كتب: مصطفى خضر

ماتعملش أي حاجة علشان تثبت أي حاجة لأي حد .. اعمل اللي أنت عاوزه واللي أنت مصدقه، واللي لايق عليك وعلى روحك.. اعمل زي الفيل.

عندي قناعة من وأنا عيل صغير إن الفيل هو ملك الغابة وإنه سايب الأسد ياكل عيش، وإنه لما بيحب يظطبه بيظبطه، عندي قناعة تانية بتقول إننا كبني آدم فينا صفات كتير حيوانية أو بالأصح صفاتنا الحيوانية بتطلع "وقت الحقيقة"، "وقت تنازلنا عن آدميتنا" ف بتلاقي حوادث اغتصاب وسرقة وتجارة أعضاء وفضح عورات وهكذ وهكذا.

 وعندي قناعة تالتة بتقول إن كمان الحيوانات عندها صفات آدمية بحتة بيتخلى عنها بعض الآدميين وبشوف إن الفيل هو أكتر حيوان متمسك بصفاته الآدمية اللي لو تمسك بيها البشر هيبقوا بشر، فهو  إنسان أكتر من الإنسان.

في الأول تعالوا نعرف شوية حاجات عن الفيل، خلوني مصدق إن الفيل هو ملك الغابة الحقيقي.

 بالتفكير المنطقي لازم نسأل على مقاييس المُلك أو بالمعنى الأصح مقاييس الأحق بالمُلك – إذا كان المُلك شئ جيد- ودي جزئية هنرجعلها بعدين.

تعالوا كده نعمل مقارنة "بالمنطق" بين الفيل – الملك الحقيقي للغابة- والأسد – ملك الأونطة والصوت العالي.

1- القتال

الفيل :- لا يُهاجم الفيل أي حيوان آخر إلا للدفاع عن نفسه، واستخدامه لقوته يكون تدريجياً، فيحذر أكثر من مرة، ثم يبدأ بالتخويف ثم القتال إن لزم الأمر.

 الأسد :- يهجم بغدر على كل الحيوانات تقريباً حتى بني فصيلته "السنوريات " فإما يخنق أو يكسر الرقبة وعادة من تقوم بذلك هى أثنى الأسد، في حين أن الأسد يحرس العرين.

الأسود لا تستطيع أن تهجم وحيدة أو مجتمعة على فيل بالغ ذكرا كان أو أنثى فعادة تهجم على الأفيال الصغيرة المنفردة.

*لقتل فيل واحد يحتاج لهجوم من قبل 5 إلى 10 أسود على الأقل!!

يستطيع الفيل أن يقتل التمساح ووحيد القرن وغيرهم من الحيوانات المفترسة، التي تتميز كل منها بصفة جسدية أو صفتين على الأقل لا يستطيع الأسد مقاومتها.

2- التعلُم

الفيل :- هو واحد من أكتر الحيوانات ذكاء، مخه يزن 5 كيلو جرامات ويحتوي على مجموعة من الطبقات أكثر تركيبا وتعقيدا من أي حيوان تاني باستثناء الحوت.

الفيل عنده قدرة على إظهار مشاعره: الفرح .. الزعل .. السعادة .. الشفقة .. التعاون، الفيل عنده وعي ذاتي ويقدر يهزر معاك، الفيل يقدر يتعلم يعمل حاجات بخرطومه في بشر مبيعرفوش يعملوها، زي الرسم ورش المياة وأحياناً بيقدروا يفتحوا الأقفال كمان.. متخيلين!!

الأسد :-   لما الأسد بيعمل حاجة غريبة عنه شوية وهى نط الحواجز ف السيرك مبيتعلمهاش .. لا.. ده بيتم ترويضه عليها، يعني بيعمل كده خوفاً من العقاب، فاهمين الفرق بين التعليم والترويض ؟؟!! تقريبا ده ممكن يلخص الفرق بين الفيل والأسد.

3- المرونة

الفيل:- كائن طيب، وشرس عند الحاجة، ويصل في مرونته إلى أن يكون وسيلة ترفيه، أي من أقصى اليمين إلى أقصى اليسار، ودي قمة المرونة.

الأسد :- كائن غير مرن لا يستقبل الأشياء بسهولة ولا يتعلمها بسهولة ولا يقبلها بسهولة.

4:- الوفاء

الفيل :- فيه فيديو رائع عن فيل بينقذ فتاة من الغرق، الفيل كان بينقذها بقلبه، كان خايف عليها فعلاً، كان بيتصرف بفطرة كبيرة وطاغية على أي حاجة تانية، تحسه أب خايف على بنته من الغرق وبيتصرف بكل حب وحكمة في نفس الوقت.

ده بالنسبة لتعامله مع الإنسان أما في تعامله مع الفيلة، ف الفيل من أهم الكائنات الوفية لـ "زوجته" رفيقة العمر.. مرة صياد كان بيحاول يصطاد "فيلة" وضربها بالرصاص وجت الرصاصة فيها فعلاً، فجري زوجها "الفيل" لإنقاذها مما أرعب الصياد وخلاه يهرب، رجع الصياد بعد شهر واندهش إن الفيلة لسه عايشة وإن زوجها بيجيب لها الطعام والشراب كل يوم لحد عندها وهى مرتاحة وده السر اللي خلاها تفضل عايشة.

الأسد : أظن محدش فينا هينسى هجوم الأسد على المدربين بتوعه في أكتر من وقت وزمان ومكان، وقتله لبعضهم كمان، ده غير إننا ذكرنا قبل كده إن زوجته هى اللي بتجيب له الأكل وهى مريح في العرين.

5 :- الطبيعة

الفيل: الفيل مشهور بقوة تحمله وبحمله للأثقال لمسافات بعيدة، وبشقه الطرق واستخدام "زلومته" في التنظيف والحمل وغيره، وشقه مجاري المياة علشان باقي الحيوانات تشرب وتعيش .

الأسد :- متغطرس لا يعمل إلا لإسعاد نفسه وفقط

6 :- العمر
الفيل: الفيل بيبقى شاب وهو عنده 70 سنة وكل ما بيكبر أكتر بيكون مغري للأنثى أكتر وأكتر، ومن أهم صفات الفيل إنه تقريباً بيستحمى كل يوم بالماء البارد فتلاقي دايماً ملعلط كده ونضيف وبيوصل في العمر ل 130 سنة.

الأسد : معظم الأسود، على الرغم من إن مفيش حيوانات بتتغذى عليها، بتموت بشكل كبير بسبب الصراع مع البشر أو غيرها من الأسود، وتحديداً الذكور منها، التي يُحتمل أن تحتك بعنف بشكل أكبر من الإناث مع ذكور منافسة، كونها الحارسة الأساسية.

 ذكور الأسود قد تصل لسن 15 أو 16 عاماً فقط في البرية.

7:- الموت
الفيل:  بيحس إنه هيموت خلاص، وأول ما يحس بيروح يموت جنب مقابر أهله اللي بالمناسبة بيزورها زينا بالظبط _ ده لو افتكرنا- ممكن يمشي أميال علشان يموت بعيد، ولما فيل فيهم بيموت بيقفوا احتراما للموت، وبرضه بيعلموا حاجة شبه البشر و"بياخدوا العزا" وبيزوروه من وقت للتاني، الفيل الصغير "دغفل"  لما بتموت أمه في معظم الأحيان، بيموت من الحزن عليها بعد ما يهزل ويضعف من حزنه.

الأسد:- يموت الأسد عادة في "خناقة" بلا أي رابط بعيلته أو تقديس لعملية الموت أو ربط بينه وبين الأجيال القادمة.

محبتش اتكلم عن حاجات علمية زي ذاكرة الفيل وحاسة الشم وقدرته على التنبؤ لأن ده كلام غالباً معروف، حبيت أشرح لكم جزء من إحساسي تجاه الفيل والأسد.

الفيل والنيل والفضة اسم ولون فيهم هدوء من بعض
الأسد والبحر والدهب شكل وغدر فيهم غضب من بعض.

الحقيقة أنا عارف إني متطرف في رأي – كالعادة - وإني ميال أكتر لإثبات نظريتي إن الفيل ملك الغابة، وإني أكيد لو كنت دورت على معلومات أكتر عن الأسد تقلل من نجاح نظريتي كنت لاقيت، بس من باب المهنية والعدل اللي أنا مش مؤمن بيهم أوي كشخص، هطلب منكم تدوروا وتقولولي يا ترى شايفين الفيل فعلا هو ملك الغابة ولا الأسد، ولا عندكم رأي تالت؟.