التوقيت الجمعة، 29 مارس 2024
التوقيت 01:38 م , بتوقيت القاهرة

حظك اليوم السبت 19 أغسطس 2017 مع عبدالله أحمد..السرطان..معلش

حظك اليوم السبت 19 أغسطس 2017
حظك اليوم السبت 19 أغسطس 2017

حظك اليوم وتوقعات الأبراج اليوم معانا كل يوم على دوت مصر كل يوم..وخد بالك حظك اليوم هزار من الحياة.. مش أكتر.. ومحدش يملك معلومات كافية ولا بصيرة كافية ولا علم كافي عشان يقولك هتبقى النهاردة كويس أو لأ.. دة دايما متوقف على اختيارك وعلى مزاجك ومودك وظروفك لوحدك.


*******************


  : كلام جد


 


مشكلة كلمة "بحبك" انها وعد بحياة كاملة جاية.. ولو إتسحبت بقت وعد بسواد وموت.. ودي مصيبة لأي كائن حي.. ف خياله وف مستقبله.



 


عشان تعرف حظك بشكل كامل .. صفي نيتك ودوس على اسم برجك بإيدك اليمين.


 


إعرف حظك اليوم برج الحمل السبت 19 أغسطس 2017 مع عبدالله أحمد..


الحمل: من 21 مارس إلى 20 ابريل


برج الحمل عاطفياً:


هتاخد حبة قرارات راديكالية كويسة النهاردة..قشطة عليك.


برج الحمل عملياً:


طبيعي الناس تتفاجئ بالتغيرات اللي انتا بتمر بيها اليومين دول عشان انتا بتتغير من النقيض للنقيض بالنسبالهم..ميعرفوش انك بتجهز للتغيرات دي من فترة كبيرة وانها اساسا طبيعتك مش مجرد جنان عابر ويمر وخلاص


برج الحمل صحياً:


من حقك تعمل اللي يريحك ف حياتك وبس..غير كدة متجيش على نفسك عشان حد..الموضوع دة المفروض تعتبره منتهي خلاص..انتا اهم واحد ف حياتك


إعرف توافق برج الحمل مع باقي الأبراج النهاردة


متوافق زي امبارح مع الرشاقة والجاذبية الطاغية مع حبة طيش بس بشكل كبير النهاردة وواضح


*****************************************************************************


إعرف حظك اليوم برج الثور السبت 19 أغسطس 2017 مع عبدالله أحمد..


الثور : من 21 ابريل إلى 20 مايو


برج الثور عاطفياً:


روحك مستريحة ف جسمك النهاردة ودة هيدي فرصة لمشاعرك تنطلق..حلق ف السما وانبسط..دة حقك


برج الثور عملياً:


لما تحس انك متضايق متتخانقش ومتكشرش ف وش حد..ببساطة كدة خدلك جنب وشغل مزيكا وارقص او فرفش وخلاص..مهم جدا محدش يعرف ايه بيضايقك ويستفزك بيه..والاهم انك انتا متبقاش بتفتنله بنفسك على ايه بيضايقك بعصبيتك او انفعالك السريع..خليك كوول وروق..مسير كل حاجة تبقى فل مع الوقت


برج الثور صحياً:


مسير الصيف يخلص ونكسر وراه قلة وزير كمان متقلقش..اهم حاجة دلوقتي انك تفرفش بأي شكل..وسواء هتخرج او هتقعد ف البيت ف الحالتين انتا محتاج تركز ف انك تضحك كتير وبصوت عالي..مهم تعكس للناس كلها انك النهاردة مبسوط وعامل دماغ حياة وفرفشة ومش عاوز اي نكد من اي نوع من اي حد


إعرف توافق برج الثور مع باقي الأبراج النهاردة:


متوافق مع الرغبة ف الفرفشة البريئة


*****************************************************************************


إعرف حظك اليوم برج الجوزاء السبت 19 أغسطس 2017 مع عبدالله أحمد..


الجوزاء: من 21 مايو إلى 20 يونيو


برج الجوزاء عاطفياً:


طالما بتتحب وبتحب يبقى مفيش خوف من اي حاجة لا دلوقتي ولا بعدين..كمان خد بالك ان الحب اللي بجد بيعتبر استيكة للماضي..امسح بيها اي ذكريات مش لطيفة..دة طبعا لو الذكريات دي فكرت تهوب ناحيتك وتجازف بروحها اساسا ودة مفتكرش انه هيحصل النهاردة..ذكرياتك غالبا بتخاف منك ومن قوتك وجمالك


برج الجوزاء عملياً:


إحترس..مستويات الطاقة بترجع للخلف..خد بالك..اشحن بكل ماهو جميل وفيه انبساط بالنسبالك سواء ف الهدوم او الالوان او الاماكن او الاكل او الدلع او الحب او الايس كريم


برج الجوزاء صحياً:


ايروبكس وعرق حبة ف اول اليوم هينشطوك جدا خصوصا لو مع مزيكا مهرجانات صاخبة دمها خفيف وصايعة


تعرف على توافق برج الجوزاء مع باقي الأبراج النهاردة:


متوافق مع الحياة والرغبة ف السعادة


*****************************************************************************


إعرف حظك اليوم برج السرطان السبت 19 أغسطس 2017 مع عبدالله أحمد..


السرطان: من 21 يونيو إلى 20 يوليو


برج السرطان عاطفياً:


هتحس انك حساس بزيادة النهاردة..معلش..هتحس كمان انك بتتهاجم بدون سبب بمخاوف من الماضي..وماله..كمان هتحس بمغص ولا حاجة ف بطنك..ودة سببه طبعا انك عكيت بالليل ف الاكل او انك ببساطة مبتفطرش غير على سجاير وقهوة او مبتفطرش اصلا


برج السرطان عملياً:


كلمة معلش بتضايقك عشان انتا متوقع ان من مسؤليات الاخرين انهم يقدمولك حلول سحرية سريعة لكل مشاكلك طالما انتا اتعطفت عليهم وقررت تشتكيلهم او تحكيلهم..ياسلام..طب وهما ذنبهم ايه..ماجايز كل اللي يقدروا يعملوهولك هو انهم يشعروا ناحيتك بالتعاطف ويطيبوا خاطرك بكلمتين وخلاص..راعي ان لكل واحد مشاكل خفية مبتتحكيش لو سمحت ومتحملش حد مسئوليتك..انتا كبير كفاية وتقدر تحل مشاكل بنفسك وانتا عارف كدة كويس


برج السرطان صحياً:


مهم تفطر كويس والله..مهم جدا..دي بداية اليوم..مهم تشحن طاقة وبشكل مبهج وفيه دلع واهتمام..تستاهل دة وجدا..دلع نفسك من فضلك


تعرف على توافق برج السرطان مع باقي الأبراج النهاردة:


متوافق مع الابراج اللي متقولكش كلمة معلش لما تشتكيلها من اي حاجة


*****************************************************************************


إعرف حظك اليوم برج الأسد السبت 19 أغسطس 2017 مع عبدالله أحمد..


الأسد: من 21 يوليو إلى 20 اغسطس


برج الأسد عاطفياً:


مفيش علاقة حب كاملة ولا مثالية..افتكر دة كويس..كمان انتا مليان عيوب زي ما اللي قدامك برضة مليان عيوب..ومهم تتغير زي مابتطلب من الناس تتغير عشانك..تفتكر هتقدر..او هتقبل اساسا تتغير؟..اما نشوف


برج الأسد عملياً:


يوم مثالي تقدر تكمل فيه حلمك وسعيك الحثيث نحو الشعور بالكمال ف كل حاجة..ربنا يوفقك


برج الأسد صحياً:


رقبتك هتوجعك لو نمت قصاد المروحة او ف التكييف..خد بالك من نفسك حبة وحاول تضرب لب ابيض وكام موزة كدة ف السريع النهاردة


تعرف على توافق برج الأسد مع باقي الأبراج النهاردة:


متوافق مع اللب الابيض والموز


*****************************************************************************


إعرف حظك اليوم برج العذراء السبت 19 أغسطس 2017 مع عبدالله أحمد..


العذراء: من 21 اغسطس إلى 20 سبتمبر


برج العذراء عاطفياً:


مفقوع من الناس النهاردة ليه بس؟..انتا مش ناقص اعداء وخصوصا اللي بيحبوك..متخسرش حد النهاردة..بلاش


برج العذراء عملياً:


مينفعش نأيف ناس على مزاجنا وانتا عارف كدة كويس..بس ممكن نخليهم يتوافقوا معانا ويقدروا تقلب مودنا ورغبتنا احيانا ف الصمت او ف الكلام..بالذوق وبالادب وبالتفهم..مش الخناق ولا قلبة الوش والتكشيرة يابرنس


برج العذراء صحياً:


اتفرج على كارتون وانتا بتتغدى..مش على مسلسل او فيلم درامي..الدراما مش مطلوبة النهاردة خالص ف الكتالوج بتاعك..تماما يعني..وراعي قولونك ف الاكل حبة..بلاش ترازيه عشان ميضايقكش


تعرف على توافق برج العذراء مع باقي الأبراج النهاردة:


متوافق مع الابراج الترابية والمائية والبرمائية


*****************************************************************************


إعرف حظك اليوم برج الميزان السبت 19 أغسطس 2017 مع عبدالله أحمد..


الميزان : من 21 سبتمبر إلى 20 اكتوبر


برج الميزان عاطفياً:


حاجتين تاخد بالك منهم النهاردة بشدة..مهم تسيطر على انفعالاتك وتقلباتك النفسية ومتبينهاش لحد والحاجة التانية راعي انك متفتريش على حد لو مودك مش كويس


برج الميزان عملياً:


مش ذنب الناس ان الجو مش حلو..الجو مش حلو علينا كلنا ياحبيبي


برج الميزان صحياً:


تسقط ف البانيو مع معطرات لطيفة ساعة على الاقل النهاردة وبعد كدة تنزل تتمشى حبة ومتكلمش ف اي مشاكل مع حد او تشتكي خالص


تعرف على توافق برج الميزان مع باقي الأبراج النهاردة:


متوافق مع لون السما ساعة العصرية


*****************************************************************************


إعرف حظك اليوم برج العقرب السبت 19 أغسطس 2017 مع عبدالله أحمد..


العقرب: من 21 اكتوبر إلى 20 نوفمبر


برج العقرب عاطفياً:


عاوز تحب ولا تتحب ولا الاتنين مع بعض..حدد انتا عاوز ايه بجد واعرف كويس عشان التوهان مابين التلات حاجات دول هو اللي عاملك مشاكل ومبينك اناني مبتحبش الا نفسك..واهم حاجة متخنقش على اللي بيحبك كأنك بتعاقبه على حبه ليك..دة تصرف مش تمام


برج العقرب عملياً:


محتاج مصادر الهام فيها تجديد عشان تديك دوافع تنجح وتستمر وتنبسط..ومحتاج تشجيع كتير جدا مع بعضا من الدلع مش اكتر


برج العقرب صحياً:


كمل ف الدايت زي مانتا ومتعكش ف الاكل بالليل ومتخدعش نفسك..الحاجة اللي تحسسك بالندم بعدين متعملهاش..ملهاش لازمة


تعرف على توافق برج العقرب مع باقي الأبراج النهاردة:


متوافق مع الاهتمام بمشاعر الاخرين


*****************************************************************************


إعرف حظك اليوم برج القوس السبت 19 أغسطس 2017 مع عبدالله أحمد..


القوس: من 21 نوفمبر إلى 20 ديسمبر


برج القوس عاطفياً:


لو الغضب اللي مكتوم جواك دة هو اللي هيتكلم لما تفتح بوقك النهاردة يبقى الاسلم والاحسن انك تسكت احسن..خليك كوول وصايع ومتعرفش حد انتا فعلا ناويله على ايه او كاشف اللي جواه تجاهك ازاي


برج القوس عملياً:


مش محتاج تحارب غير افكارك السيئة وبس النهاردة..المعركة دايرة جوة دماغك ومع نفسك على فكرة..حارب بهدوء وهتكسب ان شاء الله..متقلقش..اهم حاجة تصفي نيتك وتركز ف انك تنجح وبس


برج القوس صحياً:


اتعشى برة الليلة..ان شالله ف البلكونة..المهم يكون ف الهوا ويكون مع مزيكا هادية وبس


تعرف على توافق برج القوس مع باقي الأبراج النهاردة:


متوافق مع اللي يحبلك الخير وبس


*****************************************************************************


إعرف حظك اليوم برج الجدي السبت 19 أغسطس 2017 مع عبدالله أحمد..


الجدى: من 21 ديسمبر إلى 20 يناير


برج الجدي عاطفياً:


خايف تحب وتتحب وبتتدارى ف النكد والشحتفة ولوم النفس بدون اي داعي..لا فالح..ثم متلومش حد على حاجة انتا اتسببت فيها لنفسك بنفسك..عيب


برج الجدي عملياً:


اشغل وقتك بحبة رياضة يمكن نفسيتك حالتها تتحسن حبة


برج الجدي صحياً:


متركنش نفسيا ف حتة واحدة..بلاش..اتفسح كدة وشوف مشاعر تانية حسها بجانب الخوف والندم..يمكن تنبسط


تعرف على توافق برج الجدي مع باقي الأبراج النهاردة:


متوافق مع لوم الاخرين على افعالك


*****************************************************************************


إعرف حظك اليوم برج الدلو السبت 19 أغسطس 2017 مع عبدالله أحمد..


الدلو: من 21 يناير إلى 20 فبراير


برج الدلو عاطفياً:


قلبك مزقطط وفرحان لأسباب محدش يعرفها ولا يخص حد انه يعرفها..حافظ على الحالة دي على قد ماتقدر..عيون الناس بصاصة ومؤذية وهيغيروا من فرحتك..داري على فرحتك تزيد


برج الدلو عملياً:


فترة نشاطك بالليل مش بالنهار..استغل المعلومة دي كويس جدا النهاردة على قد ماتقدر


برج الدلو صحياً:


الدوشة والوشّ اللي حواليك هيخلص ومسيره يستقر ف اقرب داهية ممكنة متقلقش..اهم حاجة متركزش الا ف الحاجة اللي تستاهل وبس


تعرف على توافق برج الدلو مع باقي الأبراج النهاردة:


متوافق مع اعتزازك بنفسك


*****************************************************************************


إعرف حظك اليوم برج الحوت السبت 19 أغسطس 2017 مع عبدالله أحمد..


الحوت: من 21 فبراير إلى 20 مارس


برج الحوت عاطفياً:


هتلجأ النهاردة لإبتكار حلول غير تقليدية لمشاكل تقليدية واعتيادية وعادية خالص..واضح انك حابب تكون مختلف وخلاص النهاردة او انك متقدرش تلجأ للحلول التقليدية او خايف تتفقس تقريبا او تتكشف ويتعرف انك بتعمل حاجة ف الخباثة مش تمام..عموما انتا حر


برج الحوت عملياً:


ابعد عن التفكير المضني وقرب من الاشغال اليدوية والحاجات اللي ممكن تعملها بإيدك وبنفسك لنفسك بدون اللجوء لطلب المساعدة من اي حد


برج الحوت صحياً:


في طيش وتهور ف الاجواء ليه؟..التوتر اللي عندك مش هيضيعه غير انك تضيع وقت كبير ف الطبيخ وغسيل المواعين


تعرف على توافق برج الحوت مع باقي الأبراج النهاردة:


متوافق مع الرغبة ف الاستحواذ على كل حاجة..قشطة حقك..بطل بس كسل واتحرك حبة


*****************************************************************************



حظك اليوم ممكن يكون موجود وممكن ميكونش موجود..القرار قرارك لوحدك ف حياتك وبس..بس لو اخترنا نشوفه وندور عليه كويس وبإهتمام هنشوف تأثيره في حياتنا طول الوقت ومنقدرش ننكره.. بنشوف ناس مبسوطة وناس لأ.. بنقول على المبسوط حظه حلو وبنتمنى نبقى حظنا من حظه ونبقى مبسوطين زيه وبنتمنى نملك الانبساط دا ونتحكم فيه .. ونستدعيه كمان وقت اللزوم زي جني المصباح..زي الأحلام.. وزي الأماني والخيالات الحلوة.. وقت الضيقة والخنقة والمشاكل والاحتياج اليومي للأمل ف بكرة أفضل وأروق وأجمل وألوانه أحلى..بنتمنى يكون في منطق واسباب للسعادة ممكن تتحط وتتكثف ف كلام بسيط وقريب..


ومن هنا بقى في توقعات حظك اليوم بالاعتماد على حركة الكواكب ومواقع النجوم وعلم الفلك.. محدش ينكر إن كوكب الأرض كله واقع تحت تأثير حركة الكواكب المحيطة وخصوصاً القمر.


ولولا تأثيره مكانش بقى في حركة مد وجزر ومكانش الإنسان عرف يسافر بمراكب في البحر.. ولا كان الإنسان اتحرك من بلد لبلد برضه ف البر لو مكانش في مواقع للنجوم مميزة ف السما يقدر يعتمد عليها..


إفتكر الكلام دا وانت بتقرا حظك اليوم النهاردة وبكرة وكل يوم ياريت .. 


وتأكد إنك سواء عجبك الكلام المكتوب هنا في برجك أو لأ فانت تقدر تصنع حظك اليوم بإيديك سواء اليوم أو كل يوم..


الكلام المكتوب هنا دايما الغرض منه الفرفشة والدلع والمزاج الرايق بعلامات حلوة من الحياة محطوطة ف كلام وحبة مزيكا على مزاجك..


 تابعنا يومياً عشان تعرف حظك اليوم كل يوم ومتنساش.. كل دة مجرد هزار برئ ياريت متاخدوش على صدرك..


تحياتنا الدائمة.


 


اعلان حظك اليوم