مسلسل Game of thrones  في الحلقة التانية من الموسم السابع.. بقت ضحية جديدة للحرق اللي بيحصل بسبب الترايلر الحلو قبل ما الموسم يبتدي.

بما ان الموسم دة هيبقى 8 حلقات بس مكنش في تضيع وقت أو تطويل في الأحداث.. باختصار دخلنا في الجد بسرعة.. والمشكلة هي زي ما قلنا كانت ان المشاهد شاف مشاهد الذروة وقت الإعلانات.. فبقى المسلسل مجرد تطويل ف الإعلان.. مش أكتر

بداية الحلقة ولحد نصها كانت تكملة للحلقة الأولى وتمهيد لمشهد المعركة الدموية في الأخر.. وإن كان المشهد الافتتاحي حصله إختصار كبير..خصوصا ف فرصة رد فعل تيريون على قتل بنت أخته.. كان بيتصرف وكأنه خلاف سياسي عادي..

ظهور الكاهنة مليساندرا في جزيرة دراجوستون كان خطوة حلوة اختصرت 3 شخصيات من الرواية في شخصية واحدة في Game of thrones وتوقيت ظهورها كويس لإن اعلان الحلقة التالتة حرق برضه مشهد مهم جدا الموسم دة..

الاختصار الأكبر على ما يبدو كان مع شخصيات بنات أوبريان مارتيل التلاتة واللي اتنين منهم انتهوا بشكل دموي.. وكل دة عشان يوصل إحساس إن يورون جرايجوي هو شرير الموسم السابع بجد وأنه خطر.. لكن ممكن تلاحظ برضه إنه كان وسيلة شيك من كتاب السيناريو عشان يخلصوا من الجزء الخاص بدورن وعيلة مارتيل بسرعة لأن وجودهم مبقاش حد محتاجه في المسلسل اللي هيخلص بعد موسمين.. كمان الممثلين قالوا فعلا إن عقدهم كان لحلقات أكتر وفجأة لقوا السيناريو بيخلص عليهم بشكل مفاجئ..

بنلاحظ كمان ف الحلقة تحضير قوي من سيرسي وفريق لانيستر للحرب ضد دينيريس.. ودة تم بذكاء خصوصا إن التوقعات إن واحدة معاها جيش ضخم و3 تنانين يبقى سهل وطبيعي إنها تكسب.. ودة معناه إنه مكنش هيبقى في إثارة وانت بتتفرج على معركة من طرف واحد.. وعشان كدة كان السيناريو بيحسن من فرص سيرسي لانيستر شوية.. وبشكل منطقي..

أما عن الجزء الشمالي من مملكة Game of thrones ف واضح أوي التشابهات بين مشهد جون سنو وليتل فينجر ومشهد إدارد ستارك مع ليتل فينجر في الموسم الأول.. كمان بيفتح الباب لتخمينات كتير عن مصير جون سنو بعد الحلقة دي.. خصوصا إنه سايب مملكته كلها في إيد سانسا اللي ناس كتير من الفانز توقعو الخلاف بينها وبينه..

جايزة أكبر جبان في الحلقة تروح طبعا لثيون جرايجوي ودة بسبب اخر تصرفاته واللي تخلي المشاهد مستغرب.. إيه هو التطور اللي حصل في شخصيته من الموسم التالت لحد النهاردة.. طالما لسه بياخد نفس القرارات ونفس طريقة التقكير..

باختصار الحلقة اللي خلصت على ربع السيزون سابت سؤال كبير عن تطور الشخصيات في المواسم اللي فاتت ولحد النهاردة.. واللي اتفرج عليها من غير ما يكون شاف الإعلان بتاع الموسم أكيد استمتع بيها أكتر بكتير.