التوقيت الإثنين، 03 أكتوبر 2022
التوقيت 07:04 م , بتوقيت القاهرة

أسرار إيجاد العمل السبعة

بيقولوا السوق هيفتح..


الكلمة الأكثر أملا في أوساط الشباب هذه الأيام.. من يعمل يحلم بفرصة بمرتب أعلى.. ومن لا يعمل يبحث عن فرصة أولى.. أما الطلبة فكلهم أمل في وظيفة تبعد عنهم شبح القهوة.. النهاردة هنشارك بعض بشوية أفكار تخليك مش فارقة معاك السوق يفتح أو لأ.. أفكار تخليك مميز والشغل سواء جوه مصر أو بره هو اللي يدوّر عليك... مش مصدقني؟ طب تعال نشوف.


أولا: هنبدأ من بدري أوي.. لو أنت لسه في الكلية.. خلينا نتفق على حاجة.. نظام التعليم اللي إحنا فيه ده مالوش أي علاقة بسوق العمل بالذات للكليات الهندسية والأدبية.. يعني هتجيب امتياز وتطلع الأول مش هيفرق مع أول إنترفيو قدام واحد بمقبول ومعاه لغة قوية وبرامج كمبيوتر.. لو أنت مدارس لغات هتوفر على نفسك مشوار طويل في اللغة لو لأ خلي عندك هدف.


خلاص عندك هدف؟ تمام دلوقتي هنبدأ.


كل صيف خد كورسين لغة وركّز ع المحادثة وكل أجازة نص سنة خد برنامج كمبيوتر.. ابدأ بالوورد والإكسيل عشان دول أساسيين في أي شغل.. لو مش معاك فلوس.. النت يا صديقي هو الحل.. استخدم بقى النت مرة في حاجة مفيدة.. اليوتيوب للغة وفي مواقع بتعلم كل حاجة أون لاين و ببلاش زي alison.


في الموقع ده ممكن تتدرب على حاجات كتير.. لغات أو تسويق أو إدارة مشروعات أو إدارة موارد بشرية أو حتى فروع كتيرة في الهندسة والطب مجانا.. التدريب ليه أكتر من فايدة.. في نهاية البرنامج التدريبي بتمتحن ولو نجحت ممكن تطلب منهم شهادة بسعر رمزي.. بس صدقني مش فارقة الشهادة. دلوقتي ممكن تعرف أكتر عن الموقع ده في الفيديو ده.



ماتفرقش واخد كورس إيه فين.. ما تفرقش الشهادة دلوقتي خالص المهم بتعرف تشتغل وفاهم أو لأ وبتعرف تتكلم إنجليزي كويس ولا لأ.


لو مهندس.. فيه مراكز حكومية بتدي كورسات هندسية محترمة بفلوس قليلة زي جامعة القاهرة.. وفر كل تيرم تمن عشر علب سجاير ولا كام حجر ولا تمن كام خروجة أو حتى مكياج..وفيد نفسك بكورس. ما تأجلش لحد ما تخلص.. لما تخلص فيه حاجات كتير تانية
لو في كلية أربع سنين وجرّبت ده.. هتتطلع واخد 8 مستويات لغة وأربع برامج كمبيوتر ع الأقل.


المهم ما تاخدش الكورس وتنساه.. علّم نفسك ودرّبها


ثانيا: خلصت كلية.. مبروك...جه وقت التعب بجد.. ريح شوية بعدها شوف أي شغل حتى لو برّه مجالك.. ما تقعدش في البيت.. أسهل حاجة شغل الكوول سنتر.. لأن عقلية المجتمع لسة مش متزبطة مع أي شغلانة.. الكول سنتر اعتبرها خطوة مؤقتة تصرف على مذاكراتك ونفسك لحد ما تاخد الخطوة التانية وتنمي نفسك.


نصيحة من أخ ما تنميش نفسك بدبلومة في أي جامعة حكومية.. مش طالبة محاضرات تاني ونقل شيتات.. دوّر على شهادة دولية كبيرة معتمدة واسع ليها.. ادفع تمنها من شغلك المؤقت.. واصبر شوية لحد ما تنجح فيها.


ثالثا: نجحت؟ مبروك تاني.. بتفكّر تسافر؟ لأ استنى شوية.. شوف شغل في مصر.. عشان سفرك صغير بيعرضك للاستغلال.. ماتركزش في المرتب أوي ولا اسم الشركة المهم تشتغل باللي درسته من برامج وكورسات.. مهم أوي دلوقتي تعمل حساب على www.linkedin.com ولو ماتعرفوش ده موقع بيهتم بالجانب العملي لشخصيتك حاجه شبه "فيس بوك".


اكتب فيه كل حاجة عنك.. اعمل صفحة حقيقية ومحترمة واهتم بيها.. وما تكذبش.. تابع الشركات الدولية الكبيرة بره مصر وفي مصر وإعلانتها ده الاتجاه البديل دلوقتي في العالم كله.. عشان تعرف تعمل حساب عليه إزاي.. شوف الفيديو ده:



رابعا: في كل شغل حافظ على علاقتك بكل حد صغير أو كبير.. ماتنافقش وماتتذلش.. خليك بسيط وفي نفس الوقت حكيم.. ماتتغرش وما تتهزش.. اتعلّم وحاول تاخد خبرة التعامل مع الناس دي أهم خبرة.


خامسا: لو فكرت تسافر.. ابعد عن مكاتب السفريات أنت تقدر تجيب عرض عمل كويس بالنت وتعمل المقابلات بالسكايب.. وقبل ما تسافر لازم تشوف أي حد من زمايلك برّه مصر في البلد دي يعرفلك تفاصيل الشركة، واهتم يكون العقد متوثق ومسافر بفيزا مكتوب فيها مسماك الوظيفي هناك.. مش تبقى مهندس وتروح بفيزا مشرف وتتدبس هناك.


سادسا: لو قررت تفضل في مصر.. ماتستقرش في شركة أكتر من سنة أول كام سنة في حياتك.. لو شاطر الفرصة هي اللي هتجيلك.. تنقلّك بين الشركات مفيد في الأول خبرة وزيادات في المرتب لو فضلت ثابت غالبا مش هتزيدها.


سابعا: ماتوقفش دراسة برامج.. وما توقفش تدوير ومذاكرة عشان تفضل سابق اللي حواليك بخطوة وفرصك في النجاح تزيد.. ماتخليش قصص الكوسة تحبطك.. صدقني الكوسة بتجيب فرصة بس مش بتحافظ عليها.. مفيش صاحب عمل هيخسر شركته بسبب موظف فاشل حتى لو بكوسة.. حافظ على علاقتك بمديرك حتى لما تمشي من الشركة.. السوق دوّار لما هيتزنقوا أول حد هييجي ف بالهم ناسهم القدام وساعتها هترجع بمرتب أعلى و مسمى وظيفي أعلى.


م الآخر..


هتتجح لو قررت إنك تنجح.. خليك أمين وعملي وخلي هدفك زي الشمس قدامك ما تكسلش وتعتمد على الطرق التقليدية بتاعة زمان.. فكر برّه الصندوق..واتعب شوية بس.. وهتلاقي بكرة أحلى.. بالنسبة لطلبة طب وصيدلة.. تطبق الشروط والأحكام.