بالصور.. الكائن الكيوت مووت ف نفسه

الأحد، 07 يناير 2018 03:42 م

بالصور.. أكتر كائن كيوت مووت

الكابياء الخنزيرية يعتبر من أكتر الكائنات الكيوت على كوكب الأرض (الاسم العلمي:Cavia porcellus) وأحيانا بيتقال عليه "الخنزير الغيني" (بالإنجليزية: Guinea_Pigs) متفهمش ليه مع انه ولا ليه علاقة بالخنازير ولا بغينيا لا من قريب ولا من بعيد بس واضح ان نصيبه كدة..

الكتكوت الجميل الكيوت دة نوع من الحيوانات بيتبع جنس كابياء من فصيلة الكابيائية.. بينشط في الطبيعة ليلياً للبحث عن غذائه المتكون من الخضراوات مثل الجزر والكرنب والقرنبيط والحبوب الجافة.

الكابياء الخنزيرية دي حيوانات خجولة جدا بتقضي معظم الوقت مستخبية وعشان كدة اي حد بيربيها بيعملها زي ملجأ صغنن أو بيت خاص ليها كدة عشان هي مبتحبش تقريبا تقعد مع حد وبتقدر خصوصيتها بجانب انها بتتكسف زي ماقولنا.. حجمها بيبقى ما بين 8 ل 14 بوصة.. يعني صغنتوتة خالص ياعيني..

الاسم العجيب للكائن الكيوت دة جه منين:

الكابياء الخنزيرية هي على عكس تسميتها ولا تنفع خنزير ولا ليها علاقة بغينيا اصلا.. ابسلوتلي يعني.. هي أساسا قارض موطنه الأصلي أمريكا الجنوبية وإتسمى جنس الكابياء "بخنزير غينيا" لمجرد انه له صوت يقارب صوت الخنازير البرية في غينيا (شوف فتاكة الانسان بتوصل لحد فين).. وبيتقال عليه برضة الأسامي دي كأسامي شهرة مش أكتر: أرنب الجبل.. الوبر.. الكافي.. أرنب رومي.. أرنب هندي.. وكتير من الناس بتغلط وتتلخبط مابينه وبين "الهامستر" مع انه مش من الأقداد إطلاقا واللي هي فصيلة مستقلة لوحدها اساسا بس محدش يعرف.

محل سكن الكائن الكيوت دة:

بيستوطن القارض الجميل الكيوت دة البرازيل وبيرو. ويعتبر موطنه الأصلي في جبال الأنديز ف أمريكا الجنوبية. وبتعيش أنواع كثيرة منه في أوروبا بعد نقلهم بسبب الغزو الاسباني.. (يابخته والله).

الخصائص الفيزيائية الشكلية الخارجية للكائن الكيوت:

من مميزات القارض الكيوت موت دة بطنه المليانة (عنده كرش كيوت مووت على فكرة) والدائري الشكل واللي بيأثر على موضع رجليه ف جسمه.. ودة مش عشان هو بياكل كتير ولا عشان هو مهمل ف نفسه ومحتاج دايت.. ابدا.. الكرش دة عشان الكائن الكيوت دة بيحتاج جهاز هضمي كبير عشان يعرف يهضم المواد النباتية الصلبة اللي بيحبها وبيلغ فيها عمال على بطال طول الوقت.

التكاثر عند الكائن الكيوت:

بيتكاثر خنزير غينيا خمس مرات ف السنة الواحدة بس ومدة الحمل عند أنثى الكائن دة هي من 59-72 يوما وعدد جرائه بيتراوح ما بين 2-4 مولود لكل مرة ( يعني منتج ماشاء الله وبيحافظ على نوعه كويس وأكيد مستريح ماديا برضة).. بيتراوح عمر هذا الحيوان من 5-7 سنوات بس.. مش أكتر.

الصغنتتين من الكائن دة بيتولدوا (بعكس حيوانات الجيب الاليفة) كاملين بعيون متفتحة ووبر كامل النمو وأذان متفتحة وأسنان وأيضا بمجرد الولادة يستطيعون المشي.. يعني الكائن دة هو الكائن الوحيد اللي يقدر يقول انه جاي الدنيا جاهز من ساعة ما إتولد وميبقاش كداب ولا بيبالغ.

النظام الغذائي بتاع الكائن الكيوت:

هي حيوانات نباتية تتغذى على الطعام الطازج مثل البرسيم.. الهندباء (جذور السريس والشيكوريا).. الكرفس.. الخيار.. الذرة الصفراء.. الفلفل الحلو.. القرنبيط.. الملفوف (الكرنب).. الجزر.. الخس.. (يفضل اطعامها من حين لآخر وليس يوميا) والفاكهة والفاصوليا المطبوخة بالصلصة وحتى العيش بياكله كمان بس مينفعش تشربها الحليب ومشتقاته أو اللحوم أو حتى السكريات.

الخنزير الغيني يتطلب مستوى عالي من الفيتامينات وبخاصة حامض الفوليك وفيتامين سي لأن جسمه مبيكونش الفيتامين دة. وبيؤدي نقص فيتامين سي إلى اصابته بداء الإسقربوط.. وجايز جدا برضة يكون بيجيله إكتئاب من القعدة ف مكان واحد مع الإنسان بس محدش يعرف.

إستئناس الكائن الكيوت وتربيته:

تعتبر خنازير غينيا الجميلة دي من أفضل الحيوانات المستأنسة التي ينفع تربيها في المنازل.. وأكثرها إنتشارا.. خد بالك بقى ان القوارض دي بتحتاج لعناية خاصة.. وبتقدر تميز صاحبها بإصدارها لصوت مميز. كما أنها قلما ما بتعض أو تخدش حد حتى وكمان فقرية وبتقدر العشرة ومبيهونش عليها العيش والملح ومبتهربش من أقفاصها ف أغلب الأوقات.. حتى لو أتيحت لها الفرصة!!.

إستغلال الإنسان الفظيع للكائن الكيوت موت:

الانسان العاقل اللي مفيش زيه.. بيستخدم خنزير غينيا المسكين دة ف المختبرات لإجراء التجارب عليه خصوصاً في مجال المساحيق والأدوية الجلدية قال ايه عشان تكوين بشرته مطابق لتكوين بشرة الإنسان.. شوف الافترا والظلم.