التوقيت الجمعة، 29 مارس 2024
التوقيت 07:07 ص , بتوقيت القاهرة

خالد صلاح: التوراة بنسختها اليونانية خرجت من الإسكندرية

خالد صلاح
خالد صلاح

تحدث الكاتب الصحفى خالد صلاح، رئيس مجلس إدارة وتحرير "اليوم السابع"، خلال ببرنامجه الإذاعى "صالون مصر"، على إذاعات راديو النيل والتى تضم "ميجاFM، وهيتس، وشعبى FM، ونغم FM"، عن مدينة الإسكندرية وتاريخها الفكرى والدينى فى العالم القديم.

وقال الكاتب الصحفى خالد صلاح، رئيس مجلس إدارة وتحرير "اليوم السابع"، خلال برنامجه: "مدينة الإسكندرية شهدت أحداث كثيرة.. أقسم لكم إن إسكندرية بلدنا الجميلة والمدينة العظيمة وعروس البحر المتوسط تاريخها لا يمكن تفصله أبدا عن كل تاريخ الفكر والأديان فى العالم.. أنا لما بشوف وأقرأ كل حاجة وأجد أصلها راجع لإسكندرية بندهش وأحزن فى نفس الوقت، بندهش إن بلدى كان فيها حاجة عظيمة زى كدا، وبتحسر عشان مش كتير عارفينها.. أنا عاز أقولك إن الإسكندرية مش بس بناها الإسكندر الأكبر كمعمار، بل شاهدة على كل حاجة حصلت فى التاريخ، لأنها كانت واحدة من 4 مدن أو 5 مدن فى التاريخ القديم تسيطر على حركة الفكر والأديان، ومش

هتصدق إن التوراة بنسختها اليونانية طلعت من الإسكندرية وأكبر صراع فى تاريخ المسيحية حصل فى إسكندرية"

.

وواصل قائلًا : " أنت عندك 4 مدن كانوا مسيطرين على العالم كله، وهم أثينا وروما وأنطاكيا وإسكندرية وأضيف عليهم بيت المقدس والقسطنطينية، وخد بالك كل المدن دى شهدت صراعات وحروب متنوعة، لكن إسكندرية شهدت كل الأفكار والصراعات والتاريخ".

وواصل: "هديك مثل تانى على عبقرية المدينة الساحرة.. أنت عارف إنه لما مات الاسكندر انقسمت الإمبراطورية ما بين قواده، فبطليموس خد مصر، اللى كانت الإسكندرية رمزها وعاصمتها وسلوقس خد منطقة الشام ونشأت الدولة السلوقية فى بلاد الشام.. عاوز أقولك إن السلوقيين دول عذبوا اليهود فى بيت المقدس عذاب لا قبل لهم به، عذاب رهيب لدرجة إنهم كانوا يجبروهم إنهم يسجدوا للآلهة زيوس من دون الله تعالى".

وأضاف: "راحوا فين اليهود.. جاءوا إسكندرية ونشأت جاليات كتيرة جدا فى الإسكندرية، وهؤلاء اليهود صاروا أساس التجارة فى المرحلة الرومانية لما روما صارت زعيمة العالم والإمبراطورية الأكبر فى التاريخ.. كل تاريخ إسكندرية مليان بالتفاصيل الكبيرة والكتيرة، وكانت الإسكندرية طوال الوقت ملجأ المفكرين والفلاسفة والعظماء جميعًا، كان فيه حادث صعب جدًا فى تاريخ الإسكندرية لما المسيحيين المؤمنين المتحمسين فى هذا الوقت انقلبوا على الوثنيين، والقصة الشهيرة بتاعت هيباتيا، لما أخذوا واحدة من كبار الفلاسفة والعلماء وشردوها فى الشوارع وسحقوها لينتصر الدين السماوى على الدين الوثنى وكانت هذه الواقعة تاريخية وكبيرة جدًا، وكانت جزء من الصراع المسيحى الوثنى فى ذلك التوقيت وبطلتها كانت هيباتيا، وأحداثها جرت على أرض مصر فى مدينة الإسكندرية.. كما أن أكبر صراع فكرى تم مدينة الإسكندرية.. وبحكى الحاجات دى عشان تعرفوا لأى مدى إن الفكر والعقل كان جوهر مصر وزينتها، وعشان دعاة التخلف والجهل مياخدوش فرصة علينا".