تعرف على حظك اليوم ل برج الثور مع الكاتب عبدالله أحمد وتأكد إنك سواء عجبك الكلام المكتوب هنا في برجك أو لأ ف انتا تقدر تصنع حظك اليوم سواء اليوم أو كل يوم

حظك اليوم برج الثور عاطفياً

( الكراش والإكس والبوي والجيرل فريند والجوز والزوجة والقرايب ):

من حقك توفر طاقتك الحُبية (جاية من حُب) للي يستاهلها طبعا.. امال هتمشي تحب ف الناس عمال على بطال ولا ايه.. مش اصول ابدا..

حظك اليوم برج الثور عملياً: 

( الشغل والمذاكرة والتخطيط لبكرة ):

من حقك برضة توفر طاقتك العملية للحاجات اللي تستاهلها وبس سواء ف الشغل او ف المذاكرة بدون احساس ايا كان بالذنب تجاه الناس او الزمكان..

:حظك اليوم برج الثور صحيا

( نفسيا وجسمانيا وكل مايخص طاسة المزاج ):

صحيا النهاردة انتا محتاج تستوعب انك لازم تبقى مستريح ومبسوط عشان تعرف تذاكر وتشتغل وتحب برضة بشكل مبسوط وجميل.. ومحتاج تقتنع انك اهم من اي حاجة بتعملها ف التلات حاجات دول برضة على فكرة..

حظك الغذائي:

غذائيا النهاردة تقدر تتجه للأكل اللي يعجبك النهاردة انشالله يكون كوارع ولا رنجة.. براحتك

شعارك اليوم:

حكاية من أيام الجدود..عمر القطط ما تعلي علي الأسود..

لونك اليوم:

بينك فاتح..

إعرف توافق برج الثور مع باقي الأبراج النهاردة

متوافق مع الابراج البسكوتية والبربوشية والكتكوتية والترابية والنارية والبرمائية..

من مشاهير برج الثور

الحظ هزار من الحياة.. مش أكتر.. ومحدش يملك معلومات كافية ولا بصيرة كافية ولا علم كافي عشان يقولك هتبقى النهاردة كويس أو لأ.. دا دايما متوقف على اختيارك وعلى مزاجك ومودك وظروفك لوحدك.

الحظ ممكن يكون موجود ممكن ميكونش موجود..القرار قرارك لوحدك ف حياتك وبس..بس لو اخترنا نشوفه وندور عليه كويس وبإهتمام هنشوف تأثيره في حياتنا طول الوقت ومنقدرش ننكره.. بنشوف ناس مبسوطة وناس لأ.. بنقول على المبسوط حظه حلو وبنتمنى نبقى حظنا من حظه ونبقى مبسوطين زيه وبنتمنى نملك الانبساط دا ونتحكم فيه .. ونستدعيه كمان وقت اللزوم زي جني المصباح..زي الأحلام.. وزي الأماني والخيالات الحلوة.. وقت الضيقة والخنقة والمشاكل والاحتياج اليومي للأمل ف بكرة أفضل وأروق وأجمل وألوانه أحلى..بنتمنى يكون في منطق واسباب للسعادة ممكن تتحط وتتكثف ف كلام بسيط وقريب..

ومن هنا بقى في توقعات الحظ اليومية بالاعتماد على حركة الكواكب ومواقع النجوم وعلم الفلك.. محدش ينكر إن كوكب الأرض كله واقع تحت تأثير حركة الكواكب المحيطة وخصوصاً القمر.

ولولا تأثيره مكانش بقى في حركة مد وجزر ومكانش الإنسان عرف يسافر بمراكب في البحر.. ولا كان الإنسان اتحرك من بلد لبلد برضه ف البر لو مكانش في مواقع للنجوم مميزة ف السما يقدر يعتمد عليها..

إفتكر الكلام دا وانت بتقرا حظك النهاردة وبكرة وكل يوم ياريت .. 

وتأكد إنك سواء عجبك الكلام المكتوب هنا في برجك أو لأ فانت تقدر تصنع حظك بإيديك سواء اليوم أو كل يوم..

الكلام المكتوب هنا دايما الغرض منه الفرفشة والدلع والمزاج الرايق بعلامات حلوة من الحياة محطوطة ف كلام وحبة مزيكا على مزاجك..

 تابعنا يومياً عشان تعرف حظك كل يوم ومتنساش.. كل دة مجرد هزار برئ ياريت متاخدوش على صدرك..

تحياتنا الدائمة.