحصلش الا عند الانسان وبس.. باقي الكائنات ولا بتفكر ف دايت مهما تخنت ولا بتفكر ف طلاق عشان سبب تافه زي دة.

واضح ان انثى الفيل دي معجبهاش اساسا ان المصور حاول يصورها وهي حامل وسابته ومشيت اساسا.. حقها تحافظ على خصوصيتها وحقها متتصورش الا وهي ف احسن حالة نفسية وجسمانية ممكنة طبعا.. بس البشر مبيفهموش الموضوع دة لما يكونوا عاوزين يصوروا اي حاجة عشان ياخدوا عليها لايكات وشير على الفيسبوك.

صورة نادرة بتوضح اكتر من دكر فرس البحر وهما بيشتكوا لبعض من اللي مراتاتهم عملته فيهم ف الاغلب.. خد بالك من كم البؤس اللي مرسوم بدقة على وشوشهم.. حالهم يصعب على اي حد والله.. معرضين للإنقراض وكمان الدكر فيهم خرج من الجواز حامل.

سنجابة تانية حامل غير الاولانية بس واضح ان دي فعلا مش طايقة حد ييجي ناحيتها او يصورها.. خد بالك من انفعلات وشها اللي بتنم ف الاغلب عن عدم رضا.. حقها بصراحة.

السُرقاط  أو الميركات (الاسم العلمي:Suricata) هو جنس من الحيوانات يتبع فصيلة السموريات من رتبة اللواحم. ومعنى اسمه (ميركات) باللغة السواحلية هو قط الصخور.. والسرقاط مالوش اي دعوة من قريب او من بعيد بالقطط.. واضح ان انثى السرقاط دة بتبص يمين وشمال عشان تتأكد ان محدش بيبص عليها قبل ماترمي نفسها من فوق الصخرة عشان تعبت من الحمل وقرفت من الجواز.

قطة حامل مش طايقة روحها.. خد بالك من وضعية القعدة وخد بالك جدا من النظرة اللي ف عينيها واللي بتقول للي بيصورها.. " إلعب بعيد بالكاميرا دي بدل ما اقوم اكسرهالك".

انثى دلفين ابيض حزينة عشان حامل.. الصورة واضحة ومش محتاجة تفسير.. ولا عارف تعوم ياعيني ولا تعمل اي حاجة.. حقها تزعل وتتقمص طبعا.

واخيرا القطة الكيوت الحامل دي.. مندهشة مفزوعة ومش مصدقة ان حصلها كدة.. لأ وكمان ف الشتا.. ياللا.. معلش ياقطة.. بكرة تلعبي مع عيالك وتفرحي وتنبسطي بيهم ويملوا عليكي حياتك.. خصوصا وانك ولا هيبقى مطلوب منك تذاكرليهم ولا تدخليهم مدارس من اساسه.. يابختك والله.

لو عجبك الموضوع دة وحابب تشوف زيه أو أحسن منه خش هنا قط بلدي