"بانكسي" اتقبض عليه يارجالة ولا إيه؟

"بانكسي".. عامل زي مستر إكس اللي اتكلموا عنه في أفلام فؤاد المهندس وروايات الشياطين التلتاشر.. محدش يعرف هيئته أو ملامحه أو مكانه.. ومالوش صور خالص.. ورغم إن له على الإنترنت صور كتير.. لكن محدش اتأكد إن هو فعلا.. شخص مجهول لكن مشهور في نفس ذات الوقت.. هتقولي إزاي يعني ياعم الحج.. أنا هفهمك ياسيدي..

اسمه "بانكسي".. ممكن تقول عليه إنه فنان أسطوري مشهور فشخ ومتسيط .. وممكن تقول إنه هاوي ودماغه لاسعه.. لكن اللي نقدر نقوله إنه أشهر فنان "جرافيتي" ف العالم.. واللي هو فن الكتابة والرسم على الحيطان لو مكنتش عارف يعني.. رسومات الراجل ده ممكن تلاقيها في كل حتة.. ويمكن تكون شفتها على حيطة جنب بيتك أو شغلك وانت ماشي وعجبتك ومكنتش تعرف إن هو اللي راسمها.. أعماله الفنية بتتباع بمبالغ فظيعة بتوصل لميت ألف دولار.. آه والله زي ما بقولك كده.. حيطان بريطانيا والولايات المتحدة وهولندا وحتى الجدار العازل في فلسطين مسلمش منه ..

زي ما قولنا محدش عارف شكل الراجل ده خالص.. لكن مصور محترف وسوسة من جامايكا.. خدله صورة من كذا سنة.. كان لابس فيها قميص كحلي وبنطلون جينز.. وشايل بخاخة الرسم.. لكن برضه الناس قالت إنها مش متأكدة إن هو ده فعلا.. ومواقع أجنبية قالت إنه اتريق وقال إن اللي في الصورة ده مش هو.. هتقولي إزاي نفى ومحدش عارفه اصلا ونفى لمين.. معلش أنا نفسي اتلخبطت ودماغي ورمت من الراجل ده ..

ناس كتير حققت وحاولت تعرفه.. منهم عشان بيحبوا شغله وعندهم فضول.. ومنهم اللي عاوز يقبض عليه لأنهم شايفينه مخرب ومجرم.. فن الجرافيتي مش غلط طبعا ولا عيب.. لكن أعماله وتصميماته حرام ويتهزلها سبع سموات.. لأن محدش بيسلم من لسانه.. قصدي إيده وبخاخته يعني.. المهم كل اللي اتعرف عنه لحد دلوقتي إنه بريطاني اتولد هناك في مدينة اسمها بريستول سنة 1974.. واسمه بالكامل روبرت بانكسي.. وإنه غني جدا وعنده فلوس أكتر من دونالد ترامب نفسه.. عشان كده مش بيشتغل وبيقدر إنه يتخفى ويتنقل من بلد لبلد بسهولة كإن معاه طاقية إخفا.. وله صورة نادرة بيتقال إنها له لما كان في المدرسة..

سنة 2007 "بانكسي" خد جايزة أعظم فنان في بريطانيا.. من قناة إي تي في المشهورة هناك.. وطبعا يعني مجاش يستلم جايزته .. قالك يمكن يكون كمين ياعم الحاج وهيسلموني.. أو مكنش مهتم أصلا بدليل إنه سايب رسوماته تتباع بملايين الدولارات ومش سائل ..

بيقولوا إنه بيرسم من التسعينات كده.. لكن أول مرة الناس بدأت تعرف رسومات "بانكسي" كان في لندن سنة 2003.. برسومات بتتكلم عن السياسة والثقافة والشرطة والزعماء والفنانين والطبيعة والأطفال.. وكان عامل رسمة مشهورة للموناليزا وهي شايلة بازوكة.. اللي هو إزاي ياجدع؟.. إيه العلاقة؟.. ده سلاح محرم دوليا في ميدل أصلا..

ناس كتيييييير أوي معجبة بأعماله "أدماير هيم" زي ما بيقولوا بره.. وحتى من المشاهير كمان زي براد بيت وأنجلينا جولي وجوني ديب.. يمكن عشان رسوماته العميقة والغريبة.. بس خد بالك إن اللي ساهم في شهرته هو إنه مجهول.. وده دايما بيزود قيمة الحاجة..

كل يوم والتاني يطلع خبر إنه اتقبض عليه.. ويرجع يتنفي تاني.. وعلى الحال ده بقاله كتير على رأي تامر حسني.. آخرها كان من كام يوم.. والخبر قال إنه اتمسك في فلسطين بالصفة الغربية بسبب رسوماته على الجدار العازل.. لكن محدش اتأكد لحد دلوقتي.. لكن كان فيه لغط كبير في الحوار ده لدرجة إن ناس نشروا عندهم تويتة منسوبة لدونالد ترامب وهي بيقول فيها إنه اتقبض عليه ومش هيشوف النور تاني.. لكن التويتة "فيك" ومش موجودة على صفحته.. أو يمكن كانت موجودة ومسحها الله أعلم.. ليه لأ ممكن تتوقع من ترامب أي حاجة.. ولو حد عنده معلومة منعرفهاش يقولنا ..

في النهاية أحب أقولك على حاجة بس متتعصبش.. ناس كتير بتقول إن "بانكسي" مش شخص حقيقي أصلا لكنه بيرمز لمجموعة من الرسامين اللي شغلهم كويس ونضيف.. بس كده.. إجري يامجدي ..

لو عجبك الموضوع دة وحابب تقرا مواضيع زيه او أحسن خش هنا

قط بلدي