لا يوجد طفل في هذا العالم لم يذهب إلى والده ويسأله ببراءة: "بابا يعني إيه ربنا؟"، وتختلف الإجابة وفقًا لثقافة الأب، هناك من يتحدث عن الجنة والنار، وهناك من يتلعثم ولا تحضره الكلمات التي تليق بجلالة الله عزل وجل، لكن مع الشاعر صلاح جاهين كان الأمر مبهرًا، لأن النتيجة كانت آخر قصيدة كتبها قبل وفاته في 21 أبريل 1986.

اقتربت الطفلة سامية جاهين ذات السنوات الخمس من والدها تسأله: يعني إيه ربنا؟، لم يقف صلاح جاهين أمام السؤال خائبًا، قلمه وشعره لم يخذلاه في الإجابة على ابنته، وعلى كل أطفال الدنيا الذين يبدؤون في البحث عن سر الكون وخالقه، تدفعهم الفطرة لطرح السؤال الصعب.

كعادته استطاع صلاح جاهين أن يبسط أعمق وصف لقدرة الله في صنعه، بعيون طفل رأي جاهين الله في الحب والابداع والتفكير، عدد كلمات "حب" في القصيدة غلبت كلمة "خوف" ذكرها مرة واحدة.

الفنان عمار الشريعي اكتشف تلك الأغنية النادرة، وحاول تقديمها بصوت الفنانة أمال ماهر عام 2008، لكن لم يظهر هذا المشروع للنور.

مين اللي كوّر الكرة الأرضية

مين اللي دوّرها كده بحنية

مين اللي في الفضا الكبير علّقها

ما تقعش منها أي نقطة ميه

مين اللي عمل البنى آدمين

مفكرين ومبدعين

مين اللي إدانا عقول وقلوب

وشفايف تسأل هو مين؟

مين اللى دايمًا صاحي واخد باله

وكلنا بنحبه جلّ جلاله

ربنا

احنا بنحب ربنا.. وربنا بيحبنا

و يحبنا أكتر كمان.. لما نحب بعضنا

عمل الفراشة بأجنحة وزوقها

وكل فكرة مدهشة حققها

البحر حط له ملح لأجل يعوِّم

وما سابش حاجة إلا لما خلقها

ربنا

مين اللي لما بنطلبه يسمعنا

وف وقت الحزن يشجعنا

ولما نفرح نشكر مين

على إنه بسطنا ومتعنا

مين اللى قلبه علينا واحد واحد

وكلنا بنحبه.. هو الواحد

ربنا

احنا بنحب ربنا.. وربنا بيحبنا

و يحبنا أكتر كمان.. لما نحب بعضنا

سألتني طفلة قلت: هوّ ما بيننا

موجود فى كل مكان وبيبصّ لنا

بيشوف بنسعد بعض ولا لأه

وم الخطر يحرسنا ويحوش عنّا

في كل مكان ربنا موجود

جنب الضعف وجنب المجهود

يا ربنا.. إنت جميل ومفيش في مثلك في الوجود

مين الصديق اللى مفيش غِنى عنه

وكلنا بنحبه ونخاف منه؟

يا ربنا.. إنت جميل ومفيش في مثلك في الوجود

يا ربنا.. إنت جميل ومفيش في مثلك في الوجود