التوقيت الإثنين، 12 أبريل 2021
التوقيت 11:54 م , بتوقيت القاهرة

الحاجة رئيسة 70 سنة ولسه بتجري وتعافر علي عربية فول

الحاجة رئيسة
الحاجة رئيسة
" يا بنى الشغل مش عيب العيب أن الإنسان مننا يمد إيده لغيره عشان يأكل انا عمري عدى ال70 سنة لكن لسه بجري وبعافر مع الدنيا عشان لقمة العيش ومن 50 سنة وأنا واقفة علي عربية الفول ومبسوطة وراضية وزى ما بيقولوا كدا نفسي اموت وتراب السكة علي رجلي " بهذه الكلمات المعبرة عن الرضا والكفاح بدأت الحاجة رئيسة تروى لنا تفاصيل حكايتها مع عربية الفول .
 
وقالت الحاجة رئيسة ل" اليوم السابع " من وانا عندى 20سنة اتجوزت وكنت بقف مع جوزى الله يرحمه ببيع معاه واساعده علي عربية الفول وربنا رزقنا ب 3 أولاد وربيناهم من عرقنا .
 
واكملت الحاجة رئيسة كلامها الشغل مش عيب وكل يوم من 50 سنة وانا بقوم الفجر اصلي فرض ربنا وبعدها اسوي الفول وأجهز السلطة والبذنحان وكل ما نحتاجه لزوم السندوتشات واذهب الي عربية الفول وانضفها وافرش وأبدأ استقبل الزبائن وكل حاجة بعملها بأيدى وبعد وفاة زوجى وانا متحملة المسئولية لوحدى وربنا هو اللي بتوكل عليه وبيرزقنى ويراضينى .
 
واضافت الحياة عاوزة اللي يشتغل ويعافر مش اللي يقعد في البيت ويستنى الرزق يخبط علي بابه وهو قاعد لازم نسعي ونشتغل وبنصح الشباب محدش يقعد الشغل كتير واهم حاجة الرضا باللي ربنا بيرزق به ونفسي اكمل حياتى لاخر يوم فيها وانا بشتغل وبعافر وبتمنى ربنا يكرمنى بعمرة وازور بيت النبي قبل ما اموت