أكيد في ناس كتير فكرت إنها تسيب البيت وتستقل بحياتها.. لكن في ناس قدرت فعلا تاخد القرار دة وناس تانية لسة بيقلّبوا الفكرة ف دماغهم ومش عارفين هيقدروا عليها ولا لأ  ف لو إنتا من الناس دي متقلقش إحنا هنساعدك.. بس في شوية حاجات لازم تتأكد منها الأول وتعرفها كويس قبل ما تاخد قرارك الجهنمي وتسيب البيت.. 

شوية كلام جد وانتا متحمس كدة ..

طول ما بابا بيصرف عليك وماما بتأكل فيك وتيتة بتهشتكك.. عمر ما قرارك هيبقى ف إيدك.. 

عشان كدة جرب فكرة الإستقلال لإنها هتساعدك تكبر وتنضج وتعرف الدنيا ماشية إزاي.. أما بالنسبة لنظرة المجتمع ليك ف فكك منها.. ممكن يقولوا عايز تنحرف أو تصيع لكن مش مهم.. المهم إنك تكون مرتاح ومبسوط وبتصرفاتك ممكن تعرف تغيّر النظرة دي وحتى لو معرفتش برضة مش مهم..

ولأن قرار الإستقلال عن البيت من القرارات المصيرية في الحياة ف عندك 13 حاجة لازم تتأكد منهم قبل ما تقرر تسيب بيت أهلك..

بتعرف تنام لوحدك ف البيت ولا لأ ؟..

الموضوع مش بسيط زي ما إنتا متخيل في ولاد وبنات كتير مبيعرفوش يناموا ف البيت لوحدهم.. وده مش معناه إنهم فافي لا سمح الله.. لأ فعلا البيت الفاضي ليه رهبته وممكن أقل صوت غريب يخليك متعرفش تنام طول الليل.. ف عشان كدة لازم تتأكد إنك بييس وقلبك جامد والدنيا جميلة.. 

تقدر تدي حسّك الأمني كام من عشرة ؟..

جو تكبير الدماغ وإنك تنام والشباك مفتوح أو الباب مش متربس.. مش هينفعك خالص ف حياتك المستقلة الجديدة.. عشان كدة حاول تطلع الأب اللي جواك.. وإعمل تشيك على كل حاجة قبل النوم وأمن على المداخل والمخارج وإتطمن إن الغاز مقفول ومحابس المية تمام.. العملية دي لازم تتدرب عليها مرتين ف اليوم.. مرة لمّا تخرج ومرة كمان قبل النوم ودة عشان مصلحتك إنتا والله 

هل عندك فوبيا من الحشرات؟..

ناس كتير بتخاف من الصراصير وناس تانية من الفيران.. لو إنتا واحد منهم ف دة معناه إنك لازم تاخدلك كورس مكثف على أيد الحاجة الوالدة ف فن الإمساك بالفيران والقضاء على الصراصير.. أما لو معندكش مشكلة معاهم ف مبروك إنتا من المستقلين يا علي 

خدلك يومين ابعد فيهم عن البيت.. 

إنسى خالص موضوع الوحدة بتقلتني ووجهة نظر تامر حسني ف الحياة دي عشان اللي قبلنا قالوا "خد فكرة واشتري بكرة".. ف قبل ما تاخد قرار الإستقلال الكامل عن البيت حاول تجرب الحكاية كام يوم كدة ع السريع.. سافر اشتغلك فترة ف محافظة بعيدة عن مدينتك أو سافر برة خالص لو ينفع..

إنتا مدرك إنه مش هيبقى فيه ماما ولا لأ ؟..

عدم وجود ماما ف حياتك معناه غياب أي حاجة ليها علاقة بالأكل أو النضافة يعني من الأخر إنتا مضروب ف مقتل يامعلم.. بس طبعا هتستحمل ومش هتبين عشان إنتا راجل كبير ومستقل.. بس ممكن تتألم ف صمت وإنتا مضطر تتعلملك كام صنف أكل جديد وتحاول تدور على النت على طرق إزالة الدهون من على سطح البوتجاز.. ممكن وقتها تشفق على ستات العالم ومش بعيد تتحول لفيمنست لما ضهرك يقفش عليك من مسح الأرض

الغسيل.. وآآآه من الغسيل.. 

تقريبا سر تشغيل الغسالة هو السر القومي اللي حبت الأمهات تحتفظ بيه لنفسها.. زي بالظبط أماكن كل الحاجات اللي بتختفي من البيت وهي الوحيدة اللي بتلاقيها ف نفس المكان اللي بندور فيه.. عشان كدة الواحد ممكن يعمل أي حاجة ف البيت غير إنه يغسل.. لأنه ف الحقيقة فن محتاج تركيز والغلطة فيه بجون خصوصا مع هدومك الجديدة اللي لسه بشوكها.. عشان كدة إغسل على ايدك أحسن.. هو حل متعب صحيح لكن مضمون خصوصا مع الهدوم اللي أكيد إنتا دافع دم قلبك فيها.. وخلي الغسالات لإصحابها إحنا لا دجاليين ولا سحرة يامعلم

هو الصاحب ليه عند صاحبه أيه ؟..

لو علاقتك بصحابك كويسة بنسبة 50% لأ خليها 5000%.. وخصوصا مع المتجوزين منهم لإن دول هيبقوا منقذينك ف ساعات الإفلاس.. أو لما تحرق صنية الفراخ ف الفرن وتشيط الرز وقتها مش هيبقى فيه حل غير إنك تبرشط على واحد منهم تاكل عنده.. شوفت قد ايه الموضوع مهم.. الصحاب يا جماعة.. الصحاب

بتقبض كام ف الشهر ؟..

أنا عارفة إنه سؤال شخصي وحساس حبتين لكن هيفرق معاك جدا ف قرار الإستقلال وتحديدا مع أسعار الإيجارات الخيالية اللي بنسمع عنها اليومين دول.. عشان كدة لو عجبتك شقة وعايز تأجرها لازم ميكونش إيجارها بيزيد عن تِلت مرتبك وف مكان قريب من شغلك عشان توفر مواصلات على قد ما تقدر.. لإنه مهم أوي تظبط الدنيا وتحسبها كويس قبل أي قرار 

لازم تعرف فن التدبيق والتحويش.. 

أغلب الناس اللي بياخدوا قرار الإستقلال بيتعرضوا لزنقات ف الفلوس وخصوصا ف الأول وهما لسة مش متعودين ينظموا مصاريفهم والبنود الجديدة اللي دخلت ف ميزانيتهم.. ف إعملك ميزانية متخرش المية وشوف إيه الأهم ثم المهم وإيه الحاجات اللي تقدر تستغنى عنها وإيه اللي لأ.. عشان المركب تمشي ومحدش يشمت فيك 

خليك رجل الطلبات الأول.. 

عارف كل مشاوير البيت بتاعت السوبر ماركت والسوق اللي كنت بتهرب منها وبتلبسها لأخوك الصغير.. إبدأ بقى حبها من دلوقتي.. وأهو من باب تساعد مامتك وترحم اخوك شوية.. ومن ناحية تانية تبقى عارف الدنيا بتمشي ازاي وكل حاجة بتتجاب منين وتبقى واد حِرك كدة ومدقدق وتعرف من أين تؤكل الكتف زي ما بيقولوا.. ودة هيسهل عليك كتير لمّا تيجي تستقل.. هتبقى جامد وكل صحابك هيستعينوا بيك لما يحبوا يشتروا حاجة وتبقى دليلهم وبرنس القعدة 

إتبع سياسة التكمير.. 

طبعا بيت جديد يعني عفش وفرش ولوازم كتير وإنتا لسه بتقول ياهادي واللي جاي على قد اللي رايح.. وعشان تحل المشكلة دي إبدأ ف إتباع سياسة التكمير.. بمعنى إنك تبدأ تشيل كام حاجة ف البيت كدة على جنب كوباية.. معلقة.. حلة.. بطانية.. كل دة هتلاقيه متوافر وكتير ف بيوتنا المصرية الجميلة اللي بتعشق التخزين والكركبة.. ف بدل ماهما عاملين زحمة ف البيت إنتا بس هتاخدهم تستفاد منهم وأهو توفير ليك برضة 

معرفة البوابين كنوووز.. 

بعد ما بتتأكد إنك تمام وخلاص ظبطت أمورك وخلاص ناوي على الرحيل.. إفتكر إن البواب هو الشخص اللي عينه عبارة عن كاميرا عدستها 2000 ميجا بيكسل.. بتراقبك ف كل وقت حتى وإنتا نايم ف أوضة نومك.. وعشان البواب ميتحولش لروح شريرة بتطلعلك بلليل ف أحلامك أو تخليك تتضطر تتشتريلك نضارة سودة وبالطو كاكي تستخبى فيهم منه ف الرايحة والجاية.. حاول تصاحبه وتقرب منه جايز يرحمك وميقولش عليك حاجة وحشة.. والأحسن من كل دة تشوفلك شقة من غير بواب وتريحنا وتريح نفسك 

صباح الخير يا جاري إنتا ف حالك وأنا ف حالي.. 

ممكن تلاقي عمارة من غير بواب لكن مستحيل هتلاقي عمارة من غير جيران ودة نموذج تاني من مجتمعك الجديد.. هتلاقيهم ف البداية مستغربينك كدة والفضول هيموتهم من ناحيتك مش فاهمين انتا ناويلهم على إيه.. بس أحب أطمنك إن دة ف الأول بس.. بعد كدة هتبقى إنتا تسليتهم والمسلسل التركي المفضل بتاع ستات العمارة.. أما الرجالة ف هتلاقي اللي بيتجنبك شوية واللي بيحاول يصاحبك عشان يعرف عنك تفاصيل يحكيها لمراته اللي بدورها هتحكيها ف المسلسل التركي بتاع العمارة.. ماهي جمعية ودايرة يابا.. وهنا بصراحة مش عارفة أقولك أيه غير الله يكون ف عونك 

الخلاصة ..

المستقل دة ممكن يكون ابنك أو بنتك أو اختك أو اخوك.. ف حاول تحبه وتحتويه وتطبطب عليه.. دة شخص ساب حضن وبيت ودفا الأسرة وقابل وحش المدينة الفظيع بسبب المركزية وإنه مفيش شغل ف بلدهم.. وحتى لو هو من أهل المدينة وحابب يكون ليه حياته الخاصة ف هو حر.. إحنا مش دورنا التصنيف ولا الحكم على الناس ولا دورك برضة.. أوريفوار