5 أسباب تخليك مترجعش لل"ex"بتاعك حتى لو رِِجِعلك بيزحف..دوت بالبلدي

الإنفصال عن الحبيب دايمًا مؤلم.. مفيش كلام.. إنتا ممكن تقضي ليلة ورا ليلة.. قاعد تسح وتعيط وتتشحتف لحد ماتنام.. بتحاول تعرف ايه اللي حصل.. ايه الأسباب وف الأخر.. بتتجاوز وبتبقى ميت فل وأربعتاشر..

بتتحرك لخانة تانية ومرحلة تانية ف حياتك.. بس بعد كدة.. إيه بقى اللي بيحصل؟.. فجأة بتلاقي الإكس بتاعك بيخبط على الباب أو بيرن عليك وعاوز يرجع بأي شكل.. وبتسمع كلام كتير جداً كله توسلات ونواح وطلب سماح وكلام من دة كتير يعني..

أول حاجة بتحسها لما دة بيحصل هو إنك بتنتعش متكدبش بتنتعش وإنتا عارف.. بتحس بقيمتك.. وبتحس إنك إنتصرت وإنك صح وإنك مش قليل وإنك أصلاً  كبير ومينفعش حد يستغنى عنك وإنك على الأقل مهم لشخص واحد ف الكوكب وبيقول إنه ميقدرش يعيش من غيرك.. قشطة.. كل دة كويس ومفيهوش مشاكل.. ماسورة مشاعر وإتكسرت جواك فجأة.. طبيعي تحس كل الميكس دة مع بعضه.. دة طبيعي ومش عيب..

ثم بالعكس.. دة جايز هو دة اللي إنتا بتحلم بيه ف السر من ساعة ما إتسابت كمان..بس تفتكر الحلم دة لما يتحقق هتبقى مبسوط؟..خصوصاً ف الوقت اللي بتفكر فيه ومش عارف لسة تاخد قرار.. ترجع ولا لأا؟.. دول خمس حاجات هيخلوك تفكر من تاني.. ترجع.. ولا.. لأ..مجرد 5 أسباب جايز يكونوا صح او لأ..

1- فاكر سبتوا بعض ليه من الأساس؟

عقلك دلوقتي جواه فيضان مشاعر وذكريات حلوة.. حاجات بسيطة وحلوة جداً كانت بتجمعكوا إنتوا بس سوا .. دوناً عن البلد كلها.. دوناً عن الكوكب كله ..

طب والحاجات الوحشة؟.. نسيتها؟!.. التفاصيل والعقد والطباع المختلفة وعدم وجود رغبة ف التقبل أو التغير.. كل دة نسيته؟.. معقول؟..

عموماً الأبحاث العلمية بتقول إن الواحد لما بييجي يفتكر أو يتعامل مع الإكس بتاعه من جديد بيميل لإنه يمنتچ تفاصيل ومشاهد كتير وبيضحك عليك ويبينلك الفترة دي كأنها كانت فترة وردية.. ويخليك تحن وتتشحتف متفهمش ليه!..

وغالباً دي طريقة عقلك الباطن ف الطبطبة على عقلك الواعي.. تحسه بيقولك بالبلدي كدة "معلش.. مكانتش غلطتك.. مملكتك ليست من هذا العالم".. ويقعد بقى يردد ف ودانك وف كواليس تفكيرك كل الكلام البلاستك دة اللي مبيأكلش عيش ..

بس أقولك .. الصح هو إنك تفتكر حاجة واحدة.. الوجع بتاع الإنفصال.. إفتكر.. خصوصاً وإنه ممكن يتكرر تاني لو ضعفت وإديت فرصة تانية.. ورجعت.

2- أبسلوتلي..محدش بيتغير..

هتحس تاني إحساسات مش كويسة.. كل القلق والأو?ر ثينكينج والألم والإكتئاب اللي حسيتهم لما سبتوا بعض جايز خلاص نسيتهم وإنتا ماصدقت إنهم إتبددوا وبقيت ميت فل وأربعتاشر..كمان عدى وقت كافي يسمحلك تعيد نظر وتبص للموضوع من برة وتاخد بالك بشكل موضوعي بحت إن التواصل من تاني مع اللي إتنسى (أو بالأصح مع اللي إنتا ماصدقت إنه إتنسى) وبطل يحتل مساحات ف عقلك بالغصب والإقتدار.. بيسببلك آلام ملهاش أي تلاتين لازمة.. ف ليه ترجع لورا وإنتا ماصدقت إنك يدوبك فكيت من الصدمة والتجمد وبدأت تتحرك لقدام.. طالما تجاوزت يبقى تبص لقدام أحسن مش لورا.

3- يفيد بإيه الندم لما الثقة راحت خلاص؟..
تفيد بإيه العلاقة مهما كانت حلوة.. من غير ثقة؟.. سؤال صعب دة خللي بالك.. ف الوقت اللي فكرة الرجوع للي كان وإنقضي..بتلح علي عقلك بشدة.. إنتا بتتناسى وبتطنش وبتطرمخ عن عمد على مسألة إنه خلاص..معادش في ثقة..

الشخص دة سبقله داس على قلبك..كسره .. فتفته زي الإزاز لمليون حتة.. عمل كدة مرة.. إيه بقى اللي يمنعه يكرر دة تاني؟ .. إذا كنت إنتا ياعم الحاج مصعبتش عليه أول مرة.. أهو السؤال الرخم دة هيفضل يلعب ف كواليس عقلك طول الوقت لما ترجع لإكسك تاني.. وهيبقى سبب جديد للأسف.. يصعب عليك جدا مسألة إنك تجددله رخص الثقة مابينكم.

4- خليك فاكر..إنتا تستاهل الأحسن والأفضل دايماً..
أه..إنتا تستاهل الأفضل والأحسن دايماً.. كلام بديهي أنا عارف بس للأسف إحنا كلنا بنقوله ومبنعملش بيه..

إنتا تستاهل حد ميبقاش نِزناز* دائم ف دماغك وف مشاعرك.. تستاهل حد ميخلعش ف عز مانتا محتاجه.. تستاهل حد يواجه معاك الحياة بصعوباتها.. بحلوها ومرها.. مش موجود بس عشان يُقش الحلاوة ووقت الجد يهبأ* منك..

تستاهل حد تبقى إنتا أحلى حاجة حصلتله ف حياته.. مش مجرد مرحلة هيتجاوزها أو يزهق منها أو يعتبرها سلمة.. يطلع عليها لحد تاني.. عيب والله.. شخص زي دة ميستاهلشي أصلاً  تفكر إنك تفضي وقت ف اليوم عشان تفكر فيه.. أبسلوتلي يعني.

5- اللي يروح هييجي اللي أحسن منه..الدنيا مش واقفة على حد..

لو دورت كويس هتلاقي الأحسن والأنسبلك ماهو برضة بالعقل كدة واحدة واحدة.. العالم فيه بتاع سبعة تمانية مليار بني آدم.. مش معقول مفيش فيهم حد إبن حلال ينفع معاك.. ثم إنتا هتعرف إزاي إلا لما تدور.. ف حتة من العالم دلوقتي أكيد في حد زيك كدة برضة.. قاعد بيفكر يرجع للإكس بتاعه ولا يشوفله حد أفضل.. الصح تفكك من الإكس وكفاية الوقت اللي ضاع وتشوف نصيبك ف حد أنسب وأحسن ف الوقت اللي باقيلك ف الحياة..ودة أفضل وأروق.

الخلاصة:

إقفل صفحة الماضي اللي راح وبص لقدام.. لبكرة..ومتحاولش تحيي حاجة ماتت وفاتت خلاص بلا أمل او طائل.. يعني ببساطة.. إعتبر إنك يدوبك كان عندك إكس.. وراح.

هوامش

----------------------------------------------------------------------------------------------------------------------------------------------

نِزناز : يعني حاجة تبدو تافهة..بس هي مش تافهة ابدا بالنسبالك..بتزن بشكل دائم ممل ورخم جوة النفسية ومينفعش تشتكي منها بشكل واضح محدد المعالم بحيث ينفع يتصاغ ف كلام.

يهبأ : يعني يخلع او يفلسع او يجري.

                                     ******************************************

لو الكلام اللي فوق دة فيه حاجة ضايقتك او قلبت مودك بقترح تعدل طاسة مزاجك بالمزيكا دي..وتنبسط..تحياتي.