التوقيت السبت، 22 سبتمبر 2018
التوقيت 01:50 م , بتوقيت القاهرة

أخر الاخبار

بالفيديو.. نجار "كفيف"..و"بابه مش مخلع"..محمد:"أنا مش عاجز و عايز أشتغل"

"أنا أسمى  محمد جلال حسين رضوان  .. كنت شاب عادى زيى زى أى شاب خلصت جيش واشتغلت فى ورشة نجارة وكنت نجار شاطر .. وكان عندى أحلام نفسى أحققها بمهنتى كـنجار . .وأنا فى الورشة اتخبطت فى الماكينة اللى بتقطع الخشب على راسى وحصلى انفصال شبكى فى العين اليسرى وبعدها اليمين وفى لحظه بقيت كفيف" ، بتلك الكلمات الدرامية  بدأ يروى عم محمد رحلته القاسية مع النجارة و ضياع بصره وإصراره على إكمال الطريق بدون بصر. وقال محمد لكاميرا فيديو 7 قناة اليوم السابع المصورة ، بنبره ممزوجة  باليأس والرضا فى آن واحد :" وأنا سنى حوالى  22 سنة اتصبت فى حادث أثناء عملى بورشه نجارة .. وبعد الحادثة راح نظرى وراحت معاه كل أحلامى ، واعتزلت العالم وبعد 3سنين قررت أخرج تانى من جديد " واستكمل :" ذهبت إلى الجمعيات الخاصة بالمكفوفين وقولتلهم أنا عايز  أشتغل  .. وبالفعل ساعدونى وعلمونى على أعمال كتير لكن ما بتأكلش عيش فـقررت أرجع تانى للنجارة مهنتى الأساسية ومن هنا بدأت معركتى مع الشاكوش والمنشار والشنيور  .. ولكن أنا اللى انتصرت عليهم فى الآخر وكل ده بفضل الله ثم إرادتى. "   أما عن أحلامه أخبرنا بها "عم محمد قائلا :" أنا أحلامى بسيطة جدا  .. بتمنى بس ممول عشان اشتغل وأمارس مهنتى اللى بحبها  .. الورشة  دى مش ملكى  .. وأنا فيها كده مجرد وقت وأسعار الخشب كل يوم  فى ارتفاع  ، محتاج حد يشاركنى بالمال وأنا قبل ما أخد أى قرش منه هـديله شغل .. ويا ريت أى مسئول بالدولة يساعدنى أعمل معرض من انتاجى ."