قرر الرحالة المصري أحمد حجاجوفيتش، زيارة ما يسمى بدولة "ليبرلاند"، بعد تلقيه عددا من الرسائل تستفسر عن هذه الدولة الجديدةـ،التي ذاع صيتها في الإعلام مؤخرا.

وقال الرحالة المصري أحمد حجاجوفيتش، عبر حسابه الشخصي على فيس بوك، "إن المصريين كلهم اليومين اللي فاتوا دول معندهومش سيرة على "فيس بوك" غير ما يسمى بدولة "ليبرلاند" وجالنا عشرات الرسائل الخاصة بتسألنا عنها، فالرحالة المصري حجاجوفيتش قرر زيارتها كأول مصري وعربي يروح هناك، عشان يعرف الحقيقة والكلام اللي جاي ده مهم جدا جدا لكل الناس المهتمة بالموضوع والموضوع قد يكون صادما للبعض بس إحنا بنقولهلكم عشان متتجروش ورا آمال زائفة".

وأضاف حجاجوفيتش "أول حاجة لازم كل الناس تعرفها إن الموضوع ده كله عبارة عن وهم كبير قوي ومفيش حد عايش هناك أصلا، والشاب "فيت يدليكا" اللي أعلن نفسه رئيس عليها، كل حكايته إنه طول عمره نفسه يتشهر، وإن الناس تتكلم عنه ودخل عالم السياسة والإعلام وفشل، راح عمل اتفاقية مع شباب صحفيين صحابه عشان يبعتوله الخبر بتاعه ده لأكتر عدد ممكن من وكالات الأنباء، وصاحبته عملت ديزاين علم بالألوان والحاجات اللي هي بتحبها، حمامة وبحر وشمس".

وأشار حجاجوفيتش إلى أن "الشاب راح مكان فيه غابات وشجر بين كرواتيا وصربيا مساحته كلها على بعضها 7 كم مربع، يعني مصر الجديدة عندنا أكبر منها بحوالي 20 مرة... وقال الأرض دي فاضية مافيهاش حد فحعتبرها بتاعتي أنا وصاحبتي وأصحابي، وهو أصلا من جمهورية التشيك يعني ولا كرواتي ولا صربي!!يعني بالظبط كإن واحد أجنبي جه مصر وراح واقف في الصحرا على طريق القاهرة - السخنة وراح عامل خيمة وقالك مفيش حد عايش هنا، الأرض دي بتاعتي وبدعوا العالم كله يجي بلدي الجديدة و يسميها "?ليبرلاند?" أو "أرض الحرية" بالعربي".

وأوضح حجاجوفيتش أن "الشاب أوهم الناس كلها إن كمان مفيش عملة وفلوس، وإنهم حيستخدموا البيت كوينز "عملة إلكترونية على الإنترنت" بس عشان تكون عملتهم الرسمية، والبيت كوين الواحد ثمنه حوالي 400 دولار أمريكي يعني حوالي3000 جنيه مصري" .

واستطرد حجاجوفيتش "الأخطر من ده كله إن كل المعلومات الشخصية بتاعة اللي بيقدم علي الموضوع ده كلها متجسس عليها، وبتوصل لحكومات وسفارات الدول الكبرى عشان يعرفوا منها مين اللي عايز يسافر من بلده ومايرجعش وبالتالي لو راح بعد كده يقدم على فيزا سفر في أي سفارة بتاعة بلد كبيرة حيتم "رفضه"، بعد ما يدفع تمن التأشيرة ويسلم أوراقه، عشان يبقى خسر كل حاجة"..

وتساءل حجاجوفيتش "للي عايز يهاجر ويسيب بلده عشان كل واحد يفكر فيه كويس أوي أوي، لو عايز تهاجر وشايف مصر بلد وحشة ومش لايقة مع عقليتك"، مضيفا "هو لو أخدنا حتة أرض في حجم مساحة مصر كلها "مش بس مصر الجديدة أو مدينة نصر" في حتة تانية في العالم ونقلنا ليها سكان مصر بنفس عادتهم وتقاليدهم وأسسنا دولة جديدة باسم جديد وعلم جديد ... تفتكروا حتكون عاملة إزاي؟".

واختتم حجاجوفيتش حديثه "أكيد ومن غير أي تفكير طبعا حتكون نسخة من نفس اللي عايشين فيه دلوقتي من غير أي تغيير (إن الله لا يغير ما بقوم حتي يغيروا ما بأنفسهم)".