التوقيت الجمعة، 29 مارس 2024
التوقيت 03:55 م , بتوقيت القاهرة

موسِم المَجاعَة

في الأيام دي من كل سنة تستعد الأسرة المصرية الصَميمة لاستقبال شهر رمضان.. حيث يتم تكرار نسخة طبق الأصل من طقوس استعداد السنة اللي فاتِت، واللي قبل اللي فاتِت، واللي قبل قبل اللي فاتِت.


قابلت السِت المصرية الصميمة أثناء وجودي بالسوبر ماركت.. لقيتها جاية تجري ناحيتي بعربياتها.. وشِّها أحمر وتتَصبَّب عرَقاً تقولش واصلة من سِباق عشروميت متر جرىّ؟.. وقالت لي وهي بتنهَج:
- ماشوفتيش "جوزة الطيب"؟
- مين؟
- "جوزة الطيب".. ماتعرفيش حاطينها فين؟
- طب خُدي نَفَسِك بس.. مين جوزة الطين دي؟
- جوزة الطيييييب
- هو حضرتك لسة عندك مكان تحطي فيه حاجة في الـ 3 عربيات اللي جراهم دول؟
- رمضان بقى كل سنة وإنتى طيبة.
- وحضرتك بالصحة والسلامة.. مش أوفر شوية؟
- هو إيه؟
- تخزين الأكل ده كله. 
- مش صيام يا بنتي؟
- أيوة صيام.. يعني وجبة واحدة.. ولا إيه؟
- أيوة الفطار.
- بالظبط كده.. طب إيه؟
- هو إيه اللى إيه؟
- بالنسبة لأهرام الرز والمكرونة والسكر والسمن دول لبيت ولا لمطعم؟ 
- لبيت طبعًا. 
- بالهنا والشفا.. والبيت ده كام دور؟
- مافيش أدوار.. دى شقة 3 أوَض وصالة.
- ما شاء الله.. بس التلات أوَض والصالة مش حايقضوا لتخزين جبال الأكل دي على فكرة!!
- حايقضوا طبعاً؟
- صدقيني أبدًا.. دول محتاجين على الأقل 3 أبراج وصالة.
- الله أكبر من عينيكي يا شيخة.
- ماشي ولو إني مش بحسِد والله. 
- هو إحنا لسة خلَّصنا شِرا.. لسة بدري.
- لا والله؟!!
- طبعاً.. اللحوم لزوم التغذِية، والياميش لزوم الخشاف، والتسالي لزوم المسلسلات، والفول والبيض لزوم السحور، و...
- كفاية الله يخليكي.. بطني وجعتني!!
- ولسة المشروبات الرمضانية.. الكركديه والتمر هندي والخروب وقمر الدين و...
- كُلهُم؟؟!!
- كُلهُم طبعاً... دى مهمة جدا للطاقة.
- كل دى طاقة؟ هو إحنا داخلين على حَرب ولا إيه؟
- لأ بس رمضان بيسبب خمول في الجسم.
- وبالنسبة لكل الأكل والشرب ده مش بيفطَّس الجسم؟
- طب ما تشوفي لنا "جوزة الطيب" فين بقى.
- "جوزة الطيب" إيه بس؟... ده انتى محتاجة شجرة عيلة "الطيب" كلها عشان تقَضى كل الأكل ده!!
- شكلك مش عارفة "جوزة الطيب"؟ إنتي مش من هنا ولا إيه؟
- من هنا.. بس يعني إذا كنت مش فاهمة تلال الأكل دي لازمتها إيه في الصيام، حافهم "جوزة الطيب" لازمتها إيه فى الطبيخ؟
- والنبي شكلك ما بتصوميش.
- وهو إحنا بنصوم عشان نعوَّض أكل اليوم كله في وجبة واحدة؟!
- لأ بس الواحد بعد الصيام بيبقى محتاج يتغذَّى.
- أيوة يتغذَّى مش يتنفِخ على 90!!
- ما هو الجسم لا زم يعوَّض الصيام. 
- بس الكمية دي مش لتعويض صيام.. دي لتعويض مجاعات الصومال والعياذ بالله!!