حظك اليوم وتوقعات الأبراج اليوم معانا كل يوم على دوت مصر كل يوم..وخد بالك حظك اليوم هزار من الحياة.. مش أكتر.. ومحدش يملك معلومات كافية ولا بصيرة كافية ولا علم كافي عشان يقولك هتبقى النهاردة كويس أو لأ.. دة دايما متوقف على اختيارك وعلى مزاجك ومودك وظروفك لوحدك.

*******************

  : كلام جد

المفروض الخروف يلبس بدلة الإعدام الحمرا من دلوقتي.

عشان تعرف حظك بشكل كامل .. صفي نيتك ودوس على اسم برجك بإيدك اليمين.

إعرف حظك اليوم برج الحمل الأحد 27 أغسطس 2017 مع عبدالله أحمد..

الحمل: من 21 مارس إلى 20 ابريل

برج الحمل عاطفياً:

متتفتنش على افكارك لحد مهما كان..لا عدو ولا حبيب ولا صديق..وروق كدة وإركن النكد برة عقلك

برج الحمل عملياً:

قشطة..ماتعمل مصايب براحتك ايه المشكلة..محدش له عندك حاجة اصلا

برج الحمل صحياً:

متفكرش ف الضاني خالص..إنسى

إعرف توافق برج الحمل مع باقي الأبراج النهاردة

متوافق مع الابراج الهوائية

*****************************************************************************

إعرف حظك اليوم برج الثور الأحد 27 أغسطس 2017 مع عبدالله أحمد..

الثور : من 21 ابريل إلى 20 مايو

برج الثور عاطفياً:

الكنز النفسي بتاعك فيها الاخضر قليل لصالح الازرق ودة معناه انك بتميل للحزن على حساب السعادة..بتعمل كدة ليه

برج الثور عملياً:

إجري صيف والعب ف الرملة وانبسط وبلاش كسل

برج الثور صحياً:

البحر والسباحة مفيدين ليك صحيا جدا..اولا هتخس ثانيا هتاكل كويس وبنفس وثالثا هتبطل تشتكي حبة من ان الناس مبتحبكش..كمان الملح اللي ف مية البحر مفيد للميكروبات اللي عايشة على جسمك..يعني الكل هينبسط..انتا وميكروباتك

إعرف توافق برج الثور مع باقي الأبراج النهاردة:

متوافق مع الابراج البحرية واللون التركواز

*****************************************************************************

إعرف حظك اليوم برج الجوزاء الأحد 27 أغسطس 2017 مع عبدالله أحمد..

الجوزاء: من 21 مايو إلى 20 يونيو

برج الجوزاء عاطفياً:

عواصف نفسية وأمواج عاطفية عاصفة اليوم بس كل حاجة هتستقر بعد الغروب

برج الجوزاء عملياً:

الجو عادي وعلى وضعه ف نفسيتك مفيش حاجة تشغل بالك يعني..انتا محتاج بس تلعب جيمز حبة وتاكل كويس

برج الجوزاء صحياً:

كل ما تحب كل ماصحتك هتتحسن..عشان بتعرف تحب وعشان صحتك بتيجي على الحب وعشان الحب بيحبك تحب..اظن ملكش حجة كدة ولازم تاخد بالك من صحتك ومن الحب

تعرف على توافق برج الجوزاء مع باقي الأبراج النهاردة:

متوافق مع الابراج اللي تدلعك وتعرف قيمتك وقيمة دماغك

*****************************************************************************

إعرف حظك اليوم برج السرطان الأحد 27 أغسطس 2017 مع عبدالله أحمد..

السرطان: من 21 يونيو إلى 20 يوليو

برج السرطان عاطفياً:

تحت اي بند متتخلاش عن برستيچك قدام الناس..وف نفس الوقت متتخلاش عن اللي بتحبه عشان برستيچك..عموما خلي برستيچك ينفعك

برج السرطان عملياً:

طبيعي تحس بالتعب لأنك مبتفطرش كويس الصبح بحجة انك ملكش نفس وطبيعي تحس بالصداع عشان بتفكر كتير ف افكار سودة ملهاش اي لازمة بالساعات

برج السرطان صحياً:

ركز مع اللون البرتقاني حبة ف الاكل ومع الملوخية والخضار بشكل عام

تعرف على توافق برج السرطان مع باقي الأبراج النهاردة:

متوافق مع الابراج الهوائية والنارية

*****************************************************************************

إعرف حظك اليوم برج الأسد الأحد 27 أغسطس 2017 مع عبدالله أحمد..

الأسد: من 21 يوليو إلى 20 اغسطس

برج الأسد عاطفياً:

سباحة ف نهر الذات مش الملذات

برج الأسد عملياً:

استعد للعيد بلبس جديد نفسيا مش هدوم تنزل تضيع فلوسك عشان تشتريها..جهز نفسك للانبساط مش للشتيمة ف العيد واللي بيعيدوا..لو تعاليت على الانبساط هو كمان هيتعالى عليك

برج الأسد صحياً:

محتاج تلعب رياضة خفيفة..بينج بونج مثلا ولا إكس أو

تعرف على توافق برج الأسد مع باقي الأبراج النهاردة:

متوافق مع الابراج النارية بس

*****************************************************************************

إعرف حظك اليوم برج العذراء الأحد 27 أغسطس 2017 مع عبدالله أحمد..

العذراء: من 21 اغسطس إلى 20 سبتمبر

برج العذراء عاطفياً:

مرحلة شقلباظات نفسية كتير النهاردة..استعد بأفلام قديمة حلوة ومسرحيات وأكل للنقنقة كتير وعصاير عشان تعرف تواجه الاحساسات المتقلبة دي

برج العذراء عملياً:

جرب تطنش اللي يطنشك وانتا هتبقى زي الفل..كمان اليوم مش مناسب للنشاط الرياضي..الكسل أحلى

برج العذراء صحياً:

الاكل الدسم النهاردة مينفعش لو نفسيتك ف النازل..انما لو ف الطالع ف قشطة جدا..تقدر تعك براحتك وتشتكي بعدين..واعتبر الكسل رياضة..عادي على فكرة

تعرف على توافق برج العذراء مع باقي الأبراج النهاردة:

متوافق مع الابراج الكسلانة

*****************************************************************************

إعرف حظك اليوم برج الميزان الأحد 27 أغسطس 2017 مع عبدالله أحمد..

الميزان : من 21 سبتمبر إلى 20 اكتوبر

برج الميزان عاطفياً:

مواجهة حاسمة بينك وبين فكرة مش كويسة معششة ف دماغك بقالها فترة وهتهزمه وهتبقى عال العال متقلقش

برج الميزان عملياً:

هتسترجع نشاطك وهتخرج من الحفرة النفسية اللي كنت واقع فيها لو بطلت تلوم ف نفسك وف الناس..اللي حصل حصل خلاص..وراك مليون ضحكة لسة هتضحكها

برج الميزان صحياً:

إتحرك وبلاش كسل ومهم تقتنع انك تستاهل الافضل ف الحياة ف كل حاجة

تعرف على توافق برج الميزان مع باقي الأبراج النهاردة:

متوافق مع الابراج الغازية والهوائية

*****************************************************************************

إعرف حظك اليوم برج العقرب الأحد 27 أغسطس 2017 مع عبدالله أحمد..

العقرب: من 21 اكتوبر إلى 20 نوفمبر

برج العقرب عاطفياً:

مهما اتمسكنت محدش هيصدقك..مش عشان انتا وحش لاسمح الله ولا حاجة بس عشان القوي لما بيضعف محدش بيصدقه..الناس اتعودت تشوفك قوي..ف مش هتصدق انك تعبان فعلا

برج العقرب عملياً:

ريح نفسك..مفيش حاجة هتمشي ف الحياة على مزاجك..ديل ويز إيت

برج العقرب صحياً:

إجمد وهتخرج من المود الفوحلوقي دة قريب..بطل بس تحاول تمشي الناس على مزاجك ومزاج رغباتك وإنبط حبة وانتا تبقى كويس..كمان لازم تهتم بالدايت..لسة في حاجات كتير عندك لازم تختفي عشان تعرف تطير قريب بوزن خفيف

تعرف على توافق برج العقرب مع باقي الأبراج النهاردة:

متوافق مع الابراج البرمائية

*****************************************************************************

إعرف حظك اليوم برج القوس الأحد 27 أغسطس 2017 مع عبدالله أحمد..

القوس: من 21 نوفمبر إلى 20 ديسمبر

برج القوس عاطفياً:

سيبك من المسلسلات وإمسكلك كتاب ينفعك بدل مانتا قاعد زي الانبوبة كدة عمال تاكل وتتفرج وبس

برج القوس عملياً:

القراية مهمة طبعا لمخك ولعواطفك..مهم اللي بتحبه ياخد عنك فكرة انك مثقف اليومين دول

برج القوس صحياً:

متطلعش زهقك ف حد..عيب

تعرف على توافق برج القوس مع باقي الأبراج النهاردة:

متوافق مع الابراج المائية والنارية

*****************************************************************************

إعرف حظك اليوم برج الجدي الأحد 27 أغسطس 2017 مع عبدالله أحمد..

الجدى: من 21 ديسمبر إلى 20 يناير

برج الجدي عاطفياً:

إبتهج اليوم فكثير من الخير بإنتظارك تحت لما تنزل..انما لو فضلت قاعد مبتتحركش مش هتشوف غير الوحدة والملل

برج الجدي عملياً:

اليوم شكله آلاجة وأعصاب ف التلاجة بالصلاة ع النبي..استغل الفرصة وانزل اقعد ع القهوة مع اصحابك ولا اخرجوا اعملوا اي مصيبة من مصايبكوا سوا

برج الجدي صحياً:

متنمّش ف التليفون مع حد على حد..عيب

تعرف على توافق برج الجدي مع باقي الأبراج النهاردة:

متوافق مع الابراج اللي بتحب الرغي ف التليفون

*****************************************************************************

إعرف حظك اليوم برج الدلو الأحد 27 أغسطس 2017 مع عبدالله أحمد..

الدلو: من 21 يناير إلى 20 فبراير

برج الدلو عاطفياً:

مواجهة شجاعة مع خصم غير شجاع هتكلل بإستسلامه المزري

برج الدلو عملياً:

النصر حليفك النهاردة مع آكاليل وورد وكفتة بالصلصة وحلويات شرقية وغربية

برج الدلو صحياً:

فلتحتفل بإنتصارك ليلا وليعلم القاصي والداني انك مبتحبش الآذية بس موهوب ف المرازية

تعرف على توافق برج الدلو مع باقي الأبراج النهاردة:

متوافق مع الابراج كلها توافق شكلي فقط مش أكتر انما ف الحقيقة انك متوافق مع نفسك وبس

*****************************************************************************

إعرف حظك اليوم برج الحوت الأحد 27 أغسطس 2017 مع عبدالله أحمد..

الحوت: من 21 فبراير إلى 20 مارس

برج الحوت عاطفياً:

بلا عاطفيا بلا بتاع بقى..انتا محتاج تشرب خشاف بشكل عاجل..بل شوية بلح بقى من الصبحية ومتنساش

برج الحوت عملياً:

كل ماتشكر ف نفسك كل ما الناس هتبصلك على انك عندك مشاكل ف نفسيتك..حاول متشكرش ف نفسك وتستنى الناس تشكر فيك حبة..ثم انتا ليه اساسا محتاج حد يشكر فيك؟

برج الحوت صحياً:

حلة خشاف ممكن تحل كل مشاكلك من جميع النواحي..اعتبر نفسك ف رمضان ثم انه مفيش قانون بيمنع شرب الخشاف بعد رمضان او قبله..اشرب براحتك

تعرف على توافق برج الحوت مع باقي الأبراج النهاردة:

متوافق مع الخشاف

*****************************************************************************

حظك اليوم ممكن يكون موجود وممكن ميكونش موجود..القرار قرارك لوحدك ف حياتك وبس..بس لو اخترنا نشوفه وندور عليه كويس وبإهتمام هنشوف تأثيره في حياتنا طول الوقت ومنقدرش ننكره.. بنشوف ناس مبسوطة وناس لأ.. بنقول على المبسوط حظه حلو وبنتمنى نبقى حظنا من حظه ونبقى مبسوطين زيه وبنتمنى نملك الانبساط دا ونتحكم فيه .. ونستدعيه كمان وقت اللزوم زي جني المصباح..زي الأحلام.. وزي الأماني والخيالات الحلوة.. وقت الضيقة والخنقة والمشاكل والاحتياج اليومي للأمل ف بكرة أفضل وأروق وأجمل وألوانه أحلى..بنتمنى يكون في منطق واسباب للسعادة ممكن تتحط وتتكثف ف كلام بسيط وقريب..

ومن هنا بقى في توقعات حظك اليوم بالاعتماد على حركة الكواكب ومواقع النجوم وعلم الفلك.. محدش ينكر إن كوكب الأرض كله واقع تحت تأثير حركة الكواكب المحيطة وخصوصاً القمر.

ولولا تأثيره مكانش بقى في حركة مد وجزر ومكانش الإنسان عرف يسافر بمراكب في البحر.. ولا كان الإنسان اتحرك من بلد لبلد برضه ف البر لو مكانش في مواقع للنجوم مميزة ف السما يقدر يعتمد عليها..

إفتكر الكلام دا وانت بتقرا حظك اليوم النهاردة وبكرة وكل يوم ياريت .. 

وتأكد إنك سواء عجبك الكلام المكتوب هنا في برجك أو لأ فانت تقدر تصنع حظك اليوم بإيديك سواء اليوم أو كل يوم..

الكلام المكتوب هنا دايما الغرض منه الفرفشة والدلع والمزاج الرايق بعلامات حلوة من الحياة محطوطة ف كلام وحبة مزيكا على مزاجك..

 تابعنا يومياً عشان تعرف حظك اليوم كل يوم ومتنساش.. كل دة مجرد هزار برئ ياريت متاخدوش على صدرك..

تحياتنا الدائمة.