التوقيت الإثنين، 03 أكتوبر 2022
التوقيت 06:51 م , بتوقيت القاهرة

رسايل صغيرة ع "الواتس آب" (1)

خواطر حقيقية جدا.. كتبت من 2011 لـ 2014

كانت بتديني أمل كل ما بحس بيأس.. حبيت أبعتهالك بصورة شخصية في رسايل صغيرة ع "الواتس اب".

(1)
إحساسنا بحريتنا بيتناسب عكسيا مع إحساسنا بضعف القيود مهما كانت قوية.. وطرديا مع قوة إرادتنا في إننا نكسرها.

(2)
راحة البال.. مش بتيجي غير لما تحس إنك عملت اللي عليك.. حب نفسك واغفر لها اللحظات اللي كانت فيها ضعيفة.. راحة البال مش نتيجة.. دي لازم تبقى قبل ما تبدأ في أي خطوة في حياتك.. راحة البال عمرها ما بتيجي طول ما أنت عندك مشاكل مع نفسك أو مع حد.

مفيش حاجة أسهل من الإحساس ده ومفيش حاجة أصعب منه في نفس الوقت.. بس علاجة بسيط .. اتصالح مع نفسك.. وحبها.. خلي نيتك صافية وأهدافك واضحة زي الشمس.. وقول يارب

(3)
ما تجادلش إنسان حاسس بفكره.. الكلام ممكن يغيّر اقتناع بس مستحيل يغيّر إحساس.. الإحساس مايغيّروش غير إحساس أقوى منه.

(4)
العالم فيه شخصيات كتيرة.. كل واحد فيه حاجات بتضايقه وتبسطه غير التاني.. وأحلام وطموحات غير التاني.. كل واحد في البشر بشخصياتهم بتتخلف الطرق اللي بيها بيتغيّروا واللي ليها بيتغيّروا. 

بتتغيّر العصور والمجتمعات والعادات والتقاليد.. وبتفضل حاجة واحدة بس ليها القدرة على التغيير الصادق وبتدي طاقة إيجابية لكل إنسان بيعيش.. الحاجة دي هي الحب.. مش مجرد الحب كارتباط عاطفي.. بس الحب المطلق كشعور.

في الأول الحب ده كشعور نعمة من ربنا.. وفي الآخر برده هو اللي بيوصلنا لربنا..وفي "النُص" بينهم هو اللي بيخلّينا نعرف نعيش.

(5)

كتير من كوابيسنا بنتعود عليها.. بتبدأ بخوف بس كل ما تتكرر كل ما نتعوّد عليها.. وبتبقى مألوفة لينا.. الموضوع ببساطة كأنك بتشوف فيلم رعب لأول مرة.. بتبقى خايف.. بس لو شفته تاني بتخاف أقل.. مع الوقت ممكن تشوفه وأنت بتاكل وأنت بتقرا.. الكابوس الحقيقي.. لو اتعودت عليه لدرجة أنك تحبه ويتحوّل تدريجيا لحلم.. ساعتها مابتبقاش عارف أنت مين" ملخص سيناريو فيلم أرض الخوف.

(6)

إحساسك بالغرور بيقتلك مرتين.. أول مرة لما بتفقد احترامك لأفكار وعقول اللي حواليك.. وتاني مرة لما بتفقد إحساسك بالرغبة في التطوير وساعتها بتنهار.. تماما.

(7)

ماتقولش لأ بصوت واطي ولا لأ خجولة! ومتقولش آه بتردد ولا آه من ورا قلبك في أي قرار.. أي قرار لازم يبقى نجمة.. مصدر نور بينوّر فكرك صبح وليل.. ساعتها عمرك ما هتحس بندم على أي قرار.

(8)
تأكد إنك بتحب حد (بجد) لما تحس إنك محتاج تخلّي الحد ده مبسوط.. لما تتحول مشاعرك وتصرفاتك من أنا عاوز أفرح لـ أنا عاوزه يفرح وبالتبعية.. صدقني هتلاقي سعادتك جات من غير ما تقصد.. ووقتها هتبقى أحلى سعادة في الدنيا.

(9)
أهم ناس وأغلى ناس بتعرفهم وأنت في أسوأ حالاتك (فقر- مرض- جرح- فشل).. ساعتها خليك واثق.. الناس دي بتحبك بجد.. أوعى تخسرهم.

(10)
إهداء مجنون:

بحب كلامك وسكوتك.. وبشحن حلمي أنا من صوتك.. بحب زعاقك وهدوئك.. وبحبك عاقل أو مجنون بحبك صاحي أو نعسان وهكونلك أكل لو إنت جعان.. بحبك مشتاق أو تقلان.. وبموت أنا فيك كده وأنت حنون.