التوقيت الأربعاء، 19 سبتمبر 2018
التوقيت 12:52 م , بتوقيت القاهرة

أخر الاخبار

بالفيديو.. "معاق" يستغيث برئيس الجمهورية فى رسالة :" احنا فين يا كبير العيلة "

وجه الكابتن نبيل محمد عويس والشهير بـ" كبير معاقين مصر "  رسالة استغاثة للرئيس السيسى  ، يطالبه فيها بالتدخل من أجل حماية حقوق المعاقين ، والنظر فى حالته. وجاء نص الرسالة كالآتى : "رسالة من أحد المعاقين إلى كبير عائلة مصر ..إحنا فين  .. فين المعاقين يا كبير ..  ليه مهمشين .. ليه المعاقين مهمشين .. ليه مفيش باب محافظ مفتوحلى .. ولا باب رئيس مجلس محلى ..  ليه مطلوب منى لما أحب أجيب عجلة ليه أمشى أشحت من جمعيات خيرية ".   وأضاف فى رسالته :" ليا حق .. أقسم بالله ليا حق ومبطالبش بيه ومعملناش وقفات .. ومش هنعمل وقفات .. ومش هنعمل أى حاجة من دى ..  لأن احنا مش عايزين البلد دى تقع .. لأن البلد دى لو وقعت إحنا أول ناس هيداس علينا .. لأننا الحمد لله وبكل فخر معاقين ".     وتابع  : "وباللى احنا فيه راضيين .. انتوا ليه مش راضيين ..انتوا ليه مش راضيين باللى احنا فيه .. ليه أنا راجل موظف وعندى أربع عيال .. ليه بتخلينى بعد ما أتجوز وأخلف أندم إن أنا اتجوزت ..  ليه تخلونى أبص لعيالى وهما نايمين وأندم إن أنا خلفت .. أندم على خير بعته ربنا ..  لأنى مش قادر أكفيه .. أنا موظف فى التربية والتعليم كل مرتبى من أوله لأخره 1400 جنيه .. شكرا للتربية والتعليم .. شكرا للحكومة إنها عينتنا ..  بس انت معين واحد فى التربية والتعليم معاق بـ 1400 جنيه بس دى كانت بعد الثورة لكن قبل الثورة كانت 460 جنيه بس".     وأردف :" عندى زميل معاق شغال فى الضرائب بـ  3000 جنيه ما شاء الله مليش دعوة بيه .. زميل تانى معاق شغال تأمينات 3000 جنيه ..  زميل معاق شغال كهرباء بالشيء الفلانى ..  زميل معاق شغال بترول بالشيء الفلانى ..  أنا ليه طلب من كل وزير ومش هعرف أقابل أى وزير  .. ليه طلب وليه مقابلة مع رئيس الوزراء و مش هعرف أقابل رئيس الوزرا ..  ليه الدولة  على طول دفنانا ..احنا فين  .. هو احنا معاقين بمزاجنا وشلينا رجلينا ولا ده قضاء ربنا ..  لما احنا راضيين بقضائه انتوا ليه مش راضيين".   وأضاف :" ياريس انت اسمك كبير عائلة .. مسمكش رئيس جمهورية مصر العربية ..  لا اسمك كبير عيلة .. مصر كلها عائلة كبيرة وانت كبيرها .. وأنا فرد من أفراد العائلة وانت مش عايز تبصلى .. ليه أقابل المحافظ فى المحافل ولما أحب أقابله فى احتياج لى لمصلحة أو لكرسى أو موتوسيكل أمشى بيه معرفش أقابله ..  ليه مش باب مكتبه اللى مقفول لا ده باب محافظته هو اللى مقفول ".   واستكمل رسالته :" فين شقتى ياريس .. فين شقتى يا كبير العائلة .. ليه رجل معاق أدفع إيجار .. فين بقالنا 37 سنة مستنيين الدولة تبصلنا لا باصة لعاجز ولا باصة لسليم .. امتى هتبصلى  .. لما أموت ؟! .. أنا خايف من الموت مش من ذنوبى .. لا أنا خايف على عيالى لما أموت مش هيلاقوا ياكلو ، إحنا فين يا كبير العائلة ..  المجلس القومى للمعاقين معمليش أى حاجة .. امتى هنعيش .. والله العظيم احنا بشر .. هتخلو عيالنا هتقول يارب ليه خلقت أبويا عاجز".