التوقيت الأربعاء، 26 سبتمبر 2018
التوقيت 05:08 ص , بتوقيت القاهرة

أخر الاخبار

بالفيديو.."جزارين" عن قرار منعهم من الذبح فى الشارع:وقف حال..ولا يليق بعادات المصريين

بعد إعلان الدكتور جلال مصطفى سعيد محافظ القاهرة، تفعيل الضبطية القضائية لرؤساء أفرع الهيئة لمنع الذبح فى الشارع، وتحرير محاضر تلوث بيئى لا تقل عن 5000 جنيه للمخالف، أعترض عدد من الجزارين على هذا القرار. كاميرا "video7" قناة اليوم السابع المصورة، استطلعت رأى “الجزارين” بشأن قرار محافظ القاهرة بمنع الذبح فى الشوراع، وقال "المعلم محمد" أحد الجزارين بالسيدة زينب:"قرار المحافظ على عينا وراسنا بس دا وقف حال للجزارين.. إحنا بنستنى الموسم دا من السنة للسنة وبعد عيد الأضحى مابيبقاش فى شغل لمدة شهرين وإحنا عندنا عيال ومصاريف، والحال واقف بقاله فترة كبيرة، وبنطلب من المحافظ إنه يشدد على أصحاب المحلات بالالتزام بالنظافة". وتساءل الجزار صبرى قائلاً:"هل محافظ القاهرة وفر بديل لعدم الذبح فى الشوارع، والمذابح مش هتسع كمية الأضاحى، هل هيقدروا يمدوا أيام الذبح لـ 7 أيام مافيش الكلام دا، يمكن ربنا جعلنا سبب لتوفير كيس لحمة لمسكين أو يتيم ليه المحافظ يقطع حاجة زى كدا.. بقول للمحافظ ماتحرمش المسكين من أنه يتفرج أو ياخد كيلو لحمة". وقال محمد سيد، جزار بمحافظة القاهرة، قائلاً :" قرار المحافظة لا يليق بعادات وتقاليد الشعب المصرى، ودى عادة للمصريين بالذبح فى الشوارع". أما ثروت عكاشة، قال: "الناس بتستنى الذبح من السنة للسنة، والأطفال من بعد الفجر يوم الوقفة وهما مستنين اليوم دا، إزاى يقطعوا فرحة الأطفال باليوم دا، والعملية صعبة على الناس كلها مايجوش على اليوم اللى بتفرح فيه الناس ويمنعوه".