دلع ودنك معانا

ودنك هي حلقة الوصل بينك وبين العالم.. يعني لازم تهتم بيها وتقدرها أكتر من كدة على فكرة وهي مطالبها سهلة وبسيطة.. يعني مش هتطلب منك تخرجها ولا تأكلها ف مطعم غالي كل اللي هي محتاجاه إنها تتسلطن وتسمع حاجات تنعشها وتفرفشها من فترة للتانية.. وبما إن مهمتنا هي إسعاد ودان كوكب الأرض.. ف قررنا نفضي نفسنا كل يوم حبة عشان بس ننقيلك الحاجات اللي تفرفشها وتنعشها..

وكل المزيكا الجميلة دي هتلاقوها بكل الأذواق والمقاسات ف أكتر من بلاي ليست ف قسم المزيكا عندنا.. وأكيد هتلاقي اللي يناسب ودنك ومزاجك

النهاردة هناخد ودانكم ف مشوار صغير لعالم الأفراح والليالي الملاح بقيادة مطربة الزغروطة الحلوة فاطمة عيد..

معلومات ع السريع عن فاطمة عيد 

فاطمة عيد من مواليد محافظة الشرقية سنة 1962.. موهبتها ف الغنا ظهرت وهي طفلة لدرجة إن أهلها ف قريتها القنايات كانوا بيجبولها كرسي عشان تقف عليه وتغني ف الأفراح والمناسبات السعيدة.. بعدها كبرت فاطمة عيد وكبرت موهبتها معاها وبدأت تتخصص ف الغنا الشعبي والفلكلور وكانت أول حفلة ليها ف السبعينات على مسرح الجمهورية وقدمت فيها أغاني من فلكلور الريف المصري زي "آه ياليل" و"خلي بالك" و"ياصغيرة"..

إنطلقت بعدها فاطمة عيد ف مجال الغنا الشعبي وتميزت ف أغاني الأفراح.. ومكنش فيه فرح أو ليلة حنة ف مصر إلا وكانت أغاني فاطمة عيد أساسية فيه.. طبعا دة أيام التمانينات والتسعينات قبل ما تطلع موضة المهرجانات وغيرها..

إتجوزت فاطمة عيد من اللواء شفيق الشايب وبنتها الفنانة شيماء الشايب إللى دخلت المجال الفني من خلال تقديمها لأغاني أم كلثوم.. 

إختفت فاطمة عيد عن الساحة الفنية خلال فترة الألفينات ومظهرتش غير ف أغنية راب مع أحمد مكي  ف مسلسل الكبير أووي.. 

بالرغم من الوقت الطويل دة إلا إن أغاني فاطمة عيد عاملة زي الماركة المسجلة إللي بترجعك لذكريات حلوة كلها فرح وبهجة.. إستمتعوا

أغاني فاطمة عيد