لو كنت مشجع كورة محترم يبقى المونديال أهم حاجة بتحصل كل 4 سنين.. نفس الشئ برضه عند أي شخص "نيرد" عارف يعني ايه كوميك كون.. اللي يعتبر أهم حاجة بتحصل كل سنة لأي حد بيحب قصص وافلام الكوميكس وغيرها كتير.. بس ايه هو الكوميك كون؟

الاسم بيتكب كدة Comic-Con وغالبا مرتبط عند الناس بأهم حدث وهو الكوميك كون بتاع مدينة سان دييجو في كاليفورنيا.. في مدن وبلاد تانية عملت مهرجانات بنفس الاسم زي الكوميك كون نيويورك أو كوميك كون سيدني أو لندن .. لكن مفيش رابط بينها وبين سان دييجو والهيصة اللي بتحصل فيه.

عشان كدة هنتكلم الأصلي وقصته.. الاسم أصلا كان Gold State Comic-Con وبعدها اتنقل لسان دييجو سنة 1991.. في الأول كان حجمه صغير وبيركز بس على قصص الكوميكس من غير أي حاجة تانية وحتى الجمهور كان قليل وأغلبه أطفال عرفو يشدو أهاليهم عشان يوصلوهم .. في سنة 2014 عدد الجمهور زاد عن 300 ألف.. يعني أكتر من ستاد القاهرة.

دلوقتي بقى فيه عروض للدعاية لأفلام ومسلسلات جديدة والعروض دي بقت اكبر من عروض قصص الكوميكس نفسها.. وبقت تقريبا احسن وسيلة تعمل دعاية لفيلم جديد من مارفل أو دي سي زي ما بيحصل دلوقتي مع تريلر Justice League

أو فيلم Thor: Ragnarock والاتنين لسه هيتعرضو السنادي.

وفيها برضه قاعات مؤتمرات عشان الممثلين يتكلمو عن الأفلام والمسلسلات دي.. غير الأفلام كان فيه حاجات مميزة زي كوميك كون 2013 واللي كان 29% منه مخصص لأفلام ومسلسلات الأنيمي الياباني.

أهم صالة في المهرجان كله هي صالة H واللي بيحصل فيها السحر كله لأنها الصالة اللي بيتعرض فيها إعلانات الأفلام والمسلسلات الجديدة ورغم ان مساحتها تاخد 6 ألاف شخص.. لكن الجمهور ساعات بينام قدامها بالساعات والأيام عشان يلحق مكان.. وطبعا في ناس بيجيلها حالة يأس ويقررو يروحو لصالات أصغر في الحجم واهميتها أقل.

لكن ايه اللي يفرق دة عن أي مهرجان فني تاني؟

السبب طبعا هو الحاجة اللي مش بتحصل في أي معرض أو مهرجان وهي طبعا الكوسبلاي.. ودي طبعا إنك تعتبر نفسك في حفلة هالوين وتلبس زي أي شخصية بتحبها من باتمان وسوبرمان والجوكر وولفرين وأي شخصية تاني تخطر على بالك.. براحتك يا عم.

وطبعا في منافسة على مين يعمل مكياج وتقليد أقرب للفيلم أو القصة اللي ظهرت فيها الشخصية.

كل دة طبعا مش ببلاش.. الكوميك كون مدته 4 أيام كل سنة وتمن التذكرة في اليوم الواحد 50 دولار تقريبا.. في ناس بتحب ترح كل يوم وفي ناس بتستنى عشان حدث معين.. المشكلة أن أغلب التذاكر بتتباع بسرعة رهيبة يعني مفيش فرصة للحجز.. ودة بيفتح الباب لبيع التذاكر في السوق السودة وبأسعار نار.