التوقيت الجمعة، 29 مارس 2024
التوقيت 04:29 م , بتوقيت القاهرة

الطيار أشرف أبو اليسر: لم أطلب مليماً واحدًا من الفنان محمد رمضان

الطيار أشرف أبو اليسر
الطيار أشرف أبو اليسر

قال أشرف أبو اليسر الطيار المفصول بسبب أزمة محمد رمضان، إنه لم يطلب أموالً من الفنان محمد رمضان، قائلاً:"لو فيه أي حد من الإخوة اللى كانوا معايا وساندونى، لو واحد فيهم قال إنى طلبت مليم من حد يبقاله الكلام، أنا مطلبتش مليم من حد، وإنما حتى إنه باقيله 40 شهر والكلام ده بيحسبوه مع بعض، لأنى تاريخى ووضعى اللى كان هينتهى بعد 3 سنوات ونص بتكريم لى النهاردة انتهى بفصلى عن الشغل وإيقافى عن الطيران".

وأضاف خلال مداخلة هاتفية لبرنامج "90 دقيقة"، على فضائية "المحور"، مع الإعلامى محمد الباز: "بصفتى راجل كنت في القوات الجوية قبل كده ولى وضعى وتاريخى مقدرش أطلب رقم من أي حد واٌوله ادينىكذا لو سمحت عشان أنا اتظلمت"، موضحاً أنه فى الطائرة لا يوجد حاجز بين الراكب والطيارين، وأى أحد يجلس يمكن بخطوتين يكون في "الكابينة".

وتابع:"الفنان محمد رمضان لما دخل الكابينة مفيش حد هيقوله متدخلش، لما دخل كان الكرسى اللى جنبى فاضى لوجود الطيار المساعد في الحمام، وقعد على الكرسى وطلب ياخد صورة تذكارية وكثيرا من القامات الكبيرة طلبت تاخد صورة تذكارية وهى صورة لشخصلك وليست للنشر، وأنا قلت لمحمد رمضان الصورة دى لو اتنشرت هتقفل بيوت، هو قهد بس مش معناه إنه هو اللى بيسوق الطيارة"، مؤكداً:"اللقطة تطلع إنه دخلته وسمحتله يتصور وإنى طلبت منه فلوس والله ما حصل".

وذكر أن الفنان محمد رمضان جعل صديقه سعيد إمام أخبره بأن يقدم السيرة الذاتية الخاصة به في إحدى شركات الطيران، معلقاً:"سى في ايه اقدمه بعد العمر دا كله، أنا عندى 62 سنة، ولى تاريخى أكثر من 40 سنة طيران، أقدم في شركة وأقولهم أشتغل عندكم، كتر خيره، ولكن ماقروش العقوبة اللى اتوقعت عليا وهى إيقاف مدى الحياة عن الطيران وعدم مزاولة أي مهنة تمت بالطيران،  هو مكلمنيش لغاية دلوقتى"، مستطرداً: "كل أمنيتى إن الكلام ده يوصل لمعالى الوزير ويعيد النظر في العقوبة". 

وكان الفنان محمد رمضان قال في مقطع فيديو جديد عبر صفحته على فيس بوك: "جمهورى الغالى شعب مصر الحبيب.. لكل متابعى أزمة الكابتن الطيار أشرف أبو اليسر.. أنا زي ما وعدت عمرى ما هتخلى عنه.. أول أمبارح الحمد لله كلمت صديق ليا مدير شركة للطيران الخاص وحكيتله الموضوع، وقالى إن شاء الله خلال أسبوع يكون اشتغل ورجع لمهنته".

وتابع رمضان: "كلمت الأستاذ سعيد إمام مدير روتانا، وقولتله يتواصل مع الكابتن أشرف، يقوله محمد رمضان ينتظر الـ CV، علشان كلمت شركة إماراتية، وكان رده إنه مش هيبعت الـ CV.. فده الحل من وجهة نظرى.. طبعا ده اللى كنت أقدر أعمله.. ولكن الكابتن أشرف بعت المحامى الخاص به، وقعد مع مدير الحسابات الخاص بيا، وكان اللى عوضه ويرضيه.. فحسب حسبة كان باقيله 3 سنين ويطلع على المعاش بالإضافة لمكافأة نهاية الخدمة، وبالإضافة للمعاش وشوية حاجات.. جمعهم وقالى إنه محتاج 9 ونص مليون جنيه.. فأنا سايب الحكم للى بيعلقوا وبيقولوا محمد رمضان تخلى عن الراجل.. لو انتوا شايفين إن ده يرضى ربنا أنا هعمله عادي جدا.. أنا سايبلكوا الرد".