"وزة"، هكذا يطلقون عليه، أشهر دي جي في عالم المهرجانات، لم يتحدث لأي وسيلة إعلامية من قبل، لكنه قبل أن يحاوره "دوت مصر" لأول مرة، ويناقشه في الانتقادات التي توجه لموسيقى المهرجانات.

اسمك الحقيقي إيه؟

علي إبراهيم، وعندي 24 سنة.

دارس إيه يا وزة؟

آثار.

طب وليه ما اشتغلتش بدراستك واخترت المهرجانات؟

عشان بحب المزيكا، وأخويا اللي أكبر مني دخلني في الموضوع، وعلمني من الأول، بس هو بطّل حاليًا.

بتشتغل دي جي بقالك كام سنة؟

11 سنة.

وإيه اللي بيميز وزة عن غيره؟

مزيكتي وطريقة شغلي، في الميكس واختيار الأغاني.

شاهد "وزة" في فرحة السادات 

دخلت مجال المهرجان من امتي؟

من أول ما طلع، ومن قبل المهرجان وأنا دي جي.

اشتغلت مع فرق زي مين؟

مع كل الناس، بس مثلاً سادات وفيفتي، وعمرو حاحا، وقبلهم كان عندنا في عين شمس فرقة بتاعتنا، ودلوقتي مع المدفعجية بس.

اشمعني؟

لأنهم عملوا موسيقي مختلفة، وده حببني فيهم.

هل مزيكا المهرجانات بتتطور؟

طبعا.. لأن في 2007 صوت المهرجان كان وحش، والتوزيع مش زي دلوقتي، والآلات كانت نفس الشيء، بس دلوقتي الدنيا متظبطة.

بما إنك بتاع مزيكا، بترد إزاي علي اللي بيقولوا إن المهرجان خبط ورزع؟

مش حقيقي ولو هي كده مكنتش اشتغلتها، إحنا عندنا رسالة.