التوقيت الخميس، 28 مارس 2024
التوقيت 04:33 م , بتوقيت القاهرة

ليه تتفرج على المصارعة مع انها تمثيل؟

ليه تتفرج على المصارعة مع انها تمثيل؟
ليه تتفرج على المصارعة مع انها تمثيل؟

ليه تتفرج على المصارعة مع انها تمثيل؟


 


لما بدأت أتفرج على مصارعة من حوالي 10 سنين أو أكتر.. كنت بتفرج وأنا فاكر أن اللي بيحصل قدامي في التلفزيون ده بجد.. وأن مثلًا لما تريبل إتش يطلع ويضرب فينس مكمان - صاحب شركة المصارعة - بيكون الكلام ده بجد.. ومن غير ما يتفقوا على الموضوع..


طبعا هنا المصارع وطى من غير ما حد يلمسه أساسًا


لما كبرت وتعمقت في دراسة الموضوع أكتر وفهمت أن المصارعة كلها تمثيل في تمثيل.. زيها زي أي فيلم بتتفرج عليه في اتنين بيضربوا بعض.. واحد بيقوم بدور شرير وواحد بيقوم بدور طيب.


الراجل خبط راسه في الحديد لوحده كدا


في المصارعة المصارعين الأشرار اللي بيكونوا مكروهين من المصارعين التانيين ومن الجمهور بيكون اسمهم Heel.. والمصارعين المحبوبين بيكون اسمهم Face.


 


بعد ما عرفنا أن المصارعة كلها تمثيل.. والدم اللي فيها مش حقيقي.. والمصارعين بيكونوا متفقين على كل الحركات اللي بيعملوها.. وعارفين كمان مين فيهم هيكسب ومين هيخسر وهيخسر إزاي.. خلوني أقولكم ليه تتفرجوا على المصارعة مع أنها تمثيل:


 


1- الكابتن ممدوح فرج:


 


ممدوح فرج


جيل الشباب اللي في سن العشرينات أو بداية التلاتينات.. أكيد في يوم من الأيام اتفرج على برنامج للكابتن ممدوح فرج.. واستمتع بالطريقة اللي كان بيبسط بيها المصارعة وحبّ يتابع برامجه واتعلم حب المصارعة على ايديه.. فلو أنت من الجيل ده بنسبة 90% لو جه قدامك ماتش مصارعة حتى لو بتعليق أجنبي هتتفرج عليه حتى وأنت عارف أن الكلام ده مش حقيقي وتمثيل.


2- إم بي سي أكشن:


إم بي سي أكشن وزمن المصارعة الجميل


تريبل إتش لما كان بشعر على إم بي سي أكشن


جون سينا بالسلسلة والكاب على ام بي سي أكشن


ام بي سي أكشن وقت سي إم بانك


قناة إم بي سي أكشن من القنوات اللي بتعرض برامج للمصارعة بشكل أسبوعي.. بتكون متأخرة في حدود 10 أيام بس أهو أحسن من مفيش.. ودي مناسبة بشكل كبير للجيل الحديث اللي بيحب الأفلام الأجنبي وبيحب يشوف المسلسلات والعروض مترجمة.. وأنت بتقلب في القنوات لو شوفت قدامك ماتش مصارعة لواحد زي جون سينا على إم بي سي أكشن هتسيبه؟ غالبًا لأ.


3- بتاخد وقت:


ماتش أندرتيكر وشون مايكلز في ريسلمنيا 25


جزء من الماتش بين أندرتيكر وشون مايكلز في ريسلمنيا 25


الاعلان عن ماتش العودة بين تيكر ومايكلز


بوستر ماتش العودة بين تيكر ومايكلز


أندرتيكر بيثبت شون مايكلز في الماتش الثاني


لقطة احترام بين الاتنين بعد الماتش


الناس اللي بتألف سيناريوهات المصارعة دي مش بتألف السيناريو في يوم وليلة.. بالعكس ده ممكن عشان سيناريو يطلع بالشكل اللي هما عاوزينه ياخد وقت بالشهور والسنين كمان.. يعني مثلًا في ماتش أندرتيكر وشون مايكلز في ريسلمانيا 25 سنة 2009.. شون مايكلز خسر الماتش وده كان شيء متوقع ومتفقين عليه طبعًا.. وفي اللحظة اللي هو خسر فيها اتفقوا يعملوا rematch عشان يلعبوا ماتش تاني في السنة اللي بعدها.. واتحط سكريبت مخصوص إزاي يوصلوا الاتنين أنهم يقابلوا بعض مرة تانية.



4- ليها مخرج زي الأفلام:


فينس مكمان وتريبل إتش وستيفاني.. العقل المدبر وراء المصارعة]


تريبل إتش لما كان هيتخانق مع مكمان في الكواليس.. وكله تمثيل طبعًا


مايكل كول.. وقت خدعة ال GM


أي حاجة بتتذاع على التلفزيون أو في السينما بيكون ليها مخرج.. والمصارعة مش مختلفة عن كدا.. في فريق في شركة الـ WWE اسمه Creative Team ده بيكون مسؤول عن التخطيط والتنفيذ والإخراج لأي حدث في المصارعة سواء عروض الـ Raw والـ Smackdown الأسبوعية، أو حتى البطولات الشهرية زي الريسلمانيا والسمر سلام وغيرها.. وزي ما بتتفرج على أفلام من إخراج كريستوفر نولان ومارتن سكورسيزي بردو في ناس بتحب تتفرج على أفلام من إخراج الـ Creative Room في الـ WWE.


5- التصوير:


المصورين بيتعبوا عشان ينقلوا الصورة واضحة


فريق التصوير وقت الماتشات


أوقات المصورين بيتعرضوا للضرب وبيدخلوا الحلبة


مصور عشان ينقل الصورة مضبوطة


أي فيلم دلوقتي بيتصور بتقنيات حديثة وكاميرات 3D وكاميرات IMAX.. جايز دي تكون الحاجة الوحيدة اللي السينما متفوقة فيها على الـ WWE اللي هي تقنية التصوير.. بس الـ WWE ليها ميزة تانية وهي أن الماتشات بتاعتها بتتذاع وبتتلعب مباشرة قدام الجمهور.. زي العروض المسرحية.. مش بتتسجل ويتعملها مونتاج وبعد كدا تتذاع زي أي فيلم أو مسلسل تاني.


6- التكلفة:


في أفلام تكلفة إنتاجها بتتعدى الـ 100 مليون دولار.. ده طبعًا بسبب الجرافيك والمؤثرات البصرية وعقود الممثلين وغيره.. بس بردو المصارعة بيتصرف عليها كتير.. زي مثلًا تأجير الاستادات ودفع عقود المصارعين والتقنيين والمصورين والمعلقين وغيره.. وفي تقرير اتنشر في الفترة الأخيرة بيّن أن تكلفة إنتاج الحلقة الواحدة من عروض الـ Raw أو الـ Smackdown - اللي هي حلقات أسبوعية متكررة - بتكون تقريبًا 700 ألف دولار.. يعني بمعدل 33.6 مليون دولار سنويًا.


دولارات فينس مكمان


فينس مكمان وتريبل إتش وجون سينا مع المليون دولار


ورقة بمليون دولار عليها صورة فينس مكمان