ظهر مؤخراً مصطلح الفريند زون و اخد مينستريم او اصبح موضة و كأنه مصطلح زي خطوبة ، جواز ، مصاحبة الخ... نعرف الأول معني المصطلح و مفهومه ، و نفنطه براحتنا بعدها .. زون يعني منطقة او مكان او نطاق . و فريند يعني صديق طبعاً. 

كتر المصطلح ده و انتشر مع موضات كتير و هو منطلق الصديق الولد للبنت و العكس بس مش ارتباط و حب . طب ليه مفيش بقي مصطلح فريند زون بالنسبة للبنت و البنت او الولد و الولد !؟ لقيت كدة فيه شوية نوايا خفية شجعتني افكر و اكتب المقال ده .

بالمصطلح الأم : الفريند زون ، ممكن افسره بأكتر من زون تحت نفس المسمي ،بس هما مش بيكتبوه عشان البرستيج و كدة :) 

انا هتكلم عن كل المسميات بصيغة البنت للولد وطبعاً العكس صحيح و موجود .. 

* ييجي منه زون : و ده نوع من الصداقة و اللي هو البنت مستخسره الولد و مش هينفع ترتبط ببه لان لسة قلبها مدقش بما فيه الكفاية انها ترتبط ببه و في نفس الوقت هي حاسه باعجابه بيها و ممكن ييجي منه بعدين .. طيب اللحظة دي بيكون الولد حاسس بحاجة ناحية البنت بس لسة محصلش فتح باب التواصل من ناحيتها فبيوافق عالزون دي عشان يكون جنبها يمكن يتحرك من الزون لزون اعلي بعد فترة و يصارحها .

* كيس اللب زون : و ده بقي بيكون الولد المستمع الجيد و اللي بتكلمه دايما و هي سايقة او راجعة من مشوار لحد ما تروح البيت ، او عندها مشاكل مع صاحبها و بتحكيله و تستغل رأيه كشاب و كدة و يبقي فاهم دماغ صاحبها . هو بقي في الزون دي بيكون حاسس انه الولد العاقل بقي اللي مش هتعرف تعيش من غيره و متعوده عليه و بتاخد برأيه و ينفش ريشه . 

* يا صديقي زون : وده بيكون الطرف الاول حاطط فيه الطرف التاني و بيقول عليه في المجتمعات يا صديقي و يباركله عالفيس بووك علي شغل او نجاح في حياته . و ده علي سبيل المنظرة و البرستيج بالطرف التاني اللي شغال في نفس المجال او مجال اوسع . بمعني اصح بيتلزق فيه . الطرف التاني بقي مبيعرفش أساسا انه في الزون دي ولا موجود فيها و ممكن ميكونش مركز اساسا . 

* الفولور زون : وده بيكون علي مواقع التواصل الاجتماعي و بيكون فيه لطافة و تواصل و كدة و يطلق عليه ساعات انتيم و ساعات صديق او في الفريند زون ، و الطرف الأول ساعتها بيكون مجامل و صديق صدوق عالنت عشان يحافظ عالمتابعة . الطرف التاني بيكون سعيد بالموضوع ده علي اساس ان حد مشهور عالنت صديقه بس نصيحه : فولور مش معناها في النت تابع المفروض معناها متابع . 

* أختنا زون : و الزون دي بقي بتفكرني بفيلم اكس لارج لأحمد حلمي ، اللي هو الصديق اللي بتحكيله كل حاجة بأريحية كانه اختك و الطرفين بيكونوا عارفين انهم لا يمكن يكونوا لبعض ، المشكلة ان الزون ده بيكون صعب شوية و خصوصاً لو بنت اللي موجودة فيه طبيعي ممكن تحس بغيرة . 

* ال $&$"**£€ زون : ودي الرقابة هتمنعها :) 

* نفس الشبكة زون : وده بيكون صديق من نفس نوع الشبكة و طبيعي لو علي نظام الدقايق المجانية لنفس الشبكة بيكون في زون الرغي . 

* اوبر زون : و دي زون بقي مش محتاجة توضيح موصلاتي و بيفرح بكدة في صحبتها و مشاويرها في طريقه . 

* الباك بون زون : السند بقي و كدة و ده بيفكرني بشكل الولد اللي بعضلات و اللجوء ليه وقت المِحن بس هو طبعاً بيكون مستني وقت المُحن . 

* انا ايه اللي جابني هنا زون : دي زون سريعة بعد فترة صغيرة بيكتشف طرف او الطرفين عدم وجود أي لازمة في العلاقة و بيختفي . 

كل الزونات دي موجودة و غيرها بقي من مسميات : بيستي ، كومفرت زون ، علي ما تفرج زون ، soul mate , و فيه اخويا اللي مش امي و ابويا كمان و حاجة اسمها BAE و my fav قال يعني لو اتقالت فيفوريت هتفرق !! ، دول تحت مسمي واحد و قال ايه واخدينه موضة ( الفريند زون) .. 

بإيدك تختار الزون اللي هتكون فيها و اختيارك ليها هيكون قبول بوضعك فيها و عليك انك تتقبل كل تباعيتها . لو هتقبل تفضل فيها علي طول ولا هتتحرر منها و تروح زون تلاقي نفسك فيها !؟؟ 

إوعي تسمح لنفسك تكون تحفة حتي لو غالية عالرف و ييجي عليها التراب و كل فترة صاحبة التحفة تيجي تبص عليها و تسيبها علي رف الفريند زون تاني .. 

لا تكن ولا تكوني شماعة حتي لو متعلق عليها فستان غالي جداً او بدلة سينيه.