التوقيت الإثنين، 28 نوفمبر 2022
التوقيت 04:22 م , بتوقيت القاهرة

رسايل صغيرة ع "الواتس آب" (2)

خواطر حقيقية جدا.. اتكتبت من أبريل 2014 لمارس 2015


النهاردة كمان فيها حب.. وأمل.. وفرحة.. حبيت أبعتهالك في رسايل صغيرة ع الواتس آب.. يلا بينا..


(11)
بكرة أحلى..
وصدقني لو مفيش في إيديك أي معطيات أكتر من رغبتك تحلّيه.. هتعرف تخليه أحلى.


(12)
يارب..
يارب ياللي وهبتني عمري وعيشتني أيامي..
يارب ياللي ادتني حريتي في رسم أحلامي..
واديت لعقلي وروحي أمل نوّرلي قدامي..
النهارده خنتك وملاني يأس .. 
آسف نسيت إنك معايا وإنك حبيبي..


(13)
ممكن شعور يوّلد كلام ممكن شعور يوّلد سكوت...
لكن الأهم أن الشعور يفضل شعور..


مش كلمة فاضية في لحظة تموت..
بيموت الكلام ويعيش الشعور...


(14)
إحساس رائع بالحنين لسنين فاتت لما سمعت اتنين في سن أبويا ع القهوة جنبي بيقولوا لبعض نكت.. رغم إنها كانت نكت رذلة جدًا.. بس ضحكت.. كانوا قاعدين بيكلموا بعض.. بيحكوا ويضحكوا.. من غير ما كل واحد فيهم يمسك موبايله.. روحوا بعدها مبسوطين.. من غير ماياخدوا ولا سيلفي. 


(15)


مش لازم تبقى أشطر واحد في شغلك عشان تبقى أنجح واحد.. مهم تبقى شاطر وفاهم الشغل، بس الأهم تعرف تفهم الناس وتعرف تشتغل في فريق من غير ما تكون تابع أو منافق أو ظالم.. النجاح مش بس تعب.. شوية تعب ومحبة وتركيز وذكاء.. هيوصلوك للحظ الحلو..بعدها هتوصل للنجاح.. اللي سبقوك مش أحسن منك.


(16)
كان عيد ميلاده الخامس والعشرون.. كتب تمتعت الدنيا بـ "أنا" خمسة وعشرين سنة كاملة.. حسنا يا صديقي.. كم تمتعت أنت بالدنيا في هذه السنوات؟.. هذا هو عمرك الحقيقي.


(17)


عارفة إنك فرّقتي بينهم بضحكتك..؟ أجمل فراق كان يوم فراق قلبي لوحدته..
الوحدة راحت.. والفرحة زادت.. والقلب حبك.. وبقى طريقك.. سكته..


(18)


في ناس الحزن بيبنيها..
وناس الحزن بيهدها..
بس في الحالتين الحزن لما بيعلّم .. بيعلّم..


(19)
أسوأ العلاقات هي العلاقة المبنية على الخوف.. لو حد بيحترمك عشان بيحبك.. هيفضل يحترمك حتى لو ضعفت.. ولو بيحترمك عشان بيخاف منك.. يوم ما هتضعف هتبقى منبوذ.. اعمل حساب لحظات ضعفك.. إحنا بشر.


(20)
لحبيبتي أمي.. وكل أم.. هكتبلك قصة ما اخترتلهاش بداية.. بدايتها كانت منك.. بدايتها كانت فيكي.. وأصلا إنتي كل الحكاية.. لما اتحضنت.. كان حضن عمري مازهقت منه بعدها وبقى فيه حياتي كلها.. دقات قلبك.. حفظتها روحي وبقت سلامي.


ولما بدأت أقول كلام.. كان اسمك إنتي أول كلامي.. وكبرت جنبك.. وكبرت بيكي.. وبدأت أفهم كل نظرة من عينيكي.. أوراق مذاكرة.. ووجع سنان.. وضحك لعبي.. وزعاق كمان.. زنقة فلوس.. جمعية عشان مصاريف دروس.. وفرحة لما سمّعت صح كل النصوص.. لمتنا جنبك وفرحة بنجاح.. وألف غلطة يقابلها منك دايما.. سماح.


دمعة عيونك وانتي شايفة بالبدلة ابنك يوم الفرح.. دمعة فرح.. بتعب سنين لأحن قلب ياما انجرح.. أنا عمري ما كتبتلك وعمري ما اتخيلت أوصف بإيه إحساسي بيكي.. وأنا كل خطوة ف حياتي ديه متباركة بيكي..وإزاي هقولك بحبك.. وإنتي اللي علمتنيني الحب.


بحق كل خطوة بألم وتعب.. بحق كل دعوة ليا م القلب.. بحق كل فرح وحاجة حلوة اتزرعت بحب.. بقولك بحبك يا أمي.


خلصت الرسايل ... 


لمتابعة الكاتب