لو قلنا إن حلقة Game of thrones الجديدة حلقة نار يبقى مفيش مبالغة.. سواء عشان الهجوم على شبكة HBO بسبب تسريب الحلقة على النت أو عشان الحريقة اللي حصلت في الحلقة نفسها.

في البداية أغلبنا كان متوقع مشهد رجوع آريا لوينترفيل.. وكان فيه تخمينات كتير ازاي هتتعامل مع اخواتها تاني بعد ما تشوفهم لأول مرة من سنين.. ومنطقي إن علاقتها بسانسا متكونش في أحسن حالتها لأن عمرها ما كانت كويسة.

لكن على المشكلة إنها كانت باردة.. كأنها بتسلم عليها بعد ما رجعت من مشوار.. مشهد مختلف تماما عن لقاء جون وسانسا الموسم اللي فات.

من ناحية تانية احنا بقينا في نص موسم Game of thrones ومفيش خطوة واضحة من ليتل فينجر.. غير انه بيتصرف وكأنه بيكون صداقات مع وينترفيل كلها.. لكن هو شخصيا معملش حاجة مفيدة لحد دلوقتي ودة ضياع وقت بالنسبة لشخصية قعدت 6 مواسم بتعمل مؤامرات.

تصرفات بران مع ميرا ريد من الحاجات الباردة برضه في الموسم.. هي بتقول إن أخوها مات عشانه وهي كانت هتموت عشانه ومع ذلك مفيش غير كلمة شكرا!!.. دي نهاية ضعيفة جدا لرحلة بران من ساعة ما خرج من وينترفيل ولحد ما رجع تاني.. يمكن السبب أن السيناريو عايز يظهره بشكل بعيد خالص عن البشر بعد ما بقى الغراب أبو 3 عيون.. لكن برضه كان ممكن يكون في شكل أحسن من كدة.

أما الجزء الجنوبي من ويستروس فكان فيه أغلب الأحداث لأن أغلب الشخصيات المهمة بقت هناك.. باستثناء جون سنو اللي لسه مبدأش في مهمة صناعة الأسلحة من الدراجون جلاس.. ولحد دلوقتي مفيش اتفاق واضح بينه وبين دينيرس.

برغم إن الحلقة من أقصر الحلقات في تاريخ Game of thrones إلا إنها كانت من أكتر الحلقات الأكشن في النص التاني منها.. لأنها في دقايق حولت انتصارات سيرسي في الحلقتين اللي فاتو لهزيمة مرعبة.

والسبب طبعا بعد ما دينيرس قررت تاخد بنصيحة أولينا تيريل بشكل حرفي.. ودة لأنها كانت بتتصرف بدبلوماسية في الحلقات التلاتة اللي فاتت وفشلت فبقت وكأنها بتحارب ويدها مربوطة.. دلوقتي الوضع اختلف 180 درجة.

الأول شكل المعركة ضخم.. يعني مفيش قص واستعجال زي المرة اللي فاتت.. كمان في استخدام لنفس الأسلوب في معركة جون سنو ضد رامزي بولتون الموسم اللي فات.. خيول كتير وكومبارس كتير.. وتصوير للمعركة من تحت والتركيز على حالة من الفوضى.. ومش عيب انك تستخدم الحبكة اللي كسبت المسلسل أعلى تقييم في تاريخ حلقاته.

الأجمل كمان إنها كانت معركة بين 2 من الشخصيات الرئيسية في المسلسل ودي حاجة محصلتش من سنين.. دلوقتي للمرة الأولى عندك دينيريس وجها لوجه مع جيمي لانستر في معركة مفتوحة.. والقفلة بتاعتها كانت قوية ومناسبة للقصة.. لأول مرة شوفنا السهم العملاق بيضرب تنين فعلا.. يعني طلع سلاح مؤثر.

من ناحية تانية هجوم جيمي بالرمح على دينيريس مع إن جنبها تنين! تصرف متهور لكن يناسب شخصيته.

من المميزات اللي تخلي الحلقة الأحسن في الموسم هو الإيموشنز اللي فيها.. منظر آريا لما وصلت وينترفيل وهي شخصية مختلفة تماما عن الطفلة اللي كانت في الموسم الأول.. ومنظر تيريون وهو عايز أخوه يهرب برغم إنه في معسكر الأعداء من المواقف الحلوة جدا في الحلقة.

تحية خاصة هنا برضه لبرون .. جندي مرتزق وشخصية جانبية لكن عمل أحسن المواقف في الأكشن أو الكوميديا من الموسم الأول.. حتى لما أخيرا أخد دهب من عيلة لانستر برضه بيخسره كله في نفس الحلقة.

عموما الحلقة تعتبر دلوقتي الأحسن في الموسم.. وعيبها الوحيد هو إنها اتسربت قبل معاد عرضها بيومين يعني الفانز قدامهم 10 أيام عشان يشوفو حاجة جديدة.