التوقيت الإثنين، 03 أكتوبر 2022
التوقيت 08:57 م , بتوقيت القاهرة

سلطة خضرا

يسعد أوقاتكم ..
سلطة خضرا "ميكس" لشوية مشاعر مالهاش أي علاقة ببعض خالص..  يارب تحبوها.


" السحابة"
فيه بنت بتبقى شبه السحابة.. 
شوية مشاعر خفيفة ورقيقة طايرة مع أحلام في السما..
البنت دي اللي لما بتغضب بتتحول حياتك لغيمة بتخفي نور الشمس ولما بتصفي بتلاقي الدنيا منوّرة ...
البنت دي اللي ماتقدرش تمسكها بس تقدر تشوفها وتحس تأثيرها..
البنت دي اللي لما بتقرر تبقى كريمة بتملى الأرض كلها خير.. 
البنت دي مستحيل تسحبها ليك لأرضك..
البنت دي عشان توصلّها.. لازم تطير.. هتعرّف؟


"صورة سيلفي"
- إنتي مش كان عندك كاميرا "كوداك"؟ ولا دي كانت "فوجي" باين؟


- فوجي


- فاكرة صورنا وإحنا في تالتة إعدادي يوم عيد الطفولة؟ ماما شايلاها في ألبوم الصور بتاعتي لحد دلوقتي.. فاكرة يومها كنت هموت واتصور معاه.. هو فين دلوقتي صح؟


- بيقولوا عنده بنتين وعايش في كندا أو ولد وبنت وعايش في الكويت أو ماتجوزش وبيشتغل في السعودية.. أنا مش عارفة أصلا إنتي قصدك على مين فيهم.


- عموما عندي صور كتير في الألبوم ده لينا من أيام إعدادي وثانوي.


- ده نفس الألبوم اللي فيه صورتك بشنب؟


- أيوه ياختي هو نفس الألبوم اللي عليه من برا منظر طبيعي ومن جواه فيه صورتي وأنا طفلة بلبوصة بعدها طفلة هابلة بعدها طفلة بشنب بعدها أمورة .. ماتضحكيش وما تمثليش أكيد عندك زيها بنفس ذات ترتيب المراحل. 


- عارفة يا نور الصور زمان كان ليها طعم مختلف.. كانت كل صورة محسوبة وملموم فيها أكتر عدد من الناس. 


- صح .. مركزين أوي ومتجمعين عشان مفيش في الفيلم صور كتير نقدر نخسرها..  كنت بحب انتظارنا للصور تتحمض ونشوفها .


- وأنا كمان.. بس أنا كنت بحب أكتر صورنا في الاستوديو يوم العيد باللبس الجديد.. لسه عندك؟


- أكيد طبعا في نفس الألبوم.


- على فكرة دي معايا في المحفظة وياريت كفاية رغي مش عارفة أخد ولا سيلفي عدل النهاردة بسبب رغيك.


- خلاص أهو " إممممممم".


"دفاية"


أنا عمري ماهبقى لحد دفّاية ..
في ركن الأوضة محطوطة..
بتنسى أوام ليالي الصيف.. ليالي كتيرة ناسياها.
بلمسة هتشتغل ليكي..


أنا عمري ماكنت لحد دفّاية ..
ف ركن الأوضة محطوطة ..
 بلمسة هتتملي بالدفا وتنسى ليالي سايباها..
و لما تقرّبي .... تدفيكي..


أنا ماقدرش أكون موسم! أنا معرفش أكون غير عمر..
 أنا معرفش أكون صورة على حيطتك وعجباكي.. ساعات عينك عليها تمر..
 أنا ما أقدرش أكون أحلام.. بتصحي الصبح ناسياها..
 أنا معرفش أكون غير دنيا.. حسّاها وعايشاها..
 أنا ولا جزء ولا أجزاء ...
 و لحد ما تفهمي قلبي...
 لا أنا عاشق .. و لا مشتاق ..


"مش بلد البنات"
بنات .. بنااات ..
في بلدي البنات..
كل البنات..
مالية دماغها.. خوف م الحاجات..
في بلدي البنات..
كل البنات..
ماشية وخايفة من لمس أو نظرات..
وقبل ما طنط تجيلها وتزور..  وقبل ما تفضل تقول في حكايات..


بنااات.. بنااات
عن بنت جارتها بارت.. وقصص قطر وطابور.. 
تسمعها البنات.. بتجري وتهرب..
في بلدي البنات.. كل البنات..
لا عارفة تعاند ولا عارفة تثور..
لكن ساعات كتير م الساعات.. بيبقى الهروب من أسوأ حاجات.. لأتعس حاجات.. 
في بلدي البنااات..
مش ف بلد للبنات..
بنات.. بنااات..



 


لمتابعة الكاتب