بروك ليسنر.. "الوحش" ملك المصارعة والفنون القتالية المختلطة

الكلام هنا هيبقى كتير أوي.. نقول إيه ولا ايه.. يخرب عقلك ياراجل.. تخيل لما حد يخش مجال المصارعة الحرة ويقهر أبطاله وياخد بطولة العالم أكتر من مرة.. وبعدين يسيبه ويروح على مجال الفنون القتالية المختلطة ويبقى بطل عالم فيه ويحقق انتصارات محصلتش قبل كده.. ده لو دخل مجال كرة القدم على كده ممكن يبقى هداف زي ميسي كمان.. ده اللي عمله الوحش بروك ليسنر في "الدبليو دبليو إي" و"اليو إف سي"..

الوحش ظهر في الدبليو دبليو إي سنة 2001 وهو عنده 24 سنة.. واكتسح الاتحاد مثل العاصفة زي مابيقولوا.. وكسب الروك وبيج شو وكيرت إينجل والبوكر تي.. وطبعا محدش يقدر ينسى مباراته الشهيرة مع شو لما كسروا الحلبة لأول مرة في تاريخ المصارعة بسوبلكس من على الحبل الأخير.. وكان ليسنر وقتها أصغر بطل عالم في المصارعة وكان معاه الحزام وهو عمره 25 سنة..

وأوووبا بقى.. الكبير وقف قدامه.. ومحدش وقف لبروك ليسنر غير واحد بس.. الجولد بيرج اللي مبيهزرش.. حصلت بينهم عداوات كانت الأشهر في تاريخ المصارعة.. وفضلت مستمرة طوال سنة 2004 وبعدين اتجددت تاني سنة 2016 و2017 وهنكلم في العداوة الأخيرة دي بعدين.. آخر ماتش لليسنر وقتها كان مع جولد بيرج في 2004 في عرض الرسلمانيا.. وبعد عجن وطحن انتصر جولد في النهاية.. واختفى الاتنين خالص عن الدبليو دبليو إي لسنين..

بروك ليسنر قرر بعد كده إنه يروح اتحاد "اليو إف سي" في 2006.. وده أشهر اتحاد في الفنون القتالية المختلطة "الميكسيد مارشل آرتس".. وطبعا اللعب هناك بيختلف بكتير عن المصارعة.. أعنف وأشرس.. هناك بقى ليسنر في أول مباراة رسمية له كسب بطل العالم وقتها.. وحقق بكده مفاجأة كبيرة محدش عملها قبل كده.. وتوالت انتصاراته الفترة دي على كل عظماء القتال المختلط.. واحتفظ بالحزام فترة طويلة جدا.. من 2006 لـ 2010.. ومتهزمش خالص الفترة دي "آن ديفييتد".. وبسبب الانجازات اللي عملها هناك قرر ناس كتير يخشوا اليو إف سي زيه.. زي باتيستا وساموا جو وسي إم بانك.. لكن محققوش نفس نجاحه أو انتصاراته..

جون سينا خسر من الروك في الرسلمنيا في 2012، وطلع بعدها في عرض الرو عشان يدعوه للخروج.. وهوبا بروك ليسنر دخل والجمهور كان على أخره.. بعد غياب 8 سنين الوحش رجع.. وطلع يسلم على سينا وبعدين خده على خوانا وفنشه بـ"الإف فايف".. وهنا ابتدت العداوة..

ليسنر كان شايف وقتها إن سينا خد أكتر من حجمه وشهرة كبيرة ميستحقهاش.. وطلب إنه يصارع سينا.. اللي خرج بعدها بأسبوع وضرب بروك بالقلم.. ايوه رزعه قلم مخبرين خلى ليسنر يشتبك معاه وتحصل بينهم خناقة شرسة الاتحاد خلت الاتحاد كله يطلع يحوش ما بينهم.. وجه وقت نزالهم في عرض إكستريم رولز وكانت مباراة قوية جدا وسينا اتبهدل فيها واتعور.. لكنه قدر يفوز فيها على ليسنر بعد ضربة من جنزير حديد وفينش على السلم الحديد..

بروك ليسنر بعد كده دخل في عداوات كتير.. أشهرها كان مع تريبل إتش.. ولعبوا ضد بعض مرتين.. الأولى فاز فيها ليسنر وخلا إتش يسلم بـ"الكامرا لوك" اللي اتعلمها من القتال المختلط.. وكسر فيها دراعه.. والتانية فاز فيها إتش بعد ضربة تحت الحزام وبيدجري قوية..

نيجي بقى لأشهر عداوات ليسنر.. وهي مع الجولد بيرج.. اللي زي ما قولنا ابتدت في 2004 .. لكن منتهتش.. العداوة التانية ابتدت بينهم في 2016 لما نزلت لعبة الدبليو دبليو إي الجديدة WWEK15 .. وعليها صورة الجولد بيرج.. وفيديو جرافيك لماتش بين بيرج وليسنر.. وفي السبورت سينتر كان فيه حوار مع بيرج قال فيه إن ممكن لو حصل وبقى فيه ماتش بينه وبين ليسنر ف ممكن إنه يكسب وبسهولة.. وهنا ابتدى بول هايمان محامي الوحش يتريق على بيرج ويقول إن لو حصل بينهم ماتش فعلا فليسنر هيكسب في 5 ثواني وأكد أن الوحش موافق ومستني الرد.. وهنا رد جولد بيرج بالموافقة.. وبالفعل اتعمل ماتش الأحلام اللي كان عشاق المصارعة كلهم في انتظاره من زمن طويل..

دقيقتين و22 ثانية بالظبط.. ده كان الوقت اللي استغرقته المباراة اللي فاز فيها الجولد بيرج فوز ساحق على الوحش.. في مفاجأة صدمت الكل.. وخلت بول هايمن يعيط من القهرة.. وبعدها كمان اتقابلوا تاني في الرويال رامبل وبيرج خرج ليسنر من فوق الحبال لأنه كان مستقصده.. وجه ميعاد النزال التاني ما بينهم في خلال 3 شهر والتالت مابينهم في 14 سنة.. وأثبت فيه بروك ليسنر إنه مش خصم سهل أبدا وفاز على جولد بيرج وخد منه حزام اليونيفرسال بعد ما أداله 10 سوبلكسات عدالة خلته يدوخ في "السوبلكس سيتي".. وبعدين اتعمل فيه "الإف فايف" اللي هو الفينش بتاع ليسنر.. ومحدش عارف لحد دلوقتي العداوة هتستمر لحد امتى لكن شكلها مش هتخلص قريب..

الوحش لحد دلوقتي مستمر في الدبليو دبليو إي ومستمر كمان في اليو إف سي..

وكده هو الرياضي الوحيد في العالم اللي بيلعب في اتحادين في نفس الوقت.. وده مش كوسة ولا واسطة.. لكن لأنه أحسن وأمهر وأشهر اسم في العالم في مجال الرياضيات القتالية.

لو عجبك الموضوع دة وحبيت تشوف زيه ويمكن أحسن خش هنا

قط بلدي