مجتمعنا ..مجتمع عشري بيحب اللمة و الاختلاط و الكلام الكتير والضحك ..

مجتمع بيتكلم على طول وفى كل حاجة وفى كل وقت ... مش بيحب قيود ولا حد يمنعه من المناقشة ..

فى المواصلات .. الاماكن العامة .. مكان العمل .. مناسبة عائلية .. مشاهدة مباراة ... متابعة نشرة أخبار .. ده غير طبعا كل مواقع التواصل الاجتماعى اللى اعتقد إن لولا مجتمعنا ماكنتش أخدت كل الشهرة دى ..

فى كل ده هتصادف ناس بتتناقش فى موضوع .. فى اى حاجة وكل حاجة .. لو الحوار بين شخصين فى المترو مثلا أو فى مكان عام .. هتلاقى واحد تالت دخل فى النقاش وقال رأيه ، وشخص رابع وخامس ... ويبدأ الجدل والشد والجذب .. ويمكن توصل لحدة فى الكلام وصوت عالى خاصة لو الموضوع دينى أو سياسى ,, وينتهى إما بخناقة أو ضحكة من الكل وكلمة صباحك فل ...

وفى السنين القليلة اللى فاتت .. ملاحظين كلنا إن كم الخلافات الشخصية زاد أوى بين أفراد المجتمع سواء زملاء أو أقارب من عائلة واحدة .. أو حتى مجرد تعامل عابر ..

أسباب الخلافات كتيرة لكن معظمها هنلاقى إنه سوء توصيل رأينا للآخرين .. عدم قدرتنا على الحوار المتحضر .. السلوك الكلامى بين أفراد المجتمع ...

المعظم عايز يتكلم وبس .. ورأيه هو اللى صح وبس .. وفرض الرأى على الاخرين من غير ماناخد بالنا إن ده تعدى على حرية الآخر .. اللى يعتبر فى بعض الدول جريمة يعاقب عليها القانون ..

مسألة أخدت من تفكيري كتير .. وشايفة ان كلنا نعانى منها و كلنا ممكن نكون وقعنا فى خطأها ..

لازم يكون فى قواعد أو ارشادات تكون دليل لنا فى الحوار مع أى شخص ندخل معاه فى نقاش ..

ارشادات ممكن الاستعانة بها بسهولة ... نتذكرها .. نتبعها .. نعود نفسنا عليها .. تخلى أى مناقشة نخرج منها من غير خسائر مجتمعية و لاشد أعصاب

اسمحوا لى أقدم لكم عدة قواعد تحت اسم فرضيات ومبادىء الحوار ... وضعتها من خلال مراقبتى لسلوكيتنا كلنا فى مواضع مختلفة من النقاشات وانواع متعددة من الحوارات فى كل المجالات ..

المبادىء دى تقدر تساعدنا مهما كان الموضوع اللى بناقشه ومع اى شخص سواء كان الموضوع شخصى او عام.

مش هطول عليكم هم 11 مبدأ .. افتكروهم واتبعوهم .. والأهم لازم تكونوا مؤمنين إن مستوى الحوار فى مجتمعنا لازم يرتقى و مع استخدام مبادىء الحوار صورتنا امام نفسنا وامام الاخرين أكيد هتكون أفضل

ومبادئنا هى :

1- الإيمان بأن لكل إنسان الحق فى التعبير عن ذاته ووجهة نظره مهما كانت.

2-  افتراض حسن النية بين المتحاورين.

3- الفصل بين الشخص والموقف أى إذا كان الرأى لايعجبك فلايعنى ذلك أن تحكم على الشخص بجميع صفاته بالسلب.

4-  علم كل منا محدود لم نصل إلى الحقيقة كاملة وعدم معرفتك للشىء لايعنى عدم وجوده.

5- الحوار هدفه الوصول للحق سواء عن طريقى أو عن طريق محاورى وليس الهدف من الحوار استعراض قدرات المتحاورين.

6-  النقد لايعنى انتقاصا من شخص المحاور ولكن وسيلة لتوضيح وجهة نظر مختلفة وقد يكون إضفاء مساحة جديدة لتفكير جديد أو تعديل جيد.

7-  الحوار للتكامل وليس للتقاسم او التنافر.. والإختلاف فى الآراء طبيعى لإختلاف الطباع والأفكار والثقافات.

8-  إذا كان الحوار للجدال فعليك أن تكسبه بأن لا تشترك فيه من البداية.

9-  كل طرف فى الحوار مسئول عن وجهة نظره والنتيجة المترتبة عليها.

10-  التنازل عن الرأى الخاطىء  ليس انكسار ولكن انتصار بالرجوع إلى الحق.

11-  نتيجة الحوار بالإتفاق أو الإختلاف لا تأثير لها على العلاقة الإنسانية بين الطرفين كما ان نهاية الحوار إعلان لبدء حوار جديد اكثر تفهما بشكل أكثر ودية.

...

أتمنى إن هذه الارشادات تكون سهلة فى التطبيق وإننا نجرب استخدامها .. لإننا بالفعل كمجتمع نستحق مستوى أرقى فى التحاور والمناقشة ..

دمتم بكل رقى وخير