التوقيت الخميس، 28 مارس 2024
التوقيت 11:10 ص , بتوقيت القاهرة

س وج .. التفاصيل الكاملة لحملة القضاء على فيروس سى

يجيب "دوت مصر" فى التقرير التالى على كافة الأسئلة المتعلقة بحملة الكشف عن فيروس سى والتى انطلقت اليوم بـ 9 محافظات، ومن المقرر أن تشمل جميع محافظات الجمهورية خلال الأشهر المقبلة.

 

 

 

س: إيه هى مبادرة القضاء على فيروس سى ؟

ج: مبادرة رئاسية للكشف عن فيروس سى وعلاج المصابين به بالإضافه للكشف عن الأمراض غير الساريه مثل السكرى والضغط والسكر وتستمر لمدة 7 أشهر على 3 مراحل .

 

س: عاوز احلل تبع المبادرة اروح فين ؟

ج: ممكن حضرتك من خلال الموقع ده تتعرف على مراكز المسح الطبى القريبة لمحل إقامتك .

 

س: والتحليل ده بكام ؟

ج: الفحص مجانا ولو لاقدر الله طلعت مصاب بفيروس سى هيكون العلاج كمان مجاناً .

 

س: هل الفحص محدد لسن معين؟

ج: الفحص لمن هم من سن 18 سنة لأكثر .

 

س: هو الفحص شغال من الساعة كام لكام ؟

ج: مواعيد العمل فى الحملة فى كل الوحدات المشاركة بيكون من 9 صباحا وحتى 9 مساءاً .

 

س: ايه الورق المطلوب منا ؟

ج: بطاقة الرقم القومى فقط.

 

س: عاوز اعرف الحملة دى تبقى فى محافظتى إمتى ؟

ج: إذا كانت من محافظات المرحلة الأولى فهى فى اكتوبر ونوفمبر 2018

 اذا كانت من محافظات المرحلة الثانية فهى ديسمبر 2018 ويناير وفبراير 2019

 اذا كانت من محافظات المرحلة الثالثة فهى مارس وابريل 2019

 

س: انا كان عندى فيروس سى واتعالجت ، ممكن اروح اعمل فحص تانى ؟

ج: ممكن طبعاً تعمل فحص للضغط والسكر وكمان الوزن ، لكن لفيروس سى أنت محتاج تتابع مع مركز العلاج اللى اتعالجت فيه .

 

س: أنا كان عندى فيروس سى واتعالجت وكنت بتعالج عند دكتور خاص ودلوقتى رجعلى الفيروس تانى ؟

ج: تقدر يافندم تحجز على موقع حجز اللجنة القومية www.nccvh.org.eg أو على موقع حجز التامين الصحى لو مؤمن عليك وتعرف موعد ومكان الكشف من خلال الحجز ده .

 

س: انا روحت مركز فحص بالحملة وحللت وادونى كارت فيه موعد ومكان لمستشفى اروحها بس الخط مش واضح ومش عارف اقراه وعاوز اعرف ايه المكان اللى كاتبينه ده ؟

ج: ممكن حضرتك تستعلم عن مركز العلاج على الموقع الرسمى للحملة وهو www.stophcv.eg من خلال رقمك القومى وتعرف اسم مركز العلاج والموعد المحدد لك .

 

س: يعنى ايه الأمراض غير السارية

ج: الأمراض غير السارية، اللى هى بنقول عليها الأمراض غير المعدية، هى أمراض القلب ، والأوعية الدموية ، والسرطان ، والسكر ، وأمراض الصدر المزمنة.

 

س: هى الأمراض دى بتيجى من ايه؟

ج: الامراض دى انتشرت قوى بسب زيادة أربع عوامل تمثل خطورة أساسية وهى: التدخين ، قلة الحركة والمشى وعدم ممارسة الرياضة، والاكل غير الصحي.، والكحول .

 

س: يعنى ايه أكل غير صحى؟

ج: زى الوجبات الجاهزة والاكل اللى فيه دهون وملح كتير والمقليات، ومفهوش خضار وفاكهة كتير

 

س: ايه هو مرض السكر؟

ج: هو مرض مزمن يتسبب فى زيادة مستويات السكر( الجلوكوز بالدم)، وذلك نتيجة نقص الانسولين (هرمون يتم إفرازه من البنكرياس، يعمل على تخفيض السكر بالدم إلى المعدلات الطبيعية).

 

س: ايه هو ضغط الدم؟

ج: مرض ضغط الدم المرتفع هو عبارة عن ارتفاع فى ضغط الدم أكثر من 140/90 مليمتر زئبق يعاد قياس عدة مرات فى توقيتات مختلفة.

 

س: هل تستمر متابعتنا بعد نهاية فترة الحملة أم أثناء فترة الحملة فقط ؟

ج: المتابعة مستمرة حتى بعد فترة الحملة سواء بالنسبة للكشف أو العلاج.

 

لمزيد من الفيديوهات الإخبارية والرياضية والسياسية والترفيهية