اتقبض عليه بالغلط حسب كلامه.. حواره مع جابر القرموطي بيوضح مدى الجهل والغباء والتخلف اللي بنشوفه من الإعلاميين، جابر زيه زي أي حد ماشي في الشارع، مش عارف رسام الكاريكاتير بنشتغل إيه أو بيتقيم بأي شكل، إحنا عايشين على هامش الإعلام بسبب الجهل والتخلف.

إسلام جاويش مش رسام كاريكاتير أصلا يا سادة، ده راجل بيعبر عن أفكاره بأسلوب بسيط أقرب إلى رسوم الأطفال. مشكلة إسلام كشفت عن حجم الجهل اللي بنواجهه في مصر كرسامين كاريكاتير.

رسام الكاريكارتير عبارة عن 7 رسامين في بعض (رسام بورتيريه ورسام خلفيات ورسام حركات، رسام اسكتشات قوي. ملون جامد)، وطبعا عنده ثقافة سياسية.

الناس بتقول إن إسلام جاويش فيه حد بيألف له.. الرسام لو مش مثقف وبيشغل دماغه يبقي إيه؟ وسيله تعبير مش أكتر.. رسام الكاريكاتير دوره انحدر في الإعلام المصري والعربي، بقينا بنشتغل بالواسطة وسط جهل وتخلف.. إحنا بنألف لنفسنا على فكرة ومش المفروض حد يألف لنا، حكاية أحمد رجب ومصطفى حسين دي عملت لنا مشكلة كبيرة.

كله عند العرب صابون، لو مش اسمك مصطفى حسين تبقى أي حد والسلام، اختلط الصالح مع الطالح، الغبي مع المثقف، الرسام الجامد مع المتخلف. الرسام وليد طاهر لما طلع في قناة أون تي في مع الإعلامي الشهير، قاله في الفاصل إحنا هنتكلم عن صلاح جاهين وبس أنا معرفش غيره، طبعا وليد ذهل لأنه اتفاجأ، إذا كان ده أكتر واحد مثقف أمال الباقي إيه. 

الله يرحمنا كلنا في مجتمع مش فاهم شغلتنا، إحنا متقدرين برا مصر والوطن العربي أكتر بكتير. رؤساء التحرير حافظين كام كلمة، يقولك إيه "الكاريكاتير يعبر بالرسم أكثر من كلام المقالات" وإحنا نسقف ونقول الله يا أستاذ.. لكن في الحقيقة هم مش فاهمين.. اللي فاهم منهم يعني إيه رسام كاريكاتير مات خلاص، كان عبد الله كمال الله يرحمه. 

إسلام جاويش بيقول روحت قدمت في جرايد واترفضت، وأنا بقولك وأنا كمان يا إسلام حصل معايا كده وحصل مع عتاولة الرسم، مع أنك أصلا مش رسام كاريكاتير معلش يعني، واللي حصلك ده هيشهرك قوي ودي كمالة الغباء بس مش مشكلة يابني، بص الحل أن يبقى اسمك مصطفى حسين، أو أقولك أنك تقلد مصطفى حسين زي عمرو فهمي مثلا. أو بص تعمل لنفسك فضيحة عشان تلفت النظر ليك. غير كده مستواك أو موهبتك مش هتنفعك.

محدش هينفعك خالص غير الواسطه والكوسة وطبعا لو بنت حلوة بشعر أصفر قررت ترسم كاريكاتير، هتبقي فنانة العصر والزمان . 
مصر والوطن العربي تحتضن الغباء كرعاية رسمية.

أنا عضو الاتحاد الأوروبي لرسامي الكاريكاتير وفيه مصريين عبقارة رسموا كاريكاتير ومحدش قدّر ولا فهم. اتعاملت مع رسامين كاريكاتير وفنانين من كل أنحاء العالم. قالوا إن مستواكم في مصر هايل، قولت لهم إحنا 30 رسام في بلد التسعين مليون وعندنا ست آلاف جورنال ومش لاقيين شغل.

مفيش ميزانية لتعيين رسامين في الجرايد لأن رؤساء التحرير مرتباتهم كسرت الـ 40 ألف جنيه، وصعب توفير 3 آلاف جنيه لرسام يعبر عن القضايا اليومية، لكن السهل أنك تعين بنات حلوة.

إسلام جاويش مش رسام ده شخص بيعبر بشكل طفولي
إسلام اتشهر لأننا في مصر .
إسلام هيشتغل في جرايد لأنه اتقبض عليه. 
لنا الله في وطن غاب عنه الإبداع قصدا .

تابع أخبار قضية إسلام جاويش من هنا