دنيتك التانية
عبدالهادي فتحي
الثلاثاء، 28 يونيو 2016 11:13 م
الثلاثاء، 28 يونيو 2016 11:13 م
كلمة السر فى شغلك الجديد او شغلك الدائم هى الانطباع الاول، مش مع مديرك او مديرتك بس، انما مع زمايلك كلهم. زى ما بيقولوا الانطباع الاول يدوم وده الحا ل فى الشغل، فاول انطباع مديرك هياخده عنك هو البذرة لبداية حياتك العملية والفكرة اللى هتفضل معاه على طول. وده معناه ان اول يوم شغل لازم تنوى انك تسيب انطباع جيد عند الكل وتعمل علاقة جميلة، بس طبعا مع الوضع فى الاعتبار ان مهما كانت الطريقة المتفائلة الجميلة والابتسامة الدائمة انها تكون فى اطار العمل وخصوصا لو انت شاب ومديرتك ست والعكس صحيح عشان متتفهمش غلط.
اول شىء لازم تقسم نفسك داخليا حياتك الشخصية وحياتك العملية، بنزولك من بيتك الصبح انت موظف يعنى كل مشاكل البيت والاصحاب لازم تتشال على جنب لغاية ما تخرج من باب الشركة. فصل الحياة الشخصية عن الحياة العملية هى اول طرق النجاح كانطباع اول او كنجاح فى العمل. مش مطلوب انك تكون ممثل انما المطلوب انك تلبس ماسك الشغل يعنى رايح تشتغل ابتسامتك هى بداية يومك لان الابتسامة معدية بمعنى لو دخلت الشغل مكشر او متضايق هتعدى كل اللى معاك و يضيع اليوم فى السؤال المتكرر: مالك النهاردة شكلك متضايق و للاسف السؤال ده حتى لو مكنتش متضايق ممكن يحسسك انك فعلا متضايق. بس برده ده مش معناه انك لما تلاقى زميل فعلا متضايق انك تساله مرة عن احواله وتفتح باب حوار لو كان حابب المشاركة او الفضفضة.
دنيتك اللى بتقضى فيها معظم حياتك لازم تكون بيئة مريحة نفسيا يعنى مفيهاش حاجة ان كل فترة كدة ترش رشة ورد جميل شيكولاتة لزمايلك وميهمكش اى حد بخيل مثلا يقول عليك انك بتحاول تكسب الناس بالحاجات دى. انت مش ساعات بتكون مخنوق وتكلم السوبرماركت او تعدى عليه وانت راجع من الشغل وتجيب كمية حلويات تطلع فيهم همك؟؟ ايش حال دى دنيتك اللى بتكون فيها اكتر ما بتكون فى بيتك؟
حاجة تانية مهمة اوى برده ان اى مجال عمل بيكون فيه منافسة شريفة، منافسة طبعا عشان التميز والاحساس بالذات. فيه بقة خيط رفيع جدا بين المنافسة والنفسنة وغالبا دى بتكون موجودة فى كل حتة مش فى الشغل بس، ازاى اتعامل مع النفسنة؟؟ دى حاجة مفيش اسهل منها، المفروض كل واحد عارف تخصصاته الوظيفية وايه اللى ليه وايه اللى عليه يعنى ماشى فى تراك معين، ممكن تمشى على مهلك ممكن تجرى ممكن تتسابق طالما مبتجيش على تراك حد تانى. تميز وابدع واعمل اللى عليك، واعتبر اى كلام ايجابى ليك تقدير واى كلام سلبى فى غير موقعه (نفسنة) تحفيز ان انت كده صح. ومعنى كلام سلبى تهبيط او تقليل او انتقاد لشغلك، قبل ما تترجم الكلام ده على انه نفسنة استشير زمايلك او مديرك ولو اختلف اكتر من اتنين وقالوا ان الكلام ده مش صحيح يبقى كدة انت صح ولازم تعرف انك ماشى فى التراك السليم بتاعك.
ساعات كتير وخصوصا المبتدئين فى العمل جديد بيوجهوا مواقف معينة مع انماط معينة ممكن تكون سبب مضايقة ليهم واهم هذه الانماط ممكن يكون مدير عينيه زايغة وفى هذه الحالة يجب وضع الحدود من اول يوم عن طريق الكلام او لغة الجسم الحادة ويجب الابتعاد تماما عن الحرج فى التعامل لان الحرج فى التعامل ممكن ان يؤدى الى الفهم الخاطىء.
الشغل هو عيلتك التانية يعنى الهزار مسموح فى حدود المجتمع والحياه الاجتماعية، ولازم يكون فى مناخ الشغل احتفال باعياد ميلاد الزملاء، غداء او افطار جماعى ممكن داخل او خارج العمل، رحلات. لان التجمعات دي بتزود جو الالفة داخل مجال العمل.
من الطبيعى ان يحصل خلافات او مضايقات او ضغط شغل وده ممكن يأثر عليك وعلى ادائك او معاملاتك مع زمايلك، في الحالة دي ولما تحس انك ممكن تنفعل على اى حد، حاول تنفرد بنفسك دقائق معدودة وتسمع موسيقى او تغمض عينيك عشان ده بيقلل من الضغط وبيفصل المخ وبيعمل انتعاشة تخليك تشوف الحياة بايجابية اكثر وتساعد على اتخاذ قرارات سليمة والتحكم فى العصبية، لان العصبية من الحاجات اللي ممكن تؤثر على مستقبلك المهنى.
اخيرا بعض النصائح البسيطة اللى ممكن تنفعك فى شغلك:
- اوعى تزيف حقيقتك خليك بطبيعتك مترسمش شخصية مش بتاعتك انت مش عمر الشريف
- اوعى تقول انك عارف حاجة وانت مش عارفها، مش عيب انك متعرفش
- اوعى تسمح لزميل او زميلة ايصالك للمنزل وبعده ترفض عشان ميصحش، ايه الافلام دى؟؟
- اوعى تقول انك هتقدر تقوم بعمل حاجة معينة عشان ترضى حد وانت مش هتقدر، انت مش سوبرمان
- اوعى تقارن او تجيب سيرة وظيفتك القديمة وادائك فيها فى شغلك الجديد انت مكنتش رئيس مجلس ادارة قبل كدة
- اوعى تنتقد وظيفتك اللى انت فيها بينك وبين نفسك او قدام حد، امال انت قاعد فيها ليه؟
- اوعى تتكسف انك تساهم فى عمل كباية شاى او قهوة لزمايلك وانت بتعمل لنفسك ده مش تقليل من شأنك خالص
واخيرا كلمة بسيطة عشان تقدر تتاقلم وتعيش بسلام فى دنيتك اللى انت فيها وهي كبر الـG وروق الـD.
لا يفوتك
